ކޮވިޑް-19 ރޯގާއާއި ގުޅިގެން މިސްކިތްތަކުގައި ނަމާދުނުކުރެވޭ ޙާލަތުގައި އޮވެ، ރަމަޟާންމަހާއި ކުރިމަތިލުމަކީ ވަރަށް ވޭންދެނިވިކަމެއްގެ ގޮތުގައި ސައުދީޢަރަބިއްޔާގެ ރަސްގެފާނު ސަލްމާން ބިން ޢަބްދުލް ޢަޒީޒް ސިފަކުރައްވައިފިއެވެ.
އެމަނިކުފާނު މިފަދައިން ސިފަކުރައްވާފައިވަނީ، އިސްލާމީ މުޅި އުއްމަތަށާއި، ސައުދީޢަރަބިއްޔާގެ ރައްޔިތުންނަށް ރަމަޟާންމަހުގެ ތަހުނިޔާ ވިދާޅުވެ ދެވި ބަޔާނުގައެވެ. ރަސްގެފާނުގެ ފަރާތްޕުޅުން މަރުޙަބާގެ ބަޔާން އިއްވަވައިދެއްވީ ރަސްކަމުގެ ދަރުބާރުގެ މީޑިއާގެ ވަގުތީ ވަޒީރު، އަލް- ޤަޞަބީއެވެ.
ސައުދީ ރަސްގެފާނުގެ ބަޔާނުގައި ވިދާޅުވެފައިވަނީ ނޮވެލް ކޮރޯނާވައިރަސްއާއި ގުޅިގެން ދިމާވެފައިވާ މިދަތި އުނދަގޫ ވަގުތުގައި މުސްލިމް އުއްމަތް އެކުވެ މިކަމުން އަރައިގަތުމުގެ މުހިންމުކަމާއި ބެހެ ގޮތުން އަލިއަޅުއްވާލާފައެވެ. އަދި ވައިރަސްގެ ބަލިމަޑުކަމުގައި ތިބެ، ރަމަޟާންމަހުގައި އެންމެ އެދެވިގެންވާގޮތައް އަޅުކަމުގެ ކަންކަން ކުރިޔަށްނުގެންދެވޭތީ އެކަމާއި ހިތާމަފުޅުކުރައްވާކަމަށް ވިދާޅުވެފައިވެއެވެ. ވަކިން ޚާއްޞަކޮށް، މިސްކިތުގައި ޖަމާޢަތުގައި ނަމާދުނުކުރެވުމާއި، އިއުތިކާފުނުކުރެވުމާއި، ބައެއް މިސްކިތްތަކުގައި ތަރާވީޙު ނުކުރެވޭ ޙާލަތުގައި ރަމަޟާންމަހާއި ކުރިމަތިލާންޖެހުމަކީ ވޭންދެނިވިކަމެއްގެ ގޮތުގައި އެމަނިކުފާނުވަނީ ސިފަކުރައްވާފައެވެ.
"އަޞްލު ޙަޤީޤަތައް ދަންނަވާނަމަ، ބަރަކާތްތެރި ރަމަޟާން މަހާއި ކުރިމަތިލާއިރު، ރަމަޟާންމަހަށް ޚާއްޞަވެގެންވާ އަޅުކަން ކަމުގައިވާ ތަރާވީޙާއި، ޤިޔާމަތުއްލައިލި އަދާނުކުރެވޭ މިންވަރަށް ޙާލަތު ގޯސްވެފައި އޮތުމަކީ އަޅުގަނޑަށް އޭގެ ތަދު އިހުސާސް ކުރެވޭކަމެއް. މިހާރު ތަންފީޒުކުރަމުން މިދާ ކަންތައްތަކަކީ އިންސާނުންގެ ފުރާނަ ސަލާމަތްކުރުމަށާއި، އެމީހުންގެ ޞިއްޙަތަށާއި، ކޮރޯނާވައިރަސްއާއި ކުރިމަތިލުމަށް އަޅަމުންދާ ސަލާމަތާއި ރައްކާތެރިކަމުގެ ފިޔަވަޅުތަކެއް. ބަރަކާތްތެރި ރަމަޟާންމަސް އަޅުގަނޑުމެންނާއި ކުރިމަތިމިލަނީ އިންސާނީ ހަޟާރަތުގައިވެސް ދިމާވި އެންމެ ނުރައްކާތެރި ބަލިމަޑުކަމުގެތެރޭގައި. މުޅި އިންސާނިޔަތައް އޭގެ ނުރައްކާ އޮތް މި ބަލިމަޑުކަމުން އަރައިގަތުމަށް ދުނިޔޭގެ ހުރިހައި ޤައުމުތަކުންނާއި، ޖަމްޢިއްޔާ ޖަމާޢަތްތަކުން މިކަމުން އަރައިގަތުމަށް މަސައްކަތްކުރަމުންދިޔަ ނަމަވެސް އަދި މިއޮތީ ވަރަށް އުނދަގޫ ނާޒުކު ޙާލަތެއްގައި"ސައުދީ ރަސްގެފާނު ސަލްމާން ބިން ޢަބްދުލް ޢަޒީޒް
ރަސްގެފާނުގެ ބަޔާނުގައި ވަނީ، މިހާރު އެޤައުމުގެ ރަސްކަމުގެ ދަރުބާރުން އެންމެ އަހައްމިއްޔަތުކަމެއް ދެނީ އެޤައުމުގެ ރައްޔިތުންނާއި އެޤައުމުގައި ދިރިއުޅޭ ބިދޭސީންގެ ސަލާމަތާއި ރައްކާތެރިކަން ކަށަވަރުކުރުމަށް ކަމަށެވެ.
މަސްޖިދުލް ޙަރަމްއާއި، މަސްޖިދުއްނަބަވީގެ ޙާލަތު ބަޔާން ކުރައްވާ ރަސްގެފާނު ވިދާޅުވެފައިވަނީ، ޙައްޖާއި ޢުމުރާގެ އަޅުކަމަށް ޒިޔާރަތްކުރާ މުސްލިމް އުއްމަތުގެ ރައްޔިތުންނަށް ބޭނުންވާ ޚިދުމަތްތައް ދިނުމުގައި ތައްޔާރަށް ތިބިކަމަށާއި، މުޤައްދަސް މިބިނާތަކުގެ ސަލާމަތާއި ރައްކަލަށް ކުރެވެން ހުރި ހުރިހައި ކަމެއް ކުރައްވާނެކަމަށެވެ. އަދި ޒިޔާރަތްކުރާ ފަރާތްތަކުގެ ރައްކަލަށް އެޅުއްވެން ހުރި ހުރިހައި ފިޔަވަޅެއް އަޅުއްވާނެކަމުގެ ޔަޤީންކަން ދެއްވިއެވެ.
ކޮވިޑް-19 އާއި ގުޅިގެން ޢުމުރާގެ އަޅުކަން ކުރުމަށް އެހެން ޤައުމުތަކުގެ މީހުން ސަޢުދީ ޢަރަބިއްޔާއަށް ދަތުރުކުރުން ވަނީ މަނާކޮށްފައެވެ. އެހެންނަމަވެސް، ރަސްގެފާނުގެ ބަޔާނުގައި މަސްޖިދުލް ޙަރަމްއާއި މަސްޖިދުއްނަބަވީ ހުޅުއްވާނެ ސީދާ ތަރީޚެއް ވިދާޅުވެފައެއް ނުވެއެވެ. ރަސްގެފާނުގެ ބަޔާން ނިންމަވާލައްވާފައިވަނީ ކޮވިޑް-19 އިން ސަލާމަތްވުމަށް ކުރަމުންގެންދާ މަސައްކަތުގައި، އެޤައުމުގެ އަސްކަރީންނާއި، އެއްގަމު ޞަރަޙައްދީއިން ބަލަހައްޓާ ސިފައިންނާއި، މަދަނީ ފުލުހުންނާއި، ޞިއްޙީ ޚިދުމަތްތެރިންގެ އުފުއްލަވަމުން ގެންދަވާ މަސްއޫލިއްޔަތުގެ އަގު ވަޒަންކުރައްވަފައެވެ. އަދި ޤައުމަށް ޚިދުމަތްކުރުމަށް ކުރައްވަމުންގެންދަވާ ބުރަ މަސައްކަތައް ހިތްވަރު ދެއްވާ، އެމަނިކުފާނު ވަނީ ޝުކުރު އަދާކުރައްވާފައެވެ.
ބުރާސްފަތި ދުވަހުގެ ރޭގަނޑު ސައުދީޢަރަބިއްޔާގެ ވެރިރަށް ރިޔާދުގައި އެޤައުމުގެ ސުޕްރީމް ކޯޓުން ހަނދު ސާބިތުކުރުމަށް ބޭއްވި ބައްދަލުވުމުގައި ވަނީ ހުކުރު ދުވަހަކީ ބަރަކާތްތެރި ރަމަޟާންމަހުގެ ފުރަތަމަ ދުވަހުގެ ގޮތުގައި ކަނޑައަޅާފައެވެ.
އަރަބި އަދި މުސްލިމް ޤައުމުތަކާއި، އެކުވެރި ދައުލަތްތަކުގެ ވެރިން ގެންދަވަނީ ރަސްގެފާނު ސަލްމާން ޢަބްދުލް ޢަޒީޒަށާއި، ވަލީ އަޙުދު މުޙައްމަދު ބިން ސަލްމާނަށް ފޯނުން ގުޅުއްވާ ބަރަކާތްތެރި ރަމަޟާންމަހުގެ ތަހުނިޔާއާއި މުބާރަކްބާދީ އަރިސްކުރައްވަމުންނެވެ.
