ތަރާވީހުގެ ޖަމާއަތެއް ހެދީ މަރުކަޒުގައި ލޮކްޑައުންވެގެން ތިބި މުވައްޒަފުން: މިނިސްޓަރ
23 އެޕްރީލު 2020 | ބުރާސްފަތި 21:55މަރުކަޒުގައި ލޮކްޑައުންގައި ތިބީ 10 މުވައްޒަފުން
އިސްލާމީ މަރުކަޒުގައި ކުރެވުނު ތަރާވީހު ނަމާދު
އިސްލާމީ މަރުކަޒުގައި ބުރާސްފަތު ދުވަހުގެ ރޭ ތަރާވީހު ނަމާދު ކުރީ އިސްލާމީ މަރުކަޒުގައި ލޮކްޑައުންގައި ތިއްބެވި މިނިސްޓްރީގެ މުވައްޒަފުން ކަމަށް އިސްލާމިކް މިނިސްޓަރ ޑރ،. އަހުމަދު ޒާހިރު ވިދާޅުވެއްޖެއެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރެމުންދާތީ، މިހާލަތަށް ރިޔާއަތްކޮށް، އިތުރަށް މިވައިރަސް ރާއްޖޭގައި ފެތުރުން ހުއްޓުވުމަށްޓަކައި އަޅާ ރައްކާތެރިކަމުގެ މުހިއްމު ފިޔަވަޅެއްގެ ގޮތުން، އިސްލާމީ ފަތުވާދޭ އެންމެ މަތީ މަޖިލީހާއި ދީނީ އިލްމުވެރިންގެ ލަފާގެ މަތިން މިދިޔަ މާރޗު މަހުގެ 18 ވަނަ ދުވަހުގެ މެންދުރު ނަމާދުން ފެށިގެން، މާލެ، ހުޅުމާލެ، ވިލިމާލެ، އަދި ސަރުކާރުން ފޭބުން މަނާކުރާ ހުރިހާ ރިސޯޓްތަކެއްގައި ފަރުޟު ނަމާދާއި ހުކުރު ނަމާދުގެ ޖަމާއަތް މިސްކިތުގައި ނުހެދުމަށް ވަނީ ނިންމާފައެވެ.
ނަމަވެސް ބުރާސްފަތި ދުވަހުގެ ރޭ 4 މީހުންގެ ޖަމާއަތެއްގައި ކުރެވުނު ތަރާވީހު ނަމާދު މިނިސްޓްރީގެ ޔޫޓިއުބުން ވަނީ ލައިވްކޮށްފައެވެ. އެ ނަމާދުގައި ބައިވެރިވެފައި ވަނީ އިސްލާމީ މަރުކަޒުގެ އިމާމުންނާއި މިނިސްޓްރީގެ އިސްވެރިންނާއި ކުއްޖަކު ހިމެނޭ ގޮތަށް ފަސް ބޭފުޅުންނެވެ. އެއާއި އެކު ގައިދުރު ކަމެއްނެތި އަދި ޖަމާއަތުގައި ނަމާދު ކުރުމުން ގިނަ ފަރާތްތަކުން ސޯޝަލް މީޑިއާގައި ސުވާލުއުފައްދާފައިވެއެވެ.
ރާއްޖެޓީވީން ކޮވިޑް-19 އާއި ގުޅިގެން ގެނެސްދެމުންދާ ޚާއްސަ ކަވަރޭޖަށް މިނިސްޓަރ ދެއްވި ޚާއްސަ އިންޓަރވިއުއެއްގައި ވިދާޅުވީ މިނިސްޓްރީގައި ލޮކްޑައުންވެގެން ތިބީ ދީނީ ސެކްޝަން، ޒަކާތު ސެކްޝަން އަދި އިސްލާމިކް ސްޓޫޑިއޯގައި މަސައްކަތް ކުރާ ބޭފުޅުންކަމަށެވެ. އެގޮތުން ޖުމްލަ 10 މީހުން ތިބީ މަރުކަޒުގައި ލޮކްޑައުންވެގެން ކަމަށެވެ.
މިނިސްޓަރ ވިދާޅުވީ ލޮކްޑައުން ކުރުމާއި ގުޅިގެން މަރުކަޒުގައި ބައެއް މުވައްޒަފުން ތިބޭގޮތަށް ނިންމީ ރައްޔިތުންނަށް ދޭން ޖެހޭ ޚިދުމަތްތައް މެދުކަނޑާލަން ބޭނުންނުވާތީ ކަމަށެވެ.
