މިހާތަނަށް 105 މީހުން ޖޫރިމަނާކުރެވި، 21 މީހުން ހައްޔަރުކުރެވިފައިވޭ: ފުލުހުން
23 އެޕްރީލު 2020 | ބުރާސްފަތި 20:58ދުވާލެއްގެ މައްޗަށް 7000 ޕަރމިޓް ދޫކުރެވޭ
ފުލުހުން މަގުމަތީގައި ހަރަކާތްތެރިވަނީ
މާލެއިން ކޮވިޑް-19 ގެ ކޭސްތަކެއް ފެނުމާއި ގުޅިގެން ލޮކްޑައުން ކުރެވިފައިވާއިރު، މިހާތަނަށް ގަވާއިދާ ޚިލާފަށް މަގުމަމައްޗަށް ނިކުތް105 މީހުން ޖޫރިމަނާކުރެވިފައިވާ ކަމަށް ފުލުހުން ހާމަކޮށްފިއެވެ.
ބުރާސްފަތި ދުވަހުގެރޭ ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި އޮންލައިންކޮށް ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން އޭސީޕީ އިސްމާއިލް ނަވީން ވިދާޅުވީ ލޮކްޑައުންއާއި ޚިލާފުވި 105 ފަރާތެއް ޖޫރިމަނާކޮށްފައިވާކަމަށާއި އަދި މިހާތަނަށް 21 މީހަކު ހައްޔަރުކުރެވިފައިވާކަމަށެވެ.
މީގެއިތުރުން ބޭރަށް ނުކުތުމަށް ދެވޭ ޕަރމިޓުތަކުގެ އަދަދުތަކަށް އަލިއަޅުއްވާލައްވާ ނަވީން ވިދާޅުވީ ދުވާލެއްގެ މައްޗަށް 7000 ޕަރމިޓް ދޫކުރެވޭ ކަމަށެވެ.
ބުރާސްފަތި ދުވަހު އެކަނި 160 ޑެލިވަރީ ނުވަތަ ވެހިކަލް ޕަރމިޓު ދޫކުރެވިފައިވާކަމަށް ވެސް ނަވީން ވިދާޅުވިއެވެ.
ނަވީން ވިދާޅުވީ ޑްރޮޕްޑައުން މެނޫގައި ބައެއް އެޑްރެސްތައް ނުހިމެނޭތީ ޕަރމިޓު ހޯދަން ބޭނުންވާ މީހުންގެ ފަރާތުން ވަރަށް ގިނަ ޝަކުވާ ލިބެމުންދާކަމަށެވެ. ނަވީން ވަނީ އެޑްރެސްއެއް ނެތް ނަމަ 1665 އަށް ނުވަތަ 3034444 އަށް ގުޅާ، އެކަން އެންގުމަށް އިލްތިމާސްކުރެއްވިއެވެ. ނަމަވެސް މި ދެ ނަމްބަރަކީ ވެސް ވަރަށް ބިޒީ ނަމްބަރުތަކެއް ކަން ފާހަގަކުރައްވާ ނަވީން ވިދާޅުވީ ވީ ވަރަކުން ލިސްޓަށް އިތުރު އެޑްރެސްތައް އިތުރުކުރައްވާނެ ކަމަށެވެ.
