އިއްޔެއަކީ އެންމެ ގިނަ ކޭސް ފެނުނު ދުވަސް، 24 ގަޑިއިރުގެ ތެރޭގައި 23 ކޭސް!
23 އެޕްރީލު 2020 | ބުރާސްފަތި 23:08މިއާއެކު ރާއްޖެއިން ފެނުނު ޖުމްލަ ކޭސްތަކުގެ އަދަދު ވަނީ 108 އަށް އަރާފަ
މާލެ ސިޓީގެ މަގުތަކުގައި އެމްބިއުލާންސެއް ހަރަކާތްތެރިވާ މަންޒަރު
ބުރާސްފަތި ދުވަހު ކޮވިޑް-19 އަށް ޕޮޒިޓިވް ކަމަށް ރިޕޯޓްކުރެވުނު 23 މީހުންނާއެކު، ރާއްޖެއިން ފެނުނު ކޭސްތަކުގެ ޖުމްލަ އަދަދު 108 އަށް އަރައިފި އެވެ.
މިއީ 24 ގަޑިއިރުގެ ތެރޭގައި އެންމެ ގިނަ އަދަދަކަށް ބަޔަކު ޕޮޒިޓިވްވީ ކަމަށް ރިޕޯޓްކުރެވުނު ދުވަހެވެ. މީގެ ތެރޭގައި އެއް ތަނެއްގައި ދިރިއުޅޭ 14 މީހަކު ހިމެނެ އެވެ. މި ވަގުތު ރާއްޖޭގައި 94 މީހަކު އަންނަނީ ކޮވިޑް-19 އަށް ފަރުވާ ހޯދަމުންނެވެ.
މާލެ ސިޓީން ވައިރަސް ފެނުމާއެކު، ރާއްޖެއިން ފެންނަ ކޭސްތަކުގެ އަދަދު އަންނަނީ ދުވަހަކަށް ވުރެ ދުވަހެއް އިތުރުވަމުންނެވެ. ފާއިތުވި ފަސް ދުވަހުގެ ތެރޭގައި އެކަނި، މާލެ ސިޓީއިން ވަނީ ކޮވިޑް-19 އަށް ޕޮޒިޓިވް 73 މީހަކު ފެނިފަ އެވެ.
މިހާތަނަށް ނަތީޖާ ނުލިބި ސާމްޕަލްތަކުގެ އަދަދަށް ބަލާއިރު، އަދި މި އަދަދު އިތުރުވުމުގެ ފުރުސަތު އެބައޮތެވެ. އެގޮތުން މިހާތަނަށް ނަތީޖާ ނުލިބިވާ 300 ސާމްޕަލެއް އެބައޮތެވެ. އޭގެ ތެރޭގައި ކުރެއްދޫ އައިލެންޑް ރިސޯޓް އެންޑް ސްޕާ އިން ނަގާފައިވާ 245 ސާމްޕަލް ހިމެނެ އެވެ.
