އިންޓަ މިލާނުގެ 23 ކުޅުންތެރިއަކު މިދިޔަ ޖެނުއަރީ މަހު ބަލިވެ އުޅުނު ނަމަވެސް، ކޮރޯނާވައިރަސް (ކޮވިޑް-19) އަށް ޓެސްޓް ނުކުރާ ކަމަށް ބުނެ ދެއްކި ވާހަކަތަކަށް ފޯވާޑް ރޮމެލޫ ލުކާކޫ މާފަށް އެދިއްޖެ އެވެ.

ދާދި ފަހުން ލުކާކޫ ވަނީ ބެލްޖިއަމްގެ ޓީވީ ޕްރެޒެންޓަރަކާއެކު އޮތް އިންސްޓަގްރާމް ލައިވް އިންޓަވިއުއެއްގައި ކޮވިޑް-19 އާ ގުޅޭ ވާހަކަތަކެއް ހިއްސާ ކޮށްފައެވެ. ލުކާކޫ ބުނީ ޖެނުއަރީ މަހު ލީގުގައި ކަލިއާރީއާ ދެކޮޅަށް ކުޅުނު މެޗުގެ ކުރިން، އިންޓަގެ ކުޅުންތެރިން ތިބީ ރޯގާ ޖެހިފައި ކަމަށެވެ. އެގޮތުން އެޓީމުގެ 25 ކުޅުންތެރިންގެ ތެރެއިން 23 ކުޅުންތެރިއަކު ބަލިވެ އުޅުނު ކަމަށާއި ކަލިއާރީއާ ދެކޮޅަށް ކުޅުނު މެޗުގެ 25 މިނެޓު ފަހުން އެޓީމުގެ ޑިފެންޑަރެއް ދަނޑުން ފައިބައިގެން ދިޔަ ކަމަށްވެސް ބުންޏެވެ. އަދި އޭރު އެޓީމުގެ އެއްވެސް ކުޅުންތެރިއަކު ކޮވިޑް-19 އަށް ޓެސްޓުކޮށްފައިނުވާ ކަމަށް ވަނީ ބުނެފައެވެ.

އެ ވާހަކަތައް އިންޓަގެ ސަމާލުކަމަށް އައުމުން، ލުކާކޫއާ ކްލަބުން ވާހަކަދައްކައި މައްސަލަ ހައްލުކޮށްފައިވާ ކަމަށް ރިޕޯޓުތައް ބުނެއެވެ. އަދި ލުކާކޫ ވަނީ މީޑިއާގައި އެވާހަތައް ހިއްސާކުރުމުން އެކަމަށް މާފަށް އެދިފައެވެ.

އިޓަލީން ކޮވިޑް-19 އަށް ގިނަ އަދަދެއްގެ ފުޓްބޯޅަ ކުޅުންތެރިންތަކެއް ޕޮޒިޓިވްވި ނަމަވެސް، އިންޓަގެ ކުޅުންތެރިއަކު މި ވައިރަހަށް ޕޮޒިޓިވްވެފައެއް ނުވެއެވެ.

ކޮވިޑް-19 އާ ގުޅިގެން އިޓާލިއަން ލީގުގެ ކުޅުންވެސް މުއްދަތެއް ނެތް ގޮތަށް ފަސްކޮށްފައިވާއިރު، އަންނަ ޖޫން މަހު ލީގުގެ ކުޅުން އަލުން ފަށަން މިހާރު އަންނަނީ މަސައްކަތް ކުރަމުންނެވެ. ލީގު އަލުން ފަށަން ހުރިހާ ކްލަބުންވެސް އެއްބަސްވެފައިވީ ނަމަވެސް، ލީގު އަލުން ފަށާނީ ސަރުކާރުން ހުއްދަދޭ ނަމަ، ފީފާ އާއި ޔުއެފާ އިން ކަނޑައަޅާފައިވާ އުސޫލުގެ މަތިން ކަމަށް ލެގާ ސެރިއޭ ކައުންސިލުން ވަނީ ބުނެފައެވެ.