އިތުރު 14 މީހަކު ކޮވިޑް-19 އަށް ޕޮޒިޓިވްވެއްޖެ
23 އެޕްރީލު 2020 | ބުރާސްފަތި 15:54މާލެއިން ކޮވިޑް-19 ގެ ފުރަތަމަ ކޭސް ފެނުނީ މި މަހުގެ 15 ވަނަ ދުވަހު
މާލޭގެ މަގެއްގެ މަތި
ރާއްޖެއިން ކޮވިޑް-19 އަށް އިތުރު 14 މީހަކު ޕޮޒިޓިވްވެއްޖެއެވެ.
ނެޝަނަލް އެމެޖެންސީ އޮޕަރޭޝަން ސެންޓަރ (އެންއީއޯސީ) ގައި ކުރިޔަށްދާ ނޫސްވެރިންގެ ބައްދަލުވުމުގައި އެކަން ހާމަ ކުރެއްވީ އެ ސެންޓަރުގެ ތަރުޖަމާނު މުހައްމަދު މަބްރޫކް އަޒީޒް އެވެ. އެއާއި އެކު ރާއްޖޭގައި ކޮވިޑް-19 އަށް ޕޮޒިޓިވްވި މީހުންގެ އަދަދު 108 އަށް އަރާފައެވެ.
ނޫސްވެރިންގެ ބައްދަލުވުމުގައި ވާހަކަދައްކަވަމުން ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ މެޑިކަލް އޮފިސަރު ޑރ. ނަޒްލާ ރަފީގް ވިދާޅުވީ، ޕޮޒިޓިވްވި 14 މީހުންނަކީ ބިދޭސީން ކަމަށާއި އެ އެންމެންނަކީވެސް އެއް ތަނެއްގައި ދިރިއުޅެމުންދާ މީހުން ކަމަށެވެ. އޭނާ ވިދާޅުވީ، އެ ކޭސްތަކަކީ ތޮއްޖެހިގެން ބިދޭސީން ދިރިއުޅޭ ތަންތަނުގެ ސްކްރީން ކުރިޔަށް ދަނިކޮށް އައިޑެންޓިފައިކުރެވެނު ކޭސްތައް ކަމަށެވެ.
ބުރާސްފަތި ދުވަހު ހެނދުނު ޕޮޒިޓިވްވި 9 ކޭސް އަކީ އެކި ކޭސްތަކާއި ގުޅުން ހުރި ކޭސްތައް ކަމަށް ވިދާޅުވިއެވެ. ޑރ. ނަޒްލާ ވިދާޅުވީ، އޭގެ ތެރޭގައި ކޭސް 52 އާއި ގުޅުންހުރި ދެ މީހަކާއި، އަދި ކޭސް 36 އާއި ގުޅުން ހުރި ދެ ފަރާތެއް ހިމެނޭ ކަމަށެވެ.
ޑރ. ނަޒްލާ ވިދާޅުވީ، ބުރާސްފަތި ދުވަހު ފެނުނު ކޭސްތަކުގެ ކޮންޓެކްޓް ޓްރޭސިންގެ ތެރެއިން 137 މީހަކު ހޯދިފައިވާ ކަމަށެެވެ.
