ކ. ހިންމަފުށީގައި ކައުންސިލްގެ ފަރާތުންދޭ ރަމަޟާން މަހުގެ ރޯދަ އިނާޔަތް ދިނުމަށް ކަނޑައެޅި ތަކެތި ފޯރުކޮށްދިނުމަށް ދަތިތައް ކުރިމަތިވެފައިވާ ކަމަށް އެރަށުގެ ކައުންސިލުން ބުނެފިއެވެ.
ހިންމަފުށީ ކައުންސިލުން ބުނީ ވޭތުވެދިޔަ ތަނުގައި ކައުންސިލުގެ ފަރާތުން ކޮންމެ ރަމަޟާންމަހަކާ ގުޅިގެން ދެމުން ގެންދިޔަ ރޯދަ އިނާޔަތް ދިނުމުގައި، މިހާރު ފެތުރެމުންދާ ނުރައްކާތެރި ކޮވިޑް-19 ގުޅިގެން އެކިގޮތްގޮތުން ދަތިތައް ދިމާވަމުންދާ ކަމަށެވެ.
ރޯދަ އިނާޔަތުގެ ގޮތުގައިދޭން ކަނޑައެޅި ތަކެތި ފޯރުކޮށް ދިނުން ލަސްވެފައިވާ ކަމަށް ކައުންސިލުން ބުނެއެވެ.
ކައުންސިލުން ބުނީ މިތަކެތި ދިނުމުގައި ހަމަޖެހިފައިވާ ގަވާއިދުތަކާއި އުސޫލުތަކަށް ރިއާޔަތް ކުރާއިރު ކައުންސިލްގެ ސީދާ އާމްދަނީން މި އެހީ ފޯރުކޮށް ނުދެވުނުކަމުގައި ވިޔަސް، އެރަށުގައި މަސައްކަތް ކުރާ ސިނާއީ ފަރާތްތަކުގެ އެހީތެރިކަން ލިބިފައިވާތީ، ކައުންސިލުން ކަނޑައަޅާފައިވާ ގޮތުގެ މަތީން ރައްޔިތުންނަށް ވީހާވެސް އަވަހަށް އެތަކެތި ލިބޭނެ ކަމުގެ ޔަގީންކަން ދޭ ކަމަށެވެ.
ހިންމަފުށީގެ އިތުރުން އަތޮޅުތެރޭގެ ގިނަ ރަށްރަށުގައި ކައުންސިލްގެ ފަރާތުން ރޯދަ އިނާއަތް ދެމުންދެއެވެ.
