ރާއްޖެއަށް 28.9 މިލިއަން ޑޮލަރު ދޭން އައިއެމްއެފްގެ ބޯޑުން ފާސްކޮށްފި

ކޮވިޑް-19 އިން ރައްކާތެރިވުމަށް ކުރަމުންދާ މަސައްކަތްތަކަށް އެހީވުމުގެ ގޮތުން އިންޓަރނޭޝަނަލް މަނިޓަރީ ފަންޑް (އައިއެމްއެފް) އިން ރާއްޖެއަށް 28.9 މިލިއަން ޑޮލަރު ދިނުމަށް ނިންމައިފިއެވެ.

ބުދަ ދުވަހު އައިއެމްއެފްއިން ނެރުނު ބަޔާނެއްގައި ބުނީ، ކޮވިޑް-19 އިން ރައްކާތެރިވުމުގެ ފިޔަވަޅުތައް ވަރުގަދަ ކުރުމަށް މެމްބަރު ޤައުމުތަކަށް އެހީވުމުގެ ގޮތުން ކުރަމުންދާ މަސައްކަތްތަކުގެ ދަށުން މިހާތަނަށް ގިނަ ޤައުމުތަކަކަށް މާލީ އެހީތެރިކަން ފޯރުކޮށްދީފައިވާ ކަމަށެވެ. އަދި ދިވެހިރާއްޖެއަށް އެހީވުމަށް ނިންމި ނިންމުމަކީ އައިއެމްއެފުން އެގޮތަށް ނިންމި 30 ވަނަ ރިކުއެސްޓްކަމަށް ބުނެފައިވެއެވެ.

Advertisement

އެގޮތުން އައިއެމްއެފްގެ ރެޕިޑް ކްރެޑިޓް ފެސިލިޓީން ދޫކުރުމަށް ނިންމި މި ފައިސާއަކީ ސަރުކާރުގެ މިވަގުތުގެ ޚަރަދުތައް ބެލެހެއްޓުމާއި، ބެލެންސް އޮފް ޕޭމަންޓް ބެލެހެއްޓުމަށް ދޫކޮށްފައިވާ ފައިސާކަމަށް އައިއެމްއެފުން ބުނެއެވެ.

އޭގެ އިތުރުން، ކޮވިޑް-19 ގެ ބަލިމަޑުކަމުގެ ސަބަބުން މުޅި ދުނިޔޭގެ އިޤްތިސާދަށްވެސް އަސަރުކޮށްފައިވާކަން ފާހަގަކޮށް އައިއެމްއެފުން ބުނީ، ރާއްޖޭގެ ޓޫރިޒަމާއި ދަތުރުފަތުރުގެ ސިނާއަތަށްވެސް ވަރަށް ބޮޑަށް އަސަރުކޮށްފައިވާ ކަމަށާއި، އެކަމުގެ ސަބަބުން ރާއްޖޭގެ އުފެއްދުންތެރިކަމުގެ ނިސްބަތުން ބޮލަކަށް ޖެހޭ ވަރުވެސް ދަށްވެގެންދާނެ ކަމަށް ބެލެވޭ ކަމަށެވެ.

އައިއެމްއެފްގެ ބަޔާނުގައި އިތުރަށް ބުނީ، ކޮވިޑް-19ން ރައްކާތެރިވުމަށް ރާއްޖެއިން ކުރީބައިގައި ފިޔަވަޅުތައް އަޅާފައިވާ ކަމަށާއި، އިތުރަށް މި ބަލިމަޑުކަމުން ސަލާމަތްވުމުގައި ކުރާ މަސައްކަތުގައި ރާއްޖެއަށް ބޭރުގެ އެހީތެރިކަން ވަރަށް ބޮޑަށް ބޭނުންވާ ކަމަށެވެ. އެގޮތުން އިޤްތިސާދީ ގޮތުން ލިބޭނެ ގެއްލުން ކުޑަކުރުމާއި، މާލީ ގޮތުން ކުރިމަތިވާ ފިއްތުންތައް ކުޑަކުރުމަށް ރާއްޖެއިން ކުރީބަައިގައި މަސައްކަތް ފެށިކަން އައިއެމްއެފުން ފާހަގަކޮށްފައިވެއެވެ. އަދި އެކަން އައިއެމްއެފްގެ ޗެއަރ އަދި ޑެޕިއުޓީ މެނޭޖިންގ ޑިރެކްޓަރ ޓާއޯ ޒެންގ ގެ ވާހަކަފުޅުގައިވެސް ފާހަގަކުރެއްވިއެވެ.

ޓާއޯ އެހެން ވިދާޅުވެފައިވާއިރު، ކޮވިޑް-19 އާ ގުޅިގެން ސަރުކާރުގެ ޚަރަދުތައް ކުޑަކުރުމަށް މިހާރުވެސް ބަޖެޓުން 1 ބިލިއަން ރުފިޔާ ކުޑަކޮށްފައި ވާއިރު އިތުރަށްވެސް ޚަރަދު ކުޑަކުރުމުގެ މަސައްކަތްތަކެއް ކުރައްވާނޭ ކަމަށް ފިނޭންސް މިނިސްޓަރުވެސް ވިދާޅުވެފައިވެއެވެ.

ކޮވިޑް-19 އާ ގުޅިގެން ރާއްޖެއަށް ދިމާވާނެ އިގްތިޞާދީ ދަތިކަން ފޫބެއްދުމަށްޓަކައި ބޭރުގެ އެކި ފަރާތްތަކުން 215.37 މިލިއަން އެމެރިކާ ޑޮލަރު ހޯދުމުގެ މަސައްކަތް ސަރުކާރުން މިހާރުވެސް ކުރައްވަމުން ގެންދަވާކަމަށް ފިނޭންސް މިނިސްޓްރީންވެސް ބުނެފައިވާއިރު، އައިއެމްއެފްއިން މި ދިން އެހީވެސް އޭގެތެރޭގައި ހިމެނިފައިވެއެވެ.

މީގެއިތުރުން ރަހުމަތްތެރި ޤައުމުތަކާއެކު ބައިލެޓެރަލް ގުޅުންތަކުގެ ތެރެއިން ފައިސާ އާއި ހިލޭ އެހީ ހޯދުމުގެ މަސައްކަތް ކުރަމުން ދާކަމަށް ފިނޭންސް މިނިސްޓްރީން ވަނީ ބުނެފައެވެ.