ކޮވިޑް-19 އަށް ޕޮޒިޓިވްވި 86 ވަނަ ކޭސްއަކީ އެސްޓީއޯގެ މުއައްޒަފެއް: ޑރ. އަފްޒަލް
22 އެޕްރީލު 2020 | ބުދަ 13:51ބުދަ ދުވަހު ޕޮޒިޓިވްވީ ދެދިވެހިން
ބުދަ ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން، ޑރ. އަފްޒަލް
ކޮވިޑް-19 އަށް ޕޮޒިޓިވްވި 86 ވަނަ ކޭސްއަކީ ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) ގެ މުއައްޒަފެއްކަމަށް ޑރ. އިބްރާހީމް އަފްޒަލް ވިދާޅުވެއްޖެއެވެ.
ކޮވިޑް-19ގެ އެންމެފަހުގެ މައުލޫމާތު ހިއްސާކުރުމަށް ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ ބުދަ ދުވަހުގެ މެންދުރުފަހުގެ ޕޮޒިޓިވްވި ކޭސް 85 އަދި 86 ދެދިވެހިން ކަމަށެވެ. ޑރ. އަފްޒަލް ވިދާޅުވީ ކޭސް 85 އާއި ގުޅުންހުރި ކޮންޓްރެކްޓް ޓްރޭސިންގެ މަސައްކަތްކޮށްފައިވާ ކަމަށެވެ. އަދި އޭނާއަކީ އީދު މިސްކިތަށް ނަމާދަށް އަރާ މީހެއްކަން ޑރ. އަފްޒަލް ފާހަގަކުރެއްވިއެވެ.
ޑރ. އަފްޒަލް ވިދާޅުވީ 86 ވަނަ ކޭސް އިތުރު އެހެން ކްލާސްޓަރތަކާ ގުޅިފައިވާ ކަމަށެވެ. އޭނާއަކީ އެސްޓީއޯގެ ހެޑް ކުއަރޓާސްގައި ސެކިއުރިޓީގެ ވަޒީފާއަދާ ކުރަމުންދާ މީހެއް ކަމަށް ޑރ. ވިދާޅުވި އެވެ. އަދި އޭނާއަކީ ޓެކްސީ ދުއްވާމީހެއްކަންވެސް ޑރ. އަފްޒަލް ފާހަގަކުރެއްވިއެވެ.
މީގެއިތުރުން ޑރ. އަފްޒަލް ވިދާޅުވީ އަލާމަތްތައް ފެނިފައިވަނީ 15 އޭޕްރީލްގައި ކަމަށާއި، މިހާރު އޭނާގެ ގައިން އަލާމަތެއް ނުފެންނަ ކަމަށެވެ. އަދި ކޮންޓްރެކްޓް ޓްރޭސިންގެ މަސައްކަތްތައް ކުރަމުންދާއިރު، މިހާތަނަށް 07 މީހަކު ފެނިފައިވާ ކަމަށެވެ.
ޑރ. އަފްޒަލް ވިދާޅުވީ ކޮންޓްރެކްޓް ޓްރޭސިންގެ މަސައްކަތްތައް ކުރަމުންދާއިރު، މިދެމީހުންނާ ދިމާވެފައިވާނަމަ އެކަން ރިޕޯޓުކޮށްދިނުމަށް އެދޭކަމަށެވެ. އަދި ވިދާޅުވީ މިމަސައްކަތްތަކަށް އާންމުންގެ އެއްބާރުލުން ނުލިބޭ ކަމަށްވާނަމަ ވައިރަސް ކޮންޓްރޯލް ނުކުރެވޭނެ ކަމަށެވެ.
