ހއ.އަތޮޅު ހޮސްޕިޓަލުން ފޮތި މާސްކް ފަހަނީ!
22 އެޕްރީލު 2020 | ބުދަ 12:17ޕްރޮޓެކްޓިވް ޝީލްޑް ވެސް ހަދަމުން ގެންދޭ
ހއ.އަތޮޅު ހޮސްޕިޓަލްގެ މުވައްޒިފުން ފޭސް މާސްކް ފެހުމުގައި
ސާޖިކަލް މާސްކް ލިބުން ދަތިވެފައި ވާތީ، ފޮތި މާސްކު ފެހުމުގެ މަސައްކަތް ހއ.އަތޮޅު ހޮސްޕިޓަލްގައި މަސައްކަތް ކުރާ މުއައްޒަފުން ފަށައިފިއެވެ.
ރާއްޖެއެމްވީއަށް ހޮސްޕިޓަލްގެ މޭނަޖަރު އުސްމާން އަޝްރަފް ވިދާޅުވީ މާސްކް ފެހުމުގެ އިތުރުން ޕްރޮޓެކްޓިވް ޝީލްޑް ވެސް ހަދަމުންދާ ކަމަށެވެ. އަޝްރަފް ވިދާޅުވީ މިމަސައްކަތަކީ ހޮސްޕިޓަލްގެ މުވައްޒަފުން އަމިއްލަ އިސްނެގުމުގެ މަތިން ފެށި މަސައްކަތެއް ކަމަށެވެ. އަދި މިމަސައްކަތްތައް ކުރިއަށް ގެންދިޔަ ކަމުގައި ވިޔަސް ހޮސްޕިޓަލްގެ ޚިދުމަތްތަކަށް ބުރޫ ނާރާނެ ކަމަށެވެ.
އަޝްރަފް ވިދާޅުވީ މާސްކް ފެހުމުގެ މަސައްކަތް ކުރަނީ މުއައްޒަފުން ބޭނުން ކުރަމުން އައި ފަހާފޮށްޓާއި އަމިއްލަ ފަރާތްތަކުން ބޭނުން ކުރުމަށް ދީފައިވާ ފަހާ ފޮށިތައް ބޭނުން ކޮށްގެން ކަމަށެވެ. ހޮސްޕިޓަލްގެ މީޓިން ރޫމްގައި މަސައްކަތް ކުރިއަށް ދާއިރު، މުއައްޒަފުންގެ ސަލާމަތާއި ރައްކާތެރި ކަމަށް ޚާއްސަ ސަމާލު ކަމެއް ދޭކަަން އަޝްރަފް ފާހަގަކުރެއްވިއެވެ.
މީގެ އިތުރުން އަޝްރަފް ވިދާޅުވީ މަސައްކަތް ކުރަނީ ވީހާ ވެސް މަދު މުއައްޒަފުން ނެރެގެން ކަމަށެވެ.
ހޮސްޕިޓަލްގެ މުއައްޒަފުން މާސްކް ފެހުމުގެ މަސައްކަތްތައް ކުރަނީ ހޮސްޕިޓަލްގެ ބަޖެޓުން ޚަރަދު ކޮށްގެންކަން ފާހަގަ ކުރައްވައި އަޝްރަފް ވިދާޅުވީ މި ކަމުގައި އާންމު ފަރުދުންގެ އެހީތެރިކަން ލިބޭ ކަމަށެވެ. އަދި މިއެހީގައި އާންމު ރައްޔިތުންނަށް މާސްކް ފަހައި ހިލޭ ބަހަމުންދާކަން އޭނާ ފާހަގަކުރެއްވިއެވެ.
އަޝްރަފް ވިދާޅުވީ މާސްކް ބެހުމުގައި ވެސް ފްރޮންޓްލައިންގައި މަސައްކަތް ކުރާ މީހުންނަށް ޚާއްސަ ސަމާލުކަމެއްދޭ ކަމަށެވެ. އެގޮތުން ދިއްދޫގައި ހަރަކާތްތެރިވާ ފުލުހުންނަށް މާސްކް ފޯރު ކޮށްދީފައި ވާކަން ފާހަގަ ކުރެއްވި އެވެ.
ދިއްދޫގައި މިހާރު ވަނީ ފުލޫ ކްލިނިކެއް ގާއިމް ކޮށްފައެވެ. ކޮވިޑް-19ގެ އެއްވެސް އަލާމާތެއް ފެނިއްޖެ ކަމަށްވާނަމަ ފުލޫ ކްލިންކްއަށް ދެއްކުމަށް ހޮސްޕިޓަލުން އިލްތިމާސް ކުރެއެވެ.
ހއ.އުލިގަމުން ކޮވިޑް-19އަށް އެކަކު ޕޮޒިޓިވްވެފައި ވުމާއެކު އެއަތޮޅުގައި ކޮވިޑް-19އަށް ރައްކާތެރިވުމުގެ އިތުރު ފިޔަވަޅުތައް ވަނީ އަޅާފައެވެ.
