ނުވަ ދުވަހަށް ފަހު ހޮސްޕިޓަލުން ގާސިމް ދޫކޮށްލައިފި
24 ޖުލައި 2017 | ހޯމަ 13:47ގާސިމް އެޑްމިޓްކުރީ މިމަހުގެ 16 ވަނަ ދުވަހު
ގާސިމް ހޮސްޕިޓަލުގައި އެޑްމިޓްކޮށްފައިވަނިކޮށް ހާލު ބެއްލެވުމަށް ރައީސް މައުމޫން ވަޑައިގެން
ނުވަ ދުވަސް ވަންދެން ފަރުވާ ދިނުމަށް ފަހު، ޖުމްހޫރީ ޕާޓީގެ ލީޑަރު ގާސިމް އިބްރާހިމް ހޮސްޕިޓަލުން ދޫކޮށްލައިފިއެވެ.
ރާއްޖެއެމްވީއަށް މައުލޫމާތު ލިބިފައިވާ ގޮތުގައި އޭޑީކޭ ހޮސްޕިޓަލުން ގާސިމް ދޫކޮށްލުމާއެކު މިހާރު އެމަނިކުފާނު ހުންނެވީ އެމަނިކުފާނުގެ ގެކޮޅުގައެވެ.
ގާސިމް ފުރަތަމަ އެޑްމިޓްކުރީ ޖުލައި 16 ވަނަ ދުވަހު މެޑިކާ ހޮސްޕިޓަލްގައެވެ. އިތުރު ފަރުވާ ހޯއްދެވުމަށް ގާސިމް ރާއްޖޭން ބޭރަށް ވަޑައިގަތުމަށް އެއާޕޯޓަށް ގެންގޮސްފައިވަނިކޮށް، އެމަނިކުފާނުގެ ޕާސްޕޯޓް ހިފަހައްޓައި، ރާއްޖެއިން ބޭރަށް ފުރުން ވަނީ މަނާކޮށްފައެވެ. އެއަށްފަހު ޤާސިމަށް ފަރުވާ ދީފައިވަނީ އޭޑީކޭ ހޮސްޕިޓަލްގެ އައިސީޔޫގައެވެ.
ހިތްޕުޅުގެ އާލާސްކަންފުޅެއްގައި ފަރުވާ ހޯއްދަވަމުން ގެންދަވާ ގާސިމް ރާއްޖޭން ބޭރަށް ގެންދިއުމުގެ ހުއްދަ ހޯދުމަށް ކްރިމިނަލް ކޯޓަށް ހުށަހެޅި ސިޓީތަކަށް ޖަވާބު ނުލިބިގެން ސުޕްރީމް ކޯޓުގެ ހުއްދައަކަށް އެދިވެސް ވަނީ ހުށަހަޅާފައެވެ.
ބޭސްފަރުވާއަށް ރާއްޖެއިން ބޭރަށް ވަޑައިގަތުމުގެ ހުއްދަ ނުދިން މައްސަލަ އެޗްއާރްސީއެމަށްވެސް ވަނީ ހުށަހަޅާފައެވެ.
ގާސިމް ހޮސްޕިޓަލުން ދޫކޮށްލާފައިވާއިރު، ރިޝްވަތު ހުށަހެޅުއްވި ކަމަށް ބުނެ އޭނާގެ މައްޗަށް ހިންގާ ޝަރީއަތުގެ އަޑުއެހުމެއް އަންގާރަ ދުވަހަށް ވަނީ ތާވަލުކޮށްފައެވެ.
