މަޖިލިސް: އާދަމް ޝަރީފް ހުށަހެޅުއްވި ކުއްލި މައްސަލަ މަޖިލީހަށް ބަލައިގެންފި
22 އެޕްރީލު 2020 | ބުދަ 07:39މައްސަލަ ބަލައިގަންނަން ނިންމީ 66 މެމްބަރުންގެ އިއްތިފާގުން
މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު
ކޮވިޑް-19 ރާއްޖޭގައި ފެތުރުމާއި ގުޅިގެން، މާލޭ ސަރަހައްދު ލޮކްޑައުން ކޮށްފައިވާތީ، މާލޭ ސަރަހައްދުގައި ހާލުގައި ޖެހިފައިވާ މީހުންގެ މައްސަލަ ސަރުކާރުގެ ސަމާލުކަމަށް ގެނައުމަށް، ރައްޔިތުންގެ މަޖިލީހަށް މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު، މިއަދު ރައްޔިތުންގެ މަޖިލީހަށް ހުށަހެޅުއްވުމުން، އެ މައްސަލައަށް ބަޙުސްކުރަން މަޖިލީހުން ބަލައިގެންފިއެވެ.
އާދަމް ޝަރީފް ހުށަހެޅުއްވި ކުއްލި މައްސަލާގައި މައިގަނޑުގޮތެއްގައި ވިދާޅުވެފައިވަނީ، މިދިއަ ބުދަ ދުވަހު މާލެއިން ކޮވިޑް-19 އަށް ޕޮޒިޓިވްވި މީހަކު ފެނުމާއެކު އެދުވަހުގެ މެންދުރުފަހު ފެށިގެން މާލެ ސަރަހައްދު ލޮކްޑައުން ކުރުމާއި ގުޅިގެން އެކިރަށްރަށުން މާލެއަށް އެކި ބޭނުންތަކުގައި އައިސްތިބި މީހުން މާލޭގައި ތާށިވެ، އަދި ކަނޑު ބޯޓު ފަހަރުތައް ފުރުން ވެސް މަނާކޮށްފައިވާ ކަމަށެވެ. އަދި މާލެ ލޮކްޑައުންކުރިއިރު، މާލޭގެ އެކި ގެސްޓްގައުސްތަކާއި ގޭތަކުގައި ވަގުތީގޮތުން ތިބި ފަރާތްތަކާއި މާލޭގައި މަގުމަތި ވެފައިވާތިބި ފަރާތްތަކާމެދު ސަރުކާރުން އަމަލުކުރަން ނިންމާފައިވާ ގޮތަކީ ކޮބައިތޯ ބެލުމަށާއި ސަރުކާރުގެ ސަމާލުކަން ގެނައުމަށް ހުށަހެޅި ކުއްލި މައްސަލަ އެކެވެ.
ޝަރީފް މި ކުއްލި މައްސަލަ މަޖިލީހަށް ބަލައިގަނެ، ބަހުސްކުރަން ފެންނަކަމަށް ނިންމީ ވޯޓުގައި ބައިވެރިވެވަޑައިގެންނެވި 66 މެމްބަރުންގެ އިއްތިފާގުން ނެވެ.
މިމައްސަލަ ޝަރީފް ހުށަހެޅުއްވިއިރު، ސަރުކާރުން ދަނީ މަގުމަތިވާ ފަރާތްތަކަށް އެހީތެރިކަން ފޯރުކޮށްދެމުންނެވެ. އަދި ކުލި ނުދެއްކިގެން އުޅެމުންދިޔަ ގެއިން ނެރުނު އާއިލާތަކަށް ވެސް ސަރުކާރުގެ ކަމާބެހޭ އިދާރާތަކުން ދަނީ އެހީތެރިކަން ފޯރުކޮށް ދެމުންނެވެ.
ސަރުކާރުން ވަނީ މިދަނޑިވަޅުގައި ކުލި ނުދެއްކިގެން ގެއިން ނުރެރުމަށް އިލްތިމާސްކޮށްފަ އެވެ.
އާދަމް ޝަރީފް ވިދާޅުވެފައިވަނީ، ކޮވިޑް-19 އާ ގުޅިހެން ރައްޔިތުންނަށް ކުރިމަތިވަމުންދާ މިފަދަ މައްސަލަތަކަށް މަޖިލީހުން އިސްކަން ދޭންޖެހޭކަމަށެވެ.
ރައްޔިތުންގެ މަޖިލީހުގެ ބުދަ ދުވަހުގެ ޖަލްސާގައި 73 މެމްބަރުން ބައިވެރިވެވަޑައިގެންނެވި އެވެ. ބުދަ ދުވަހުގެ ޖަލްސާވެސް ކުރިއަށް ގެންދަވަނީ ވީޑިއޯ ކޮންފަރެންސް މެދުވެރިކޮށެވެ.
