ކޮވިޑް-19 ގެ ސަބަބުން 265 މިލިއަނެއްހާ މީހުން ބަނޑުހައިހޫނުކަމާ ކުރިމަތިލާނެކަމަށް އދ އިން ބުނެފި

ދުނިޔޭގެ އެކި ކަންކޮޅުތަކުގައި ހަލުވިކަމާއެކު ފެތުރެމުންދާ ނުރައްކާތެރި ނޮވެލްކޮރޯނާ ވައިރަސް (ކޮވިޑް-19) ގެ ސަބަބުން ދުނިޔޭގެ 265 މިލިއަނެއްހާ މީހުން ބަނޑުހައިހޫނުކަމަށް ޖެހިދާނެ ކަމަށް އދ އިން އަންދާޒާކޮށްފިއެވެ.

ޔުނައިޓެޑް ނޭޝަންސް ވާރލްޑް ފުޑް ޕްރޮގްރާމް (ޑަބްލިއުއެފްޕީ) އާ ޙަވާލާދީ އަލްޖަޒީރާގައި ރިޕޯޓްކޮށްފައިވާގޮތުން ކޮވިޑް-19 ގެ ސަބަބުން ޤައުމުތަކުގެ އިޤްތިސާދަށް އަންނަމުންދާ ލޮޅުންތަކުގެ ސަބަބުން ބަނޑުހައިހޫނުކަމުގެ ނިސްބަތް ދެގުނައަށް އިތުރުވެގެންދާނެ ކަމަށް ބެލެވެއެވެ. އެގޮތުން ދުނިޔޭގެ 55 ޤައުމަކުން މިހާރުވެސް 135 މިލިއަނެއްހާ މީހުން ބަނޑުހައިހޫނުކަމުގައި ދިރިއުޅެމުންދާއިރު، މި އަހަރު ނިމޭއިރު މި އަދަދު 265 މިލިއަނަށް އަރާނެކަމަށް އަންދާޒާ ކުރެވޭކަމަށް އދ އިން އަންގާރަ ދުވަހު އާންމުކުރި ރިޕޯޓަކާ ޙަވާލާދީ އަލްޖަޒީރާގައި ރިޕޯޓްކޮށްފައިވެއެވެ.

އަންގާރަ ދުވަހު ޖެނީވާގައި ބޭއްވި ވާރޗުއަލް ބައްދަލުވުމެއްގައި އެކަމާ ގުޅޭގޮތުން ވާހަކަދައްކަވަމުން ޑަބްލިއުއެފްޕީގެ ޗީފް އިކޮނޮމިސްޓް އާރިފް ހުސައިން ވިދާޅުވީ، މިހާރާލައިގެން ޤައުމުތަކުން އަވަސް ފިޔަވަޅުތަކެއް އަޅަންޖެހޭ ކަމަށެވެ. އަދި ދިރިއުޅުމުގެ އާންމު ޙާލަތު ދަށް އާބާދީތައް ގިނަ ޤައުމުތައް އެކަމަށް ޙާއްސަ ސަމާލުކަމެއް ދޭންޖެހޭކަން އޭނާ ފާހަގަކުރެއްވިއެވެ.

ބަނޑުހައިހޫނުކަމުގެ ގެއްލުން ވަޒަން ކުރުމަށް އދ އިން 5 ދަރަޖައެއް ގެންގުޅޭއިރު، އެ ޖަމިއްޔާއިން ލަފާކުރާ ގޮތުގައި ދުނިޔޭގެ ބޮޑު އާބާދީތަކަކަށް 3 ވަނަ ދަރަޖައިގައި ބަނޑުހައިހޫނުކަމާ ކުރިމަތިލާން ޖެހިދާނެއެވެ. އޭގެ ތެރެއިން އެންމެ ނުރައްކާތެރި ދަރަޖައަކީ 5 ވަނަ ދަރަޖަކަން ފާހަގަކޮށް އދ އިން ބުނީ، ބަނޑުހައިހޫނުކަމުގެ އަސަރު އެންމެ ބޮޑަށް ކުރާނީ އެފްރިކާފަދަ ފަޤީރު ނިސްބަތް ގިނަ ޤައުމުތަކަށް ކަމަށް ލަފާ ކުރެވޭ ކަމަށެވެ.

މިކަންކަމުން އަރައިގަތުމަށް ޤައުމުތަކަށް އެހީތެރިވުމުގެ ގޮތުން 10 ބިލިއަން އެމެރިކާ ޑޮލަރު ބޭނުންވާނެ ކަމަށް ޑަބްލިއުއެފްޕީން ވަނީ ބުނެފައެވެ.