ޖޫން މަހު ފްރެންޗު ލީގު ފަށަން މަސައްކަތް ކުރަނީ

ކޮރޯނާވައިރަސް (ކޮވިޑް-19) އާ ގުޅިގެން މެދުކަޑާލާފައިވާ ފްރެންޗް ލީގުގެ ކުޅުން ޖޫން މަހުގެ 17 ވަނަ ދުވަހު ފަށަން ފްރާންސްގެ ޕްރޮފެޝަނަލް ފުޓްބޯލް ލީގު (އެލްއެފްޕީ) އިން މަސައްކަތް ކުރަމުން އަންނަ ކަމަށް ރިޕޯޓުތައް ބުނެފި އެވެ.

ކޮވިޑް-19 އާ ގުޅިގެން ފްރާންސްގެ ލީގު 1 އާއި ލީގު 2 ގެ ކުޅުން މެދުކަނޑާލީ މިދިޔަ މާޗު މަހުގެ 13 ވަނަ ދުވަހު އެވެ.

ރިޕޯޓުތައް ބުނާ ގޮތުން އެލްއެފްޕީން މަސައްކަތް ކުރަމުން އަންނަނީ ޖޫން މަހުގެ 17 ވަނަ ދުވަހު ލީގުގެ ކުޅުން އަލުން ފެށުމަށްފަހު، ޖުލައި މަސް ނިމުމުގެ ކުރިން ދެ ލީގުގެ ކުޅުން ނިންމާލުމަށެވެ. އެކަމަކު ލީގުގެ ކުޅުން ކުރިއަށްދާނީ ސަޕޯޓަރުން ވައްދައިގެން ކަމެއް ނުވަތަ ނުވައްދާ ކަމެއް އަދި ނިންމާފައެއް ނުވެއެވެ.

މީގެ ކުރިން ޔުއެފާއިން ވަނީ އެ އިދާރާގެ ހުއްދަ ނުހޯދައި މި ސީޒަނުގެ އެއްވެސް ލީގެއް ކެންސަލް ނުކުރަން އަންގާފައެވެ. އެއާއެކު ޔޫރަޕްގެ ގަދަ ފަސް ލީގުންވެސް އަންނަނީ ލީގުގެ ކުޅުން އަލުން ފެށުމާ ގުޅޭގޮތުން މަޝްވަރާ ކުރަމުންނެވެ.

ކޮވިޑް-19 ގެ އަސަރު ފްރާންސަށްވެސް ކޮށްފައިވާއިރު، އެ ގައުމުން މިހާތަނަށް 155،000 އަށްވުރެ ގިނަ މީހުން ވަނީ މި ވައިރަހަށް ޕޮޒިޓިވްވެފައެވެ. އަދި އެ ގައުމުން މިހާތަނަށް ކޮވިޑް-19 ޖެހިގެން 20،000 އަށްވުރެ ގިނަ މީހުން ވަނީ މަރުވެފައެވެ.

ފްރެންޗު ލީގުގެ ކުޅުން ޖޫން މަހު ފަށަން މަސައްކަތް ކުރަމުން އަންނައިރު، މިއަހަރުގެ ހޫނު މޫސމުގައި ބެއްވުމަށް ހަމަޖެހިފައިވާ ޔޫރޯ ފުޓްބޯޅަ މުބާރާތާއި ކޮޕާ އެމެރިކާ ފުޓްބޯޅަ މުބާރާތުގެ އިތުރުން އޮލިމްޕިކް ގޭމްސް ވަނީ އަންނަ އަހަރަށް ފަސްކޮށްފައެވެ. އެހެންކަމުން މެދުކަނޑާލާފައިވާ ލީގުތަކުގެ މެޗުތައް ހޫނު މޫސުމުގައި ކުރިއަށް ގެންދިޔުމުގެ ފުރުސަތު ލިބޭނެއެވެ.