ކޭމްޕް ނޯ ގެ ނަން ސްޕޮންސަރަށް ވިއްކާލައިގެން ލިބޭ ފައިސާ ކޮރޯނާވައިރަހުގެ ފަންޑަށް

ކޮރޯނާވައިރަސް (ކޮވިޑް-19) އާ ދެކޮޅަށް ކުރާ މަސައްކަތަށް އެހީވުމުގެ ގޮތުން ކޭމްޕް ނޯ ސްޓޭޑިއަމްގެ ނަން ސްޕޮންސަރަށް ވިއްކާލައިގެން ލިބޭ ފައިސާ ހަދިޔާކުރަން ބާސެލޯނާ އިން ނިންމައިފި އެވެ.

1957 ވަނަ އަހަރު ކެޓަލޫނިއާ ސަރަހައްދުގައި ގާއިމުކުރި ބާސެލޯނާގެ ކޭމްޕް ނޯ ސްޓޭޑިއަމްގެ ނަން މިހާތަނަށް ބަދަލުކޮށްފައެއް ނުވެއެވެ.

އެކަމަކު ކޮވިޑް-19 އާ ދެކޮޅަށް ކުރާ މަސައްކަތަށް އެހީވުމުގެ ގޮތުން ބާސާއިން ވަނީ ކުރިއަށް އޮތް ސީޒަނަށް ކޭމްޕް ނޯ ގެ ނަން ސްޕޮންސަރަށް ވިއްކަން ނިންމާފައެވެ. އެގޮތުން ސްޕޮންސަރެއް ހޯދުމަށް ބާސާ ފައުންޑޭޝަނަށް އެކަން ވަނީ ހަވާލުކޮށްފައެވެ.

ބާސާއިން ނެރުނު ބަޔާނެއްގައި ބުނެފައިވަނީ ކޭމްޕް ނޯ ގެ ނަން ސްޕޮންސަރަށް ވިއްކައިގެން ލިބޭ ހުރިހާ ފައިސާ ކޮވިޑް-19 އާ ދެކޮޅަށް ކުރާ މަސައްކަތަށް އެހީވުމަށް ހަދިޔާކުރަން ނިންމާފައިވާ ކަމަށެވެ. އެގޮތުން މި ފައިސާ ޚަރަދުކުރާނީ ކޮވިޑް-19 އާ ގުޅޭގޮތުން ދުނިޔޭގައި ކުރިއަށްގެންދާ ހޯދުންތަކަށް މާލީ ގޮތުން އެހީވުމަށް ކަމަށެވެ.

ބާސާއިން މުޅިން އަލަށް އެ ކްލަބުގެ ކޭމްޕް ނޯ ގެ ނަން ސްޕޮންސަރަށް ވިއްކަން ނިންމިއިރު، އެ ކްލަބުގެ ޖާރޒީ އެންމެ ފުރަތަމަ ސްޕޮންސަރަކަށް ވިއްކާފައިވަނީ 2010 ވަނަ އަހަރު ގަތަރު ފައުންޑޭޝަނަށެވެ. އެކަމަކު 2006 ވަނަ އަހަރުން ފެށިގެން ބާސާއިން އަންނަނީ އެ ކްލަބުގެ ޖާރޒީގައި ޗެރިޓީގެ ދަށުން ޔުނިސެފްގެ ނަން ހިމަނަމުންނެވެ.

ކޮވިޑް-19 ގެ އަސަރު ޔޫރަޕްގެ ބޮޑެތި ކްލަބުތަކަށްވެސް ކުރަމުން އަންނައިރު، މީގެ ކުރިން ބާސެލޯނާއިން ވަނީ ކުޅުންތެރިންގެ އެދުމުގެ މަތިން، ކުޅުންތެރިންގެ މުސާރައިން 70 އިންސައްތަ އުނިކުރަން ނިންމާފައެވެ.