ބޭރަށް ވަޑައިގަންނަވާނަމަ، މާސްކް އަޅުއްވާ
21 އެޕްރީލު 2020 | އަންގާރަ 06:51ރައްކާތެރި ކަމުގެ ގޮތުން ގިނަ ބަޔަކު ދަނީ މިހާރުވެސް މާސްކް އަޅަމުން
މާލެ މަގުމަތީގައި މީހަކު މާސްކް އަޅައިގެން
ރާއްޖޭގައި ކޮވިޑް-19 ފެތުރެމުންދާ މިދަނޑިވަޅުގައި އެއްވެސް ބޭނުމެއްގައި ބޭރަށްދާނަމަ މާސްކު އެޅުމަށް ޓެކްނިކަލް އެޑްވައިޒަރީ ގްރޫޕް(ޓެގް) އިން އިލްތިމާސް ކޮށްފިއެވެ.
ހޯމަ ދުވަހުގެރޭ ނެޝަނަލް އިމަރޖެންސީ ސެންޓަރުގައި ބޭއްވި ނޫސްވެރިންގެ ބައްދަލުވުމައި ޓެގް ގައި ހިމެނިވަޑައިގަންނަވާ ޑރ. އަލީ ލަތީފް ވިދާޅުވީ، މީގެ ކުރިން މާސްކް އެޅުން އެއީ މުހިއްމު ކަމެއް ނޫން ކަމަށް ވިދާޅުވީ، މާލެއިން ކޮވިޑް-19 ގެ ކޭސްތަކެއް ފެނިފައިނުވާތީ ކަމަށެވެ.
ނަމަވެސް މިހާރު ބޭރަށްދާނަމަ މާސްކް އެޅުން އެއީ މުހިއްމު ކަމެއްކަން ޑރ. އަލީ ލަތީފް ވިދާޅުވިއެވެ.
ޑރ. އަލީ ލަތީފް ވަނީ ހުރިހާ ފަރާތްތަކަކުންވެސް ގޭގައި މަޑުކުރަން އިލްތިމާސް ކުރައްވާފައެވެ.
ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިންވެސް ވަނީ ބަލީގެ އަލާމާތްތައް ހުންނަ ފަރާތްތައް އެކަނި މާސްކު އެޅުމަށް ދިން ލަފާ އަނބުރާ ގެންގޮސްފައެވެ. އަދި ބައެއް ގައުމުތަކުން، ހާއްސަކޮށް ވައިރަސް ކޮންޓްރޯލް ކުރުމުގައި ކުރި ހޯދާފައިވާ ގައުމުތަކުން ވަނީ މާސްކު އެޅުމަށް މަޖްބޫރު ކޮށްފައެވެ.
