ފާއިތުވި ދުވަސްތަކުގައި ބާޒާރު ލިލީ އަދި މާފަންނު އިހުސާން ފިހާރައަށް ދިޔަ މީހުން ރިޕޯޓުކުރުމަށް އެދިއްޖެ
20 އެޕްރީލު 2020 | ހޯމަ 19:10މި މަހުގެ 13 އަދި 14 ވަނަ ދުވަހުގެ 8 ން ހަވީރު 6 އަކަށް ލީލީ ސްޓޯރ އަށް ދިޔަ ފަރާތްތައް ރިޕޯޓު ކުރުމަށް
ޑރ. ނަޒްލާ ރަފީގް ނޫސްވެރިންގެ ބައްދަލުވުމުގައި
ފާއިތުވި ދުވަސްތަކުގައި މާލޭގެ ބަނދަރު މަތީގައި ހުންނަ ލިލީ ސްޓޯރ އަދި މާފަންނު އިހުސާން ފިހާރައަށް ދިޔަ މީހުން ހެލްތު ޕްރޮޓެކްޝަން އޭޖެންސީ (އެޗްޕީއޭ) އަށް ރިޕޯޓު ކުރުމަށް އިލްތިމާސްކޮށްފިއެވެ.
ހޯމަ ދުވަހުގެރޭ ނެޝަނަލް އިމަރޖެންސީ ސެންޓަރ (އެންއީއޯސީ)ން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. ނަޒްލާ ވިދާޅުވީ ކޭސް 55 އަކީ ބާޒާރު ލީލީ ސްޓޯރގައި މަސައްކަތް ކުރާ މީހެއް ކަމަށްވާތީ އެމީހާއާއި އިތުރު ފަރާތްތަކެއް ބައްދަލުވެފައި ހުންނާނެ ކަމަށެވެ. އޭނަގެ ކޮންޓެކްޓް ޓްރޭސިންގެ މަސައްކަތް ކުރަމުންދާކަން ފާހަގަކުރައްވާ ޑރ ވަނީ މި މަހުގެ 13 އަދި 14 ވަނަ ދުވަހުގެ 8 ން ހަވީރު 6 އަކަށް ލީލީ ސްޓޯރ އަށް ދިޔަ ފަރާތްތައް ރިޕޯޓު ކުރުމަށް އެދިވަޑައިގެންފައެވެ. އަދި މި މަހުގެ 15 ވަނަ ދުވަހުގެ ހެނދުނު 8 ން ހަވީރު ހަތަރަކަށް އެފިހާރައަށް ދިޔަ ފަރާތްތައްވެސް ރިޕޯޓު ކުރުމަށް އެދިވަޑައިގެންފައެވެ.
މީގެ އިތުރުން، ކޭސް 59 އަދި 60 އަކީ މާފަންނު އިހުސާން ފިހާރައާއި ގުޅިފައިވާ ކޭސްތަކެއްކަން ފާހަގަކުރައްވާ ޑރ. ނަޒްލާ ވިދާޅުވީ އެ ދެ މީހުން ޑެލިވަރީ ކުރުމުގައިއާއި މާފަންނު އިހުސާން ފިހާރައިގައިވެސް މަސައްކަތްކުރައްވާ ކަމަށެވެ. އެގޮތުން މި މަހުގެ 15، 16 އަދި 17 ވަނަ ދުވަހު މާފަންނު އިހުސާން ފިހާރައަށް ދިޔަ ހުރިހާ ފަރާތްތައް އެޗްޕީއޭ އަށް ރިޕޯޓުކުރުމަށް ވަނީ އިލްތިމާސްކުރައްވާފައެވެ.
ޑރ ނަޒްލާ ވިދާޅުވީ ލޮކްޑައުންކުރުމުގެ ދެތިން ދުވަސް ކުރިން ޓެސްޓުކޮށްގެން ޕޮޒިޓިވްވި މީހުންވެސް އެބަތިބި ކަމަށެވެ. އެގޮތުން ފަހުން ފެނުނު ކޭސްތަކަށް ބަލާއިރު ކޮންޓެކްޓްތައް ވަރަށް މަދުކަން ފާހަގަކުރެވިފައިވާކަމަށާއި ކޮންޓެކްޓުން ގިނަ ކަމަށް ފާހަގަކުރެވުނީ ކުންފުނިތަކާއި ފިހާރަތަކުގައި މަސައްކަތްކުރާ މީހުން ކަމަށެވެ. އަދި މިހާރު ވެސް މީހުންނާއި ބައްދަލުވާ މިންވަރު މަދުކުރެވިއްޖެ ނަމަ ބައްޔަށް ހުށަހެޅޭ މީހުންގެ އަދަދު ވަރަށް ބޮޑަށް މަދުވާނެކަމަށެވެ.
