ރަމަޟާން މަހު ދެމުން ގެންދިޔަ ދީނީ ނަސޭހަތް މިއަހަރުވެސް ދެމުންގެންދާނަން: ރައީސް މައުމޫން
ކޮވިޑް-19 ފެތުރެމުންދިޔުމާއެކު މިހާރު ގިނަ ބަޔަކު އެއްތާކަށް އެއްވެގެން އެފަދަ ޕްރޮގްރާމެއް ކުރިޔަށް ގެންދިޔުމުގެ ފުރުސަތެއް ނެތް
ރައީސް މައުމޫން
ކޮންމެ އަހަރެއްގެވެސް ރަމަޟާން މަހާ ދިމާކޮށް ކުރީގެ ރައީސް އަލްއުސްތާޛު މައުމޫން އަބްދުލްޣައްޔޫމް ކުރިޔަށް ގެންދަވާ ރަމަޟާން މަހުގެ ރޭތައް އިހުޔާ ކުރުމުގެ ޕްރޮގްރާމް މިއަހަރު ކޮވިޑް-19 އާއި ގުޅިގެން ކުރިން ބާއްވަމުން އައި ގޮތަށް ނުބޭއްވޭނެތީ ދީނީ ނަސޭހަތް ފޯރުކޮށްދޭނެ ގޮތްތަކެއް ހޯއްދަވަމުން ގެންދަވާކަމަށް ރައީސް މައުމޫން ވިދާޅުވެއްޖެ އެވެ.
ކޮވިޑް-19 އާ ގުޅިގެން ރާއްޖެޓީވީން ކުރިޔަށް ގެންދާ ޚާއްސަ ކަވަރޭޖަށް ދެއްވި އިންޓަރވިއުގައި ވާހަކަ ދައްކަވަމުން ރައީސް މައުމޫން ވިދާޅުވީ ކުރިން ރަމަޟާން މަހު ޖަލްސާތައް ބާއްވައިގެން ދީނީ މައުލޫމާތު ރައްޔިތުންނަށް ފޯރުކޮށްދިނުމަށް މަސައްކަތްކޮށްފައިވާނެ ކަމަށެވެ. ނަމަވެސް މިހާރު ރާއްޖޭގައި ހަލުވިކަމާއެކު ކޮވިޑް-19 ފެތުރެމުންދިޔުމާއެކު މިހާރު ގިނަ ބަޔަކު އެއްތާކަށް އެއްވެގެން އެފަދަ ޕްރޮގްރާމެއް ކުރިޔަށް ގެންދިޔުމުގެ ފުރުސަތެއް ނެތްކަމަށެވެ.
އެހެންކަމުން މިހާރުވެސް ބައެއް ދީނީ އިލްމުވެރިން ޓެކްނޮލޮޖީގެ ބޭނުންކުރައްވައިގެން ދީނީ ނަސޭހަތް ދެމުންގެންދަވާ ގޮތަށް އެކަން ކުރުމުގެ ވިސްނުން ގެންގުޅުއްވާކަމަށް ރައީސް މައުމޫން ވިދާޅުވި އެވެ.
ރައީސް މައުމޫން ވިދާޅުވީ ރަމަޟާން މަހަކީ ހަގީގަތުގައި އަޅުކަމުގެ މަހެއް ކަމަށެވެ. އެހެންކަމުން އެއްގޮތަކަށްވެސް މާގިނައިން ކާބޯތަކެތި ބޭނުންކުރުމުގެ ބަދަލުގައި ސިއްހީ ގޮތުންވެސް އެކަން އޮންނަގޮތަށް އެކަންކަން ކުރެއްވުމަށް އިލްތިމާސްކުރައްވާ ކަމަށެވެ. އަދި ރަމަޟާން މަހަކީ އެންމެން އެކުވެރިވެގެން އުޅެނެޖްހޭ މަހެއްކަމަށާއި އެންމެންގެ މެދުގައި ލޯތްބާއި އުހުއްވުއްތެރިކަން އުފެދިފައި އޮންނަންޖެހޭނެ ކަމަށެވެ. އަދި ހުރިހާ އެންމެންވެސް ގުޅިގެން މަސައްކަތްކޮށްގެން މަހުގެ ބަރަކާތާއި ދަރުމަ ހޯދުމަށް މަސައްކަތްކުރުމަށް ރައީސް މައުމޫން އިލްތިމާސްކުރެއްވި އެވެ.
މީގެއިތުރުން ޚަރަދުކުޑަކޮށް ކަންކަން ކުރުމަށާއި ހުރިހާ އެންމެންވެސް އެހީތެރިކަން ފޯރުކޮށްދީ ދީލަތިކަން އިސްކުރުމަށް އެދިވަޑައިގަންނަވާ ކަމަށް ރައީސް މައުމޫން ވިދާޅުވި އެވެ.
