ފުލުހުން ކޮތަރުތަކަށް ކާންވެސް އެބަދޭ، ލޭވެސް ހަދިޔާކުރޭ: ސީޕީ
ފުލުހުން ދަނީ ކޮތަރުތަކަށް ކާންދެމުން
ފުލުހުން ލޭ ހަދިޔާކުރަނީ، މި ދަނޑިވަޅުގައި ކޮތަރުތަކަށްވެސް ކާން އެބަދޭ
މާލެއިން ކޮވިޑް-19 ފެނުމާއި ގުޅިގެން ލޮކްޑައުން ކޮށްފައިވާ މި ދަނޑިވަޅުގައި ފުލުހުން ލޭ ހަދިޔާ ކުރަމުންދާ ކަމަށް ކޮމިޝަނަރ އޮފް ޕޮލިސް މުހައްމަދު ހަމީދު ވިދާޅުވެއްޖެއެވެ.
ލޮކްޑައުން ކުރުމާއި ގުޅިގެން މޯލްޑިވިއަން ބްލަޑް ސާވިސެސް (އެމްބީއެސް) އަށް ލޭ ހަދިޔާކުރާ މީހުން ވަނީ މަދުވެފައެވެ. މިކަމާއި ގުޅިގެން ސީޕީ ކުރެއްވި ޓުވީޓެއްގައި ވިދާޅުވީ ފުލުހުން ލޭ ހަދިޔާކުރުމުގެ މަސައްކަތުގައިވެސް ބައިވެރިވަމުން އަންނަ ކަމަށެވެ.
ކޮވިޑް-19 އާއި ގުޅިގެން ރިސޯޓުތަކުގައި ހިންގާ ބްލަޑް ޑޮނޭޝަން ކޭމްޕުތައް ހުއްޓުމާއި ގުޅިގެން ލޭ ހަދިޔާ ކުރާ މީހުންގެ އަދަދު ވަނީ މަދުވެފައެވެ. އެމްބީއެސް އިން މީގެކުރިން ބުނެފައިވަނީ އެންމެ ގިނައިން ލޭ ހަދިޔާ ކުރަނީ ރިސޯޓު މުވައްޒަފުން ކަމަށެވެ.
މީގެ އިތުރުން ސީޕީ ވިދާޅުވީ މި ދަނޑިވަޅުގައި ކޮތަރުތަކަށްވެސް ކާންދެމުންދާ ކަމަށެވެ. ލޮކްޑައުން ކުރުމާއި ގުޅިގެން މާލޭގެ ޖުމްހޫރީ މައިދާނަށް އެއްވާ ކޮތަރުތަކަށް ކާންދޭނެ ބަޔަކު ނުވެ، ކޮތަރުތައް ދަނީ މަރުވަމުންނެވެ. މިކަމާއި ގުޅިގެން އާއްމުންގެ ގިނަ ބަޔަކު ދަނީ ސޯޝަލް މީޑިއާގައި ކަންބޮޑުވުން ފާޅުކުރަމުންނެވެ.
ލޮކްޑައުން ތަންފީޒު ކުރުމަށްޓަކައި ފުލުހުން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މަގުތައް މޮނީޓަރ ކޮށް ލޮކްޑައުންއާއި ޚިލާފުވާ ފަރާތްތައް ފުލުހުންގެ ބެލުމުގެ ދަށަށް ގެންގޮސް، ޖޫރިމަނާ ވެސް ދަނީ ކުރަމުންނެވެ.
