ހަތަރު މަހުގެ މުސާރަ ނުނަގަން ރޯމާގެ ކުޅުންތެރިން ނިންމައިފި

މިހާރު ދުނިޔޭގައި ހަލުވިކަމާއެކު ފެތުރެމުންދާ ކޮރޯނާވައިރަސް (ކޮވިޑް-19) ގެ ސަބަބުން ދިމާވާ މާލީ ގޮންޖެހުންތަކުން ސަލާމަތްވުމަށް، އިޓަލީގެ ރޯމާގެ ކުޅުންތެރިން ކުރިއަށް އޮތް ހަތަރު މަހުގެ މުސާރަ ނުނަގަން ނިންމައިފި އެވެ.

ކޮވިޑް-19 އާ ގުޅިގެން އިޓާލިއަން ލީގުގެ މެޗުތައްވެސް މުއްދަތެއް ނެތް ގޮތަށް ފަސްކޮށްފައިވާއިރު، އެކި ކްލަބުތަކަށް މާލީ ގޮތުން ވަނީ ގޮންޖެހުންތަކަކާ ކުރިމަތިލާން ޖެހިފައެވެ. އެހެންކަމުން ކުރިއަށް އޮތް ހަތަރު މަހުގެ މުސާރަ ނުނަގަން ރޯމާގެ ކުޅުންތެރިންގެ އިތުރަށް އެޓީމުގެ ކޯޗު ޕައުލޯ ފޮންސޭކާ ނިންމީ، އެ ކްލަބުން ނޯޕޭ ލީވްއަށް ފޮނުވަން ނިންމާފައިވާ ބައެއް މުވައްޒަފުންގެ މުސާރަތަށް ކަށަވަރުކުރުމުގެ ގޮތުންނެވެ.

ރޯމާގެ ޗީފް އެގްޒެކްޓިވް ހުއީޑޯ ފިއެންގާ ވަނީ މި ނިންމުމަށް މަރުހަބާ ކިޔާފައެވެ. އޭނާ ވިދާޅުވީ ރޯމާއިން އަބަދުވެސް ފެންނާނީ އެއްބައިވަންތަކަމުގެ މަންޒަރު ކަމަށާއި، ކުޅުންތެރިންގެ ފަރާތުން މި ފެނިގެންދިޔައީ ވަރަށް މުހިއްމު ސިފައެއް ކަމަށެވެ.

ހަތަރު މަހުގެ މުސާރަ ނުނަގަން ރޯމާގެ ކުޅުންތެރިން ނިންމިއިރު، މީގެ ކުރިން ޔުވެންޓަސްގެ ކުޅުންތެރިންނާއި ކޯޗު މައުރީޒިއޯ ސާރީ ވަނީ ހަތަރު މަހުގެ މުސާރަ ނުނަގަން ނިންމާފައެވެ. މި މުއްދަތުގައި ޔުވެންޓަސްއަށް 90 މިލިއަން ޔޫރޯ ރައްކާކުރެވޭނެ ކަމަށް ރިޕޯޓުތައް ބުނެ އެވެ.

ކޮވިޑް-19 އާ ގުޅިގެން ޔޫރަޕްގެ އެކި ކްލަބުތަކަށް މާލީ ގޮތުން ގޮންޖެހުންތަކާ ކުރިމަތިލާން ޖެހިފައިވާއިރު، މީގެ ކުރިން ސްޕެއިންގެ ބާސެލޯނާ އާއި ރެއާލް މެޑްރިޑްގެ ކުޅުންތެރިން ވަނީ މުސާރަ ކުޑަކުރަން ނިންމާފައެވެ. އަދި ޖަރުމަނުގެ ބޮރޫޝިއާ މޮންޗެންގްލަޑްބެކް އާއި ޔޫނިއަން ބާލިންގެ ކުޅުންތެރިން މުސާރަ އެއްވެސް ގޮތަކަށް ނުނަގަން ނިންމާފައިވާއިރު، ބަޔާން މިޔުނިކާއި ބޮރޫޝިއާ ޑޯޓްމުންޑްގެ ކުޅުންތެރިން ވަނީ މުސާރަ ކުޑަކުރަން ނިންމާފައެވެ. މިހާތަނަށް އިނގިރޭސި ޕްރިމިއާ ލީގުން ކުޅުންތެރިންގެ މުސާރަ ކުޑަކޮށްފައިވަނީ ސައުތެމްޓަނާއި ވެސްޓް ހޭމް ޔުނައިޓެޑުން އެކަންޏެވެ.