ރޯދަ މަހުވެސް، ލޮކްޑައުން ކޮށްފައިވާނަމަ، މިސްކިތުގައި ޖަމާއަތް ނުހެދޭނެ: އިސްލާމިކް މިނިސްޓަރު
މޮނީޓަރިންގ ހާލަތުގައި އަދި ލޮކްޑައުން ހާލަތުގައި މިސްކިތުގައި ޖަމާއަތް ނުހެދޭނެ
އިސްލާމިކް މިނިސްޓްރީން މީގެކުރިން ބޭއްވި ނޫސްވެރިންގެ ބައްދަލުވުމެއްގެ ތެރެއިން
ކޮވިޑް-19 ރާއްޖޭގައި ފެތުރެން ފެށުމާއެކު، މާލެ ސަރަހައްދު ލޮކްޑައުންކޮށް، އަދި އެއްރަށުން އަނެއް ރަށަށް ދިއުން މަނާކޮށްފައިވާއިރު، ރަށްރަށުގެ ހާލަތަށް ރިޔާއަތްކޮށް ޖަމާއަތުގައި ނަމާދުކުރުން ވަގުތީ ގޮތުން މެދުކަނޑާލަން އަންގަމުންދާނެ ކަމަށް އިސްލާމިކް މިނިސްޓަރު ޑރ. އަހުމަދު ޒާހިރު އަލީ ވިދާޅުވެއްޖެ އެވެ.
ރާއްޖެޓީވީން ގެނެސްދޭ "ކޮވިޑް-19 ކަވަރޭޖް"އަށް ފޯނުން މައުލޫމަތު އިސްލާމިކް މިނިސްޓަރު ޒާހިރު ވިދާޅުވީ، ރަށްރަށުގެ ހާލަތު ބެލުމުގައި އަދި ޖަމާއަތުގައި ނަމާދު ނުކުރުމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން އިސްލާމިކް މިނިސްޓްރީއަށް އިރުޝާދު ދެއްވައިފިނަމަ، އެގޮތަށް އަމަލު ކުރައްވާނެ ކަމަށެވެ.
މިނިސްޓަރ ޒާހިރު ވިދާޅުވީ، މާލެ ސަރަހައްދުގައި މިހާރު މިއޮތް ހާލަތުގައި ރޯދަމަސް ފެށޭއިރުވެސް މިސްކިތުގައި ޖަމާއަތެއް ކުރިއަށް ނުގެންދެވޭނެ ކަމަށެވެ. ނަމަވެސް މިނީޓަރިންގ ނުވަތަ ލޮކްޑައުން ހާލަތުގައި ނުވާ ރަށްރަށުގައި މިސްކިތްތަކުގައި ޖަމާއަތުގައި ނަމާދު ކުރަމުންދާނެ ކަމަށެވެ.
މިނިސްޓަރު ޒާހިރު ވިދާޅުވީ، ޖަމާއަތުގައި ނަމާދު ކުރެވޭ މިސްކިތްތަކުގައި މިހާރުވެސް ކޮންމެ ފަރުޟު ނަމާދެއްގައި ޤުނޫތު ނާޒިލާ ކިޔަމުންދާނެ ކަމަށެވެ. އަދި މިސްކިތްތަކުގައި ޖަމާއަތް ނެހެދޭ ރަށްރަށުގައި ވެސް ގޭގައި ތިއްބަވައިގެން، ވެސް ފަރުޟު ފަސް ނަމާދު ބަރާބަރަށް އަދާކުރުމަށާއި، ސުންނަތް ނަމާދު ގިނަކޮށް، ގިނަގިނައިން ދުޢާކޮށް، އިސްތިޣްފާރު ކުރުމަށް ހުރިހާ ރައްޔިތުންނަށް ނަޞޭޙަތްތެރިވުމަށް އިސްލާމިކް މިނިސްޓްރީން ވަނީ ވަޞިއްޔަތްކުރައްވާފައެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރާއްޖޭގައި ފެތުރެމުންދާތީ، މިހާލަތަށް ރިޔާއަތްކޮށް، އިތުރަށް މިވައިރަސް ރާއްޖޭގައި ފެތުރުން ހުއްޓުވުމަށްޓަކައި އަޅާ ރައްކާތެރިކަމުގެ މުހިއްމު ފިޔަވަޅެއްގެ ގޮތުން، އިސްލާމީ ފަތުވާދޭ އެންމެ މަތީ މަޖިލީހާއި ދީނީ އިލްމުވެރިންގެ ލަފާގެ މަތިން، މިދިއަ މާރޗު މަހުގެ 18 ވަނަ ދުވަހުގެ މެންދުރު ނަމާދުން ފެށިގެން، މާލެ، ހުޅުމާލެ، ވިލިމާލެ، އަދި ސަރުކާރުން ފޭބުން މަނާކުރާ ހުރިހާ ރިސޯޓްތަކެއްގައި ފަރުޟު ނަމާދާއި ހުކުރު ނަމާދުގެ ޖަމާއަތް މިސްކިތުގައި ނުހެދުމަށް ނިންމާފައި ވެއެވެ. އެގޮތުން މާލެ ސަރަހައްދާއި އަރާފޭބުން މަނާ ކޮށްފައިވާ ރިސޯޓުތަކުން ޖަމާތުގައި ނަމާދު ކުރުން ވަގުތީ ގޮތުން މެދުކަނޑާލާފައި އޮތްއޮތުން މިހާރު މާލެ ސަރަހައްދުގައި އިއުލާން ކޮށްފައިވާ ލޮކްޑައުން މުއްދަތު ނިމެންދެން މިސްކިތުގައި ޖަމާއަތުގައި ނަމާދު ކުރުން ވަގުތީގޮތުން ވަނީ މެދުކަނޑާލާފަ އެވެ.
މާލެ ސަރަހައްދުގައި ކޮމިޑް-19 އަށް މީހަކު ޕޮޒިޓިވް ވުމާއެކު މިމަހުގެ 15 ވަނަ ދުވަހު މާލެ ސަރަހައްދު ވަނީ 24 ގަޑިއިރަށް ލޮކްޑައުންކޮށްފަ އެވެ. އަދި ޕޮޒިޓިވްވާ މީހުން އިތުރުވަމުންދާތީ މިމަހުގެ 17 ވަނަ ދުވަހުން ފެށިގެން 14 އިތުރު ދުވަހުގެ މުއްދަތަށް މާލެ ސަރަހައްދު ވަނީ ލޮކްޑައުން ކޮށްފަ އެވެ.
މާލެ ސަރަހައްދު ލޮކްޑައުންކުރީ މިމަހުގެ 15 ވަނަ ދުވަހު ދުވަހު އެވެ. ކުރިއަށްއޮތް ހަފްތާގައި ރޯދަމަސް ފެށޭއިރު، މާލެ ސަރަހައްދު އޮންނާނީ ލޮކްޑައުންގަ އެވެ.
