ޗައިނާއިން އިއްޔެ 27 މީހުންނަށް ވައިރަސް ޖެހުނު
18 އެޕްރީލު 2020 | ހޮނިހިރު 08:49ހުކުރު ދުވަހު ޗައިނާގައި ވައިރަސް ޖެހިފައިވަނީ 26 މީހުންނަށް
ޗައިނާގެ ވުހާން ސިޓީ- މީހުން ބޭރަށް ނިކުމެ އުޅެނީ މާސްކު އަޅައިގެން
ކޮވިޑް-19 އިއްޔެ ޗައިނާއިން 27 މީހުންނަށް ޖެހިފައިވާ ކަަމަށް އެގައުމުގެ ނޭޝަނަލް ހެލްތު ކޮމިޝަނުން ބުނެފި އެވެ.
އޭގެކުރީ ދުވަހު ޗައިނާގައި ވައިރަސް ޖެހިފައިވަނީ 26 މީހުންނަށެވެ.
ހުކުރު ދުވަހު އަލަށް ވައިރަސް ޖެހުނު މީހުންގެ ތެރެއިން 17 މީހުންނަކީ ޗައިނާއަށް އެތެރެވި މީހުންނެވެ.
އޭގެކުރީ ދުވަހު ކޮވިޑް-19 ޖެހިގެން ޗައިނާއަށް އެތެރެވި 15 މީހަކު ވަނީ ރިޕޯޓްކޮށްފަ އެވެ.
މީގެއިތުރުން ވައިރަސް ހަށިގަނޑުގައި ހުރިކަން ނޭނގި ކޮވިޑް-19 ޖެހިފައިވާ 54 މީހަކު އިއްޔެ އެގައުމުން ފެނިފައިވާކަމަށް ޗައިނާއިން ބުނެއެވެ.
މީގެތެރެއިން 3 މީހުންނަކީ އެގައުމަށް އެތެރެވި މީހުންކަމަށް ޗައިނާއިން ބުނެއެވެ.
އެންމެ ފުރަތަމަ ކޮވިޑް-19 ފެނުނު ޗައިނާއިން މިހާތަނަށް މުޅި ޖުމްލަ 82,719 މީހުންނަށް ވައިރަސް ޖެހިފައިވެ އެވެ. އަދި މިހާތަނަށް އެގައުމުގައި މަރުވި މީހުންގެ އަދަދު ވަނީ 4632 ށް އަރާފަ އެވެ.
ޗައިނާގެ ނޭޝަނަލް ހެލްތު ކޮމިޝަނުން ހުކުރު ދުވަހު ވަނީ އެންމެ ފުރަތަމަ ވައިރަސް ފެނުނު ވުހާން ސިޓީން ވައިރަސް ޖެހިގެން މަރުވި މީހުންގެ އަދަދުތައް އަލުން ބަލާފަ އެވެ. އެއާއެކު އިތުރު ހާހެއްހާ މީހުންނަށް ވައިރަސް ޖެހިފައިވާކަން ވަނީ އެނގިފަ އެވެ. އެގައުމުން ބުނާގޮތުން މިމީހުންނަކީ ވައިރަސް އެންމެ ހަލުވިމިނުގައި ފެތުރެމުންދިޔަ އިރު މަރުވެފައވާ ރަނގަޅަށް ރިކޯޑް ނުކުރެވިފައިވާ މީހުންނެވެ.
އަނެއްކޮޅުން ކޮވިޑް-19 ގެ ކަންތަކުގައި ޗައިނާއިން ކަންތައްތަކެއް ސިއްރުކުރާކަމަށް ބުނެ އެމެރިކާ އާއި ދުނިޔޭގެ ބޮޑެތި އެހެން ގައުމުތަކުން އަންނަނީ ޗައިނާއަށް ތުހުމަތުގެ އިނގިލި ދިއްކުރަމުންނެވެ.
އެވާހަކަތަކުގެ އަޑުތައް ގަދަވެފައިވަނިކޮށް ޗައިނާއިން އަލުން އަދަދުތައް ބެލުމުން އަދަދުތައް މައްޗަށް ދިޔުމުން ގިނަ ބަޔަކު އަންނަނީ ޗައިނާއިން އަދަދުތައް އޮޅުވާލާފައިވާކަމަށް ބުނަމުންނެވެ.
ނަމަވެސް ޗައިނާއިން އަންނަނީ އެވާހަކަތައް ދޮގުކުރަމުންނެވެ.
