ގޭސްފުޅި ޑެލިވަރ ކޮށްދެވޭނީ އިމާރާތުގެ ބޭރު ދޮރާހަމައަށް: މޯލްޑިވް ގޭސް
18 އެޕްރީލު 2020 | ހޮނިހިރު 08:45މިގޮތަށް ޑެލިވަރީގެ ކަންތައް ކުރިއަށް ގެންދިއުމަށް ނިންމާފައިވަނީ ދެފަރާތުގެ ސަލާމަތާއި ރައްކައުތެރިކަމަށްޓަކައި
މޯލްޑިވް ގޭހުގެ ލުއި ފުޅިތަކެއް
ގޭސްފުޅި ޑެލިވަރ ކޮށްދެވޭނީ އިމާރާތުގެ ބޭރު ދޮރާއި ހަމައަށް ކަމަށް މޯލްޑިވް ގޭހުން ބުނެފިއެވެ.
މޯލްޑިވް ގޭހުން ބުނީ މާލޭގައި ކޮވިޑް-19 ފެތުރެމުންދިމާއި ގުޅިގެން މޯލްޑިވް ގޭސްއިން ގޭސްފުޅި ޑެލިވަރީ ކޮށްދިނުމަށް ހަމަޖެހިފައިވަނީ އިމާރާތުގެ ބޭރު ދޮރާއި ހަމައަށް ކަމަށެވެ.
އަދި ހުސްފުޅި އިމާރާތުގެ ބޭރަށް ގެނެސްދެވޭނެ އިންތިޒާމް ހަމަޖައްސައި ދިނުމަށް ކަސްޓަމަރުންގެ ކިބައިން ވަނީ އެދިފައެވެ.
މިގޮތަށް ގޭސް ޑެލިވަރީގެ ކަންތައް ކުރިއަށް ގެންދިއުމަށް ނިންމާފައިވަނީ ދެފަރާތުގެ ސަލާމަތާއި ރައްކައުތެރި ކަމަށްޓަކައެވެ.
މި ދަތި އުނދަގޫ ދަނޑިވަޅުގައި ހުރިހާ ކަސްޓަމަރުންގެ ފަރާތުން ލިބޭ އެއްބާރު ލުމަށް މޯލްޑިވް ގޭހުން ވަނީ ޝުކުރު އަދާ ކޮށްފައެވެ.
މޯލްޑިވް ގޭސްގެ އެކްޓިންގ މެނޭޖިންގ ޑިރެކްޓަރ އަލީ އިކްރާމް ވިދާޅުވީ، ކައްކަން ބޭނުންކުރާ ގޭހާއި މެޑިކަލް ގޭސް ހުސްނުވެ ފޯރުކޮށްދޭނެ ކަމަށެވެ.
ގޭސް ސްޓޯރޭޖް ކުރެވޭނެ އިންތިޒާމުތައް ވެސް ހަމަޖެހިފައިވާ ކަމަށާއި ހާއްސަކޮށް މިދިއަ ޖެނުއަރީން ފެށިގެން މިފަދަ ހާއްސަ ހާލަތެއް އައިސްދާނެ ކަމަށްޓަކައި ރަނގަޅަށް ތައްޔާރު ވެވިފައިވާ ކަމަށްވެސް އިކްރާމް ވިދާޅުވި އެވެ.
އެގޮތުން، މިހާރުވެސް ކުރިއަށް އޮތް އެއް މަސް ދުވަހަށް ވާވަރަށް މިހާރު ވެސް ކައްކާ ގޭހާއި މެޑިކަލް ގޭސް އެބަހުރި ކަމަށް އޭނާ ވިދާޅުވިއެވެ. އަދި މިހާރު އިތުރު ސްޓޮކެއް ރާއްޖެ ގެނައުމަށްޓަކައި އެކަމުގެ ލިިޔެކިޔުންތައް ނިމި، ގާތްގަނޑަށް 90 ޕަސެންޓް އިދާރީ މަސައްކަތް ނިމިފައިވާ ކަމަށް އޭނާ ވިދާޅުވިއެވެ.
އިކްރާމް ވިދާޅުވީ، މާލެ ސަރަހައްދު ލޮކްޑައުން ކޮށްފައިވާތީ، މާލޭ ސަރަހައްދުގައި ޑެލިވަރީ ކުރާ ޕިކަޕްތައް މަދުކޮށްފައިވާތީ، ކޮންމެވެސް ވަރަކަށް ޑެލިވަރީ ކުރުމުގައި ކުރިއަށްވުރެން ލަސްވެދާނެ ކަމަށެވެ.
މި ހާލަތުގައި ވެސް ލަސްވެގެން ބައި ގަޑިއިރުގެ ތެރޭގައި ޑެލިވަރީ ކޮށްދޭން ކަމުގެ ޔަގީންކަން މޯލްޑިވް ގޭސް އިން ވަނީ ދީފައެވެ.
