މާލެއިން ކޮވިޑް-19 އަށް ޕޮޒިޓިވް ވި މީހުންގެ އަދަދު 9 އަށް!
މާލެއިން އެންމެ ފުރަތަމަ ޕޮޒިޓިވް ކޭސްއެއް ފެނިފައިވަނީ އަންގާރަ ދުވަހު
މއ. ކޮށީގެ ހުންނަ ސަރަހައްދު
މާލެއިން ކޮވިޑް-19 އަށް ޕޮޒިޓިވް ވި މީހުންގެ އަދަދު ނުވަ އަކަށް އަރައިފި އެވެ.
މައުލޫމާތު ލިބިފައިވާގޮތުގައި އެމީހާ ޕޮޒިޓިވް ވުމާއިއެކު މއ. ކޮށީގެ ވަނީ ކަރަންޓީނުކުރެވިފަ އެވެ. މއ. ކޮށީގެ އަކީ އެމީހާ ދިރިއުޅެމުންދާ ގެއެެވެ. މި މީހާ އަކީ ހުކުރު ދުވަހު ފެނުނު ކޭސް 27 ގެ ޑައިރެކްޓް ކޮންޓެކްޓެއް ކަމަށް އެޗްޕީއޭ އިން ވަނީ ހާމަކޮށްފަ އެވެ.
މާލެއިން އެންމެ ފުރަތަމަ ޕޮޒިޓިވްވެފައިވަނީ އަންގާރަ ދުވަހުގެރޭ ބަލީގެ އަލާމަތްތަކެއް ހުރެގެން ފްލޫ ކްލިނިކަށް ޑޮކްޓަރަށް ދައްކަން ދިޔަ މީހެކެވެ. އެއާ ގުޅިގެން ކޮންޓްކެޓް ޓްރޭސިންގެ މަސައްކަތް ފަށައި، އޭނާއާ (ކޭސް 21) އާ ޑައިރެކްޓް ކޮންޓެކްޓްވި ފަރާތްތައް ދެނެގަތުމުގެ މަސައްކަތް ވަގުތުން ފަށާފައިވާއިރު، ޕޮޒިޓިވްވި ދެވަނަ ފަރާތް (ކޭސް 22) އަކީ މާލެއިން ޕޮޒިޓިވްވި ފުރަތަމަ މީހާގެ ދަރިފުޅުކަމަށް އެޗްޕީއޭއިން ވަނީ ބުނެފަ އެވެ.
އޭގެ އިތުރުން، ބުދަ ދުވަހުގެރޭ ޕޮޒިޓިވްވި 3 ވަނަ މީހާއަކީވެސް މާލެއިން ފުރަތަމަ ފެނުނު ކޭސްގެ ޑައިރެކްޓް ކޮންޓެކްޓެއް ކަމަށް އެޗްޕީއޭއިން ވަނީ ބުނެފައެވެ. އަދި އޭނާގެ (ކޭސް 23) ގެ ކްލޯސް ކޮންޓެކްޓުގެ ގޮތުގައި ފާހަގަވި އިތުރު 2 މީހެއް (ކޭސް 24 އަދި ކޭސް 25) ވެސް ބުރާސްފަތި ދުވަހުގެރޭ ވަނީ ޕޮޒިޓިވްވެފަ އެވެ.
އޭގެ އިތުރުން، ކޭސް 23 ގެ އިތުރު ޑައިރެކްޓް ކޮންޓެކްޓެއްގެ ފަރާތުން ބަލީގެ އަލާމާތްތައް ފެނިގެން ހުކުރު ދުވަހު ހެދި ޓެސްޓް ޕޮޒިޓިވްވެފައިވާއިރު، ރޯގާގެ އަލާމަތްތައް ހުރެގެން ފްލޫ ކްލިނިކަށް ދެއްކި އިތުރު 2 މީހަކު ވެސް ވަނީ ހުކުރު ދުވަހު ޕޮޒިޓިވްވެފަ އެވެ.
