ޒަރޫރީ ބޭނުމެއްގައި މެނުވީ އެއްރަށުން އަނެއް ރަށަށް ދަތުރުކުރުން ހުއްޓާލުމަށް އެޗްޕީއޭއިން އެންގިނަމަވެސް މަސް ދޯނިފަހަރުގައި މަހަށް ފުރުމުގެ ހުއްދަ ދިނުމަށް ނިންމާފައިވާ ކަމަށް މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ބުނެފިއެވެ.

ފިޝަރީޒް މިނިސްޓްރީން ހުކުރު ދުވަހު ކޮށްފައިވާ ޓްވީޓްގައި ވަނީ ކޮވިޑް-19 ގެ ސަބަބުން ދިވެހިރާއްޖޭގެ ހުރިހާ ރަށެއްގައި މިހާރު އަޅާފައިވާ ފިޔަވަޅުތަކުގެ ތެރެއިން އެއް ރަށުން އަނެއް ރަށަށް ދަތުރުކުރުން ހުއްޓާލުމަށް އަންގާފައިވީ ނަމަވެސް މަސް ދޯނިފަހަރުގައި މަހަށް ފުރުމުގެ ހުއްދަ ދިނުމަށް ނިންމާފައިވާކަމަށެވެ.

މިޙާލަތުގައި މަސްދޯނިފަހަރު މަސް ކިރުވުމަށް ބަނދަރުކުރާ ރަށަށް މަސްވެރިން ނުފޭބުމަކީ ލާޒިމުކަމެއްކަމަށާއި އަދި އެއުޅަނދެއް ނިސްބަތްވާ ރަށަށް މަސް ދަތުރު ނިންމުމަށްފަހު ދަތުރުކުރުމަކީ ލާޒިމުކަމެއް ކަމަށް މިނިސްޓްރީން ބުނެއެވެ.

މަސްވެރިން މަހަށް ފުރުމަށް ހަމަޖައްސާފައިވާ އިންތިޒާމުތަކާއި ގުޅޭގޮތުން އެޗްޕީއޭ އަދި ކަމާއިގުޅޭ ފަރާތްތަކުން އިތުރު ތަފުސީލު ފޯރުކޮށްދޭނެ ކަމަށާއި އެފަރާތްތަކުގެ އިރުޝާދާއި އެއްގޮތަށް ޢަމަލުކުރުމަކީ މިނިސްޓްރީގެ އިލްތިމާސެއްކަމަށް ފިޝަރީޒް މިނިސްޓްރީން ބުނެއެވެ.

މާލެއިން ކޮވިޑް-19 ވައިރަސް އަށް ގިނަ ބަޔަކު ޕޮޒިޓިވް ވަމުން ދިއުމާއި ގުޅިގެން ހުކުރު ދުވަހު އެޗްޕީއޭ އިން ވަނީ ހަރުކަށި ފިޔަވަޅުތަކެއް އެޅުމަށް ނިންމާފައެވެ.

އެޗްޕީއޭއިން އަޅަން ނިންމާފައިވާ ފިޔަވަޅުތަކުގެ ތެރޭގައި ޒަރޫރީ ބޭނުމެއްގައި މެނުވީ އެއްރަށުން އަނެއް ރަށަށް ދަތުރުކުރުން ހުއްޓާލުމަށް ވަނީ އަންގާފައެވެ.

އެޗްޕީއޭއިން ނިންމާފައިވާ ނިންމުންތައް ތަންފީޒުކުރަން ހަމަޖެހިފައިވަނީ ހުކުރު ދުވަހުގެ ހަވީރު 06:00 އިން ފެށިގެންނެވެ.