ފިޔަވަޅުތައް ތަންފީޒު ކުރުމުގައި ފަސްޖެހުމެއް ނެތް: ހޯމް މިނިސްޓަރު
14 ދުވަހުގެ މުއްދަތަށް ކަރަންޓީނު ފެސިލީޓީއަކަށް ގެންދެވޭނެ
ހޯމް މިނިސްޓަރ އިމްރާން، ކޮމިޝަނަރ އޮފް ޕޮލިސް ހަމީދް
ކޮވިޑް-19 އާ ގުޅިގެން މާލެ ލޮކްޑައުންކޮށް އަޅާފައިވާ ފިޔަވަޅުތައް ތަންފީޒު ކުރުމަށް ފުލުހުން ފަސް ނުޖެހޭނެ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.
ބުރާސްފަތި ދުވަހުގެރޭ ފޯނު މެދުވެރިކޮށް ރާއްޖެ ޓީވީއަށް ދެއްވި ހާއްސަ އިންޓަވިއުއެއްގައި ހޯމް މިނިސްޓަރު ޝޭހް އިމްރާން އަބްދުﷲ ވިދާޅުވީ، ފިޔަވަޅުތައް ތަންފީޒު ކުރަމުންދާއިރުވެސް ރައްޔިތުންނަށް ދަތިތަކާއި އުދަނގޫތައް ކުރިމަތިވާނެކަން ގަބޫލްކުރައްވާ ކަމަށެވެ. ހޯމް މިނިސްޓަރާ ސުވާލުކުރެވުނީ ފިޔަވަޅުތައް ތަންފީޒުނުކުރެވޭ މައްސަލައިގައި އަމާޒުވަމުންދާ ފާޑިކިޔުންތަކާ ގުޅިގެންނެވެ.
މިނިސްޓަރ ވިދާޅުވީ ފުލުހުން މަސައްކަތް ކުރަމުންގެންދާނީ ރައްޔިތުންނަށް އުނދަގޫނުވާނެ ގޮތަކަށް ތަންފީޒުކުރުމަށްކަމަށެވެ. އެގޮތުން ތަންފީޒުކުރުމުގައި ހާލަތަށް ރިއާޔަށް ކުރާނެކަމަށެވެ. ލޮކްޑައުންގެ ފުރަތަމަ ދުވަހު ވަރަށް ރަނގަޅަށް ތަންފީޒު ކުރެވުނު ކަން ފާހަގަކުރައްވާ މިނިސްޓަރ ވިދާޅުވީ ދެވަނަ ދުވަހު ލުއި ތަކެއް ދެވުނީ ރައްޔިތުންގެ ކަންބޮޑުވުންތައް ހުރުމާއި އެކުކަމަށެވެ. އަދި އިންތިޒާމްތައް ރަނގަޅުވަމުންދާ ވަރަކަށް ތަންފީޒުކުރަމުންގެންދާ ވަރު ވެސް ރަނގަޅުވާނެކަމަށެވެ.
މިނިސްޓަރ މިހެން ވިދާޅުވެފައިވާއިރު ފުލުހުން ބުނެފައިވަނީ ކުރިއަށް ވުރެ މިހާރު އެޅޭ ފިޔަވަޅުތައް ވަރަށް ބޮޑަށް ހަރުކަށި ކުރެވޭނެ ކަމަށެވެ. އެގޮތުން ލޮކްޑައުން ގަޑީގައި އެއްވެސް ބޭނުމަކާއި ނުލާ ބޭރަށް ނުކުމެ އުޅޭނަމަ 14 ދުވަސް ވަންދެން ކަރަންޓީނު ފެސިލިޓީއަކަށް ގެންދާނެ ކަމަށް ވަނީ ބުނެފަ އެވެ.
