ކޮވިޑް-19 ދިވެހިރާއްޖޭގައި ފެތުރުނަ ނުދިނުމަށް ދިވެހި ސަރުކާރުން އަޅާފައިވާ ފިޔަވަޅުތަކަކީ ހަރުދަނާ ފިޔަވަޅުތަކެއް ކަމަށާއި ޔޫރަޕުން ދަނީ ރާއްޖެއިން ފިލާވަޅު ލިބިގަންނަމުން ކަމަށް ވިލާތުގެ އިއްތިހާދުން ރާއްޖެއާއި ސްރީލަންކާއަށް ކަނޑައަޅާފައި ހުންނަވާ ސަފީރު ޑެނިސް ޗައިބީ ވިދާޅުވެއްޖެއެވެ.

ރާއްޖެއެމްވީ ގައި ސަފީރު ޝާއިއު ކުރެއްވި ލިޔުއްވުމެއްގައި ވިދާޅުވެފަައި ވަނީ ކޮވިޑް-19 ރާއްޖޭގައި ފެތުރުނަ ނުދިނުމަށް މިހާތަނަށް ދިވެހި ސަރުކާރުން އަޅާފައިވާ ފިޔަވަޅުތަކަށް ތައުރީފް ކުރައްވާފައެވެ.

ސަފީރު ވިދާޅުވީ ވިލާތުން ރާއްޖެއަކީ މިސާލެއްގެ ގޮތުގައި ބަލާ، ވައިރަސް ކޮންޓްރޯލް ކުރުމުގެ މަސައްކަތް ކުރަމުންދާ ކަމަށެވެ.

ނަމަވެސް، ކޮންޓްރޯލް ކުރެވުމަކީ 'އީކުއޭޝަން'ގެ އެއްބައި ކަން ފާހަގަކުރައްވާ ސަފީރު ވިދާޅުވެފައިވަނީ އީކުއޭޝަން ފުރިހަމަވާނީ ވައިރަހާއި ގުޅިގެން އިގްތިސާދަށް ކުރާ އަސަރުތަކުން އަރައިގަތުމަށް ފިޔަވަޅުތަކެއް އެޅުމުން ކަމަށެވެ. އެގޮތުން، މިވައިރަހުގެ ސަބަބުން އާއްމު ދިރިއުޅުމަށް ކުރާ އަސަރުތައް ކުޑަކުރެވޭނީ އެކަކު އަނެކަކަށް އެހީތެރިވެދީ، އެއްގައުމު އަނެއްގައުމާއި ގުޅިގެން ކަމަށް ސަފީރުގެ ލިޔުއްވުމުގައި ވަނީ ފާހަގަކުރައްވާފައެވެ. އަދި ކޮވިޑް-19 އާ ދެކޮޅަށް ހުރިހާ ގައުމުތައް ގުޅިގެން މަސައްކަތް ކުރުމުގެ މުހިއްމުކަން ސަފީރު ފާހަގަ ކުރައްވާފައިވެއެވެ.

ސަފީރު މިސާލެއްގެ ގޮތުގައި ނެންގެވީ ކޮވިޑް-19 އާ ގުޅިގެން ރާއްޖޭގައި ތިބި ވިލާތުގެ ފަތުރުވެރިން އަނބުރާ ގައުމަށް ގެންދިއުމަށް ކުރެވުނު މަސައްކަތެވެ. އެގޮތުން، ވިލާތައް ނިސްބަތްވާ 90% ށް ވުރެ ގިނަ ފަތުރުވެރިން އެމީހުންގެ ގައުމަށް އަނބުރާ ގެންދެވުނީ ރާއްޖެއާއި ވިލާތުގެ އިއްތިހާދާ ގުޅިގެން ކުރެވުނު މަސައްކަތުގެ ސަބަބުން ކަމަށް ސަފީރު ވިދާޅުވެފައިވެއެވެ.

ސަފީރު ވިދާޅުވީ ރާއްޖެއާއި ވިލާތުން އެންމެ އިސްކަމެއް ދެނީ ރައްޔިތުންގެ ފުރާނަ ސަލާމަތް ކުރުމަށް ކަމަށެވެ.

ވައިރަސް ފެތުރުން ހުއްޓުވަން ބޭނުންވާނަމަ، މި ވައިރަހާއި ދެކޮޅަށް ކުރާ މަސައްކަތުގައި ހުރިހާ ގައުމަކުންވެސް ބައިވެރިވާން ޖެހޭ ކަމަށް ސަފީރު ވިދާޅުވިއެވެ.