ޓްރިވެންޑްރަމްއަށް ފޮނުވި ހުރިހާ ކެއަރޕެކޭޖެއް ހަވާލުކޮށް ނިމިއްޖެ
އެސިޓީއަށް ފޮނުވި 79 ޕެކޭޖްގެ އިތުރުން ކޮޗިންގައި ތިބި އާއިލާތަކަށް 65 ޕެކޭޖް ފޮނުވާފައިވޭ
ބޭރުގައުމުތަކުގައި ތިބި ދިވެހިންނަށް ކެއަޕެކޭޖް ފޮނުވަން ހުޅުވާލި ފުރުސަތުގައި އެޕެކޭޖުތައް ހަވާލުކުރުމަށް ބަޔަކު ގޮސްތިބި މަންޒަރު
ކޮވިޑް-19 އާ ގުޅިގެން މިސަރަހައްދުގެ ބައެއް ޤައުމުތަކުން އަޅާފައިވާ ރައްކާތެރިކަމުގެ ފިޔަވަޅުތަކާ ގުޅިގެން، ޒަރޫރީ ބައެއް ތަކެތި ހޯދުމަށް ދަތިވެފައިވާ ދިވެހި އާއިލާތަކަށް އެހީތެރިވެދިނުމަށް ސަރުކާރުން ފެށި ކެއަރ ޕެކޭޖް ފޮނުވުމުގެ އިންތިޒާމްތަކުގެ ދަށުން އިންޑިއާގެ ޓްރިވެންޑްރަމްއަށް ފޮނުވި ހުރިހާ ކެއަރ ޕެކޭޖެއް ހަވާލުކުރެވިފައިވާކަމަށް ފޮރިން މިނިސްޓްރީން ބުނެފިއެވެ.
ކޮވިޑް-19 އާއި ގުޅިގެން ރާއްޖެޓީވީން ގެނެސްދެމުންދާ ޚާއްސަ ކަވަރޭޖްއާއި ގުޅިގެން ފޮރިން މިނިސްޓްރީގެ ޑިރެކްޓަރ އޮފް ކޮމިއުނިކޭޝަންސް މިއުވާން މުހައްމަދު ވިދާޅުވީ އިންޑިއާގެ ޓްރިވިންޑްރަމް އަށް ފޮނުވި ހުރިހާ ޕެކޭޖެއް ހަވާލުކުރެވިފައިވާކަމަށެވެ.
ޓްރިވިންޑްރަމް އަށް 79 ޕެކޭޖު ފޮނުވާފައިވެއެވެ. އަދި ޓްރިވެންޑްރަމްއަށް ދިޔަ ފްލައިޓްގައި އެސިޓީއަށް ފޮނުވި 79 ޕެކޭޖްގެ އިތުރުން ކޮޗިންގައި ތިބި އާއިލާތަކަށް 65 ޕެކޭޖް ފޮނުވާފައިވާކަމަށެވެ.
ފޮރިން މިނިސްޓްރީން ބުނީ ކޮޗިންއަށް ފޮނުވި ޕެކޭޖްތައް ޓްރިވެންޑްރަމްއިން ކޮޗިންއަށް ގެންދިޔުމަށް ބޭނުންވާ ހުއްދަތައް ހޯދައިގެން، ޓްރިވެންޑްރަމްގައި ހުންނަ ދިވެހިރާއްޖޭގެ ކޮންސިއުލޭޓް ޖެނެރަލްއިން ވަނީ މިހާރު އެތަކެތި ކޮޗިންއަށް ގެންގޮސްފައި ކަމަށެވެ. އަދި އިންޑިއާގެ ކެރެލާ ސްޓޭޓްވެސް އޮތީ ލޮކްޑައުންގައި ކަމުން ޓްރިވެންޑްރަމްގައި ދިރިއުޅޭ ދިވެހި އާއިލާތަކަށް ގެންދިޔަ ޕެކޭޖްތައްވެސް ގޭގެއަށް ގެންގޮސްފައިވަނީ އެކަމަށް ބޭނުންވާ ޚާއްސަ ހުއްދައެއް ނަގައިގެން ކަމަށް ފޮރިން މިނިސްޓްރީން މައުލޫމާތުދެއެވެ.
