ބުރާސްފަތި އަދި ހޮނިހިރު ދުވަހު އައިޖީއެމްއެޗުން ދެމުން ގެންދާ ބައެއް ޚިދުމަތްތައް މެދުކަނޑާލާނެ
އައިޕީޑީ އަދި އިމަރޖެންސީ ޚިދުމަތްތައް އެހެން ދުވަސްތަކެކޭ އެއްގޮތަށް ދެމުން ގެންދާނެ
އައިޖީއެމްއެޗް - ދެމުންގެންދާ ބައެއް ޚިދުމަތްތައް ވަނީ ދެ ދުވަހަށް މެދުކަނޑާލާފައި
ކޮވިޑް-19 މާލޭގައި ދިރިއުޅޭ ރައްޔިތެއްގެ ގައިން ފެނުމާއެކު އިންދިރާ ގާންދީ މެމޯރިއަލް ހޮސްޕިޓަލު (އައިޖީއެމްއެޗް) އިން ދެމުން ގެންދިޔަ ބައެއް ޚިދުމަތްތައް ބުރާސްފަތި އަދި ހޮނިހިރު ދުވަހު މެދުކަނޑާލާނެ ކަަމަށް އައިޖީއެމްއެޗުން ބުނެފިއެވެ.
އައިޖީއެމްއެޗުން އެކަމާއި ގުޅޭގޮތުން ނެރެފައިވާ ބަޔާނެއްގައި ބުނެފައިވަނީ އެ ދެ ދުވަހު ހޮސްޕިޓަލުން ދެމުން ގެންދާ ހޮސްޕިޓަލުގެ ސްޕެޝަލިސްޓް އޯޕީޑީ އަދި އެހެނިހެން ކްލިނިކަލް ޚިދުމަތްތައް ބަންދުވާނެ ކަމަށެވެ. އެހެންނަމަވެސް އައިޕީޑީ އަދި އިމަރޖެންސީ ޚިދުމަތްތައް އެހެން ދުވަސްތަކެކޭ އެއްގޮތަށް ދެމުން ގެންދާނެކަމަށް އެ ހޮސްޕިޓަލުން ބުނެއެވެ.
އަދި އައިޖީއެމްއެޗުން ދެމުންގެންދާ ޚިދުމަތްތަކާއި ގުޅޭގޮތުން އާދިއްތަ ދުވަހުން ފެށިގެން އަމަލުކުރާނެ ގޮތެއް ހޮނިހިރު ދުވަހު ހާމަކުރާނެކަމަށް އައިޖީއެމްއެޗުން ބުނެއެވެ.
ކޮވިޑް-19 އަށް މާލޭގައި ދިރިއުޅެމުންދާ ރައްޔިތަކު ޕޮޒިޓިވްވެފައިވާއިރު މާލެ ހިމެނޭ ސަރަހައްދު ވަނީ 24 ގަޑިއިރު ވަންދެން ލޮކްޑައުންކޮށްފައެވެ. އެހެންކަމުން ކޮންމެހެން ދޭންޖެހޭ ޚިދުމަތްތައް ނޫނީ ތަންތަނުން މިހާރު ދެމުންނެއް ނުގެންދެއެވެ. ނަމަވެސް ޒަރޫރީ ޚިދުމަތްތައް ފޯރުކޮށްދޭނެ ގޮތްތައް ކަމާބެހޭ ފަރާތްތަކުން އަންނަނީ ހަމަޖައްސަމުންނެވެ.
