ކާށިދޫ ކަރަންޓީންކޮށްފައިވާ ކަމަށް ބުނެ، ފަތުރާ ލިޔުމަކީ ފޭކެއް: އެޗްޕީއޭ
ނަމަވެސް ކާށިދޫ މޮނިޓަރިންގ ހާލަތުގައި ވާކަމަށްބުނާ، މައިމޫނާގެ މެސެޖެއްގެ ސްކްރީން ޝޯޓެއް ވެސް ދައުރޭ
ޑައިރެކްޓަރ އޮފް ޕަބްލިކް ހެލްތް މައިމޫނާ އަބޫބަކުރު
ކ. ކާށިދޫ އެއްކޮށް ކަރަންޓީން ކޮށްފައިވާ ކަމަށްބުނެ، ސޯޝަލް މީޑިއާގައި ފަތުރަމުންދާ ލިޔުމަކީ "ފޭކް" ލިޔުމެއް ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.
ސޯޝަލް މީީޑިއާގައި ފަތުރަމުންދާ ލިޔުމުގައި ކ. ކާށިދޫ ކައުންސިލްގެ އިދާރާއަށް އެޑްރެސްކުރައްވާ، ލިޔެފައިވާ ލިޔުމުގައި ބުނެފައިވަނީ، ކޮވިޑް-19 ބައްޔާއި ގުޅިގެން ޞިއްޙީ ގޮތުން އިތުރަށް ބަލަންޖެހޭ ކަންކަން ބެލުމަށް، ރަށުގައި މިވަގުތު ތިބި އެއްވެސް މީހަކު އެޗްޕީއޭއިން ވަކިގޮތެއް އަންގަންދެން ރަށުން ފޭބުމާއި، އެޗްޕީއޭގެ ހުއްދަނެތި އެއްވެސް މީހަކު ރަށަށް އެރުން މަނާކޮށް، ރަށް ރަށް ކަރަންޓީން ކޮށްފައިވާ ކަމަށެވެ.
ނަމަވެސް މިލިޔުމާއި ގުޅިގެން އެޗްޕީއޭއަށް ގުޅުމުން އެއިދާރާގެ އޮފިޝަލަކު ވިދާޅުވީ އެފަދަ ލިޔުމެއް އެޗްޕީއޭއިން ނެރެފައި ނުވާނެ ކަމަށެވެ.
ވޭތުވެދިޔަ 14 ދުވަހުގެ ތެރޭގައި ކާށިދޫއަށް ދިޔަ މީހަކު ކުރި މެސެޖަކަށް ޑައިރެކްޓަރ އޮފް ޕަބްލިކް ހެލްތް، މައިމޫނާ އަބޫބަކުރު، ދެއްވާފައިވާ ޖަވާބެއްގައި ވިދާޅުވެފައިވާގޮތުގައި، ކާށިދޫ ކަރަންޓީން ނުކުރާ ކަމަށާއި، ނަމަވެސް ކާށިދޫ އޮތީ މޮނީޓަރިންގ ހާލަތުގައި ކަމަށެވެ. އެ މެސެޖްގެ ސްކްރީކް ސޮޓެއް "ރާއްޖެއެމްވީ"އަށް ވެސް ވަނީ ލިބިފައެވެ.
ކޮވިޑް-19 ބައްޔާ ގުޅިގެން ކާށިދޫގައި ޝައްކުކުރެވޭ މީހަކު ހުރިކަމަކަށް ނޭޝަނަލް އިމަޖެންސީ އޮޕަރޭޝަން ސެންޓަރުން އަދި މިހާތަނަށް ރަސްމީކޮށް ހާމަކޮށްފައެއް ނުވެއެވެ. އަދި ކާށިދޫ މޮނިޓަރިންގ ހާލަތުގައިވާކަމަށްވެސް ހާމަކޮށްފައެއް ނުވެއެވެ.
