1.9 މިލިއަން ރުފިޔާ ވަގަށް ނެގި ކަމުގެ ތުހުމަތުގައި ލަންކާ މީހަކު ހައްޔަރުކޮށްފި

ރިސޯޓެއްގައި މަސައްކަތްކުރާ އަމިއްލަ ކުންފުންޏެއްގެ މުވައްޒަފުންތަކެއްގެ މުސާރަ ދިނުމަށް ހަވާލުކުރި 1.9 މިލިއަން ރުފިޔާ އާއި އެހެނިހެން ތަކެތި ވަގަށް ނެގި މައްސަލައެއްގައި މީހަކު ހައްޔަރުކޮށްފިއެވެ.

ފުލުހުން މަޢުލޫމާތު ދީފައިވާ ގޮތުގައި މި މައްސަލައިގައި ހައްޔަރުކޮށްފައިވަނީ ސްރީ ލަންކާގެ ރައްޔިތެކެވެ. އޭނާ ވަގަށް ނަގާފައިވަނީ ކޭއެސްޖޭ އޮވަރސީސް އެމްއެލްޑީ ޕްރައިވެޓް ލިމިޓެޑްގެ ފައިސާތަކެކެވެ. މި މައްސަލައިގައި ހައްޔަރުކުރި މީހާ އަކީ ކޭއެސްޖޭގެ މުވައްޒަފެކެވެ.

ފުލުހުން ބުނެފައިވާ ގޮތުގައި، މި މައްސަލައިގައި ޝާމިލުވާ ފަރާތުން އެ ފައިސާ އާއި ރިސޯޓަށް ގެންދަން ހަވާލުކުރި އެހެނިހެން ތަކެތި ވަގަށް ނަގާފައި ވަނީ ރިސޯޓަށް ފުރަންދެން ގެސްޓް ހައުސްއެއްގައި މަޑުކޮށްގެން ހުރި ވަގުތުގައި ކަމަށް ބެލެވެއެވެ. އޭނާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، އެ ކޯޓުން ވަނީ އޭނާގެ ބަންދަށް 15 ދުވަހުގެ މުއްދަތެއް ޖަހައިދީފައެވެ.

ވަގަށް ނަގާފައިވާ ފައިސާގެ ޖުމުލަ ޢަދަދަކީ 1،921،130 ރ. އެވެ. އަދި ވަގަށް ނަގާފައިވާ އެހެން ތަކެތީގެ ތެރޭގައި 25،943.50 ރ. ގެ ޑޭޓާ ކާޑް އަދި ރައުޓަރ، 11،000 ރ. ގެ އަގުހުރި ފަސް މޯބައިލް ފޯނު އަދި 29،500 ރ. ގެ އަގުހުރި ރީޖަރޗް ކާޑު ހިމެނެއެވެ.

ވަގަށް ނަގާފައިވާ ފައިސާގެ ތެރެއިން މިހާތަނަށް ފުލުހުންނަށް ހޯދިފައިވަނީ 1،518،130 ރ. އެވެ. އޭގެ އިތުރުން ވަގަށް ނަގާފައިވާ ޑޭޓާ ކާޑް އަދި ރައުޓަރާއި، ފޯނުތަކާއި ރީޗަރޖް ކާޑުތައް ހޯދާފައިވާ ކަމަށް ފުލުހުން ވަނީ ބުނެފައެވެ.