އޮބާމާގެ ތާއިދު ޖޯ ބައިޑެން އަށް

މިއަހަރު ފަހުކޮޅު އެމެރިކާގައި ބާއްވާ ރިޔާސީ އިންތިޚާބުގައި ވާދަކުރައްވާ ޖޯ ބައިޑެން އަށް ތާޢީދުކުރެއްވަން ނިންމެވިކަން އެމެރިކާގެ ކުރީގެ ރައީސް ބަރަކް އޮބާމާ އިޢުލާނު ކުރައްވައިފިއެވެ.

އޮބާމާގެ ވެރިކަމުގައި ނައިބް ރައީސްކަންވެސް ކުރެއްވި ޖޯ ބައިޑެން އަށް ތާޢީދުކުރައްވަން ނިންމެވިކަން އޮބާމާ އިޢުލާނު ކުުރެއްވީ، ޓްވިޓަރގައި ހިއްސާކުރެއްވި ވީޑިއޯއެއްގައެވެ.

އޮބާމާ ވިދާޅުވީ، އެމަނިކުފާނުގެ ވެރިކަމުގައި ނައިބު ރައީސް ކަމަށް ބައިޑެން ޢައްޔަނު ކުރެއްވުމަކީ މިހާތަނަށް ނިންމެވި އެންމެ ރަނގަޅު އެއް ނިންމެވުން ކަމަށާއި، ޖޯ ބައިޑެން އަކީ ރައީސެއްގެ ކިބާގައި ހުންނަންވާ ހުރިހާ ޝަރުޠުތަކެއް ފުރިހަމަވެފައިވާ ބޭފުޅެއް ކަމަށް ޤަބޫލުފުޅުކުރައްވާ ކަމަށެވެެ.

ބާރަ މިނިޓްގެ އެ ވީޑިއޯ ގައި ރައީސް ޑޮނާލްޑް ޓްރަމްޕްގެ ނަން ނުގެންނަވާ އޮބާމާ ވިދާޅުވީ މި ދަނޑިވަޅުގައި ވައިޓް ހައުސްއަަށް ވަރުގަދަ ލީޑަރޝިޕެއް ބޭނުންވާ ކަމަށެވެ.

2009 ވަނަ އަހަރު ފެތުރުނު އެޗްވަންއެންވަން އައުޓް ބްރޭކްގައި ޖޯ ބައިޑެން ކުރެއްވި މަސައްކަތްވެސް އޮބާމާ ފާހަގަކުރެއްވިއެވެ. އޮބާމާގެ މެސެޖަށް ޓްވިޓަރ ގައި ޖަވާބުދެއްވަމުން ޖޯ ބައިޑެން ވިދާޅުވީ، ޤައުމަށްޓަކައި ކުރާ މަސައްކަތުގައި އޮބާމާ ފަދަ ދެވަނަ ބައިވެރިޔަކު އަރިހުގައި ނުހުންނަވާނެ ކަމަށެވެ.

ޖޯ ބައިޑެން އަށް ތާޢީދުކުރައްވާނެކަން އޮބާމާ އިޢުލާނު ކުރައްވާފައިވާއިރު، ބަރނީ ސެންޑަރސް ވެސް ވަނީ ޖޯ ބައިޑެން އަށް ތާޢީދުކުރައްވަން ނިންމަވާފައެވެ. މި ދެބޭފުޅުންނަކީ ކުރިން ބައެއް ސިޔާސަތުތަކަށް ޚިޔާލު ތަފާތުވެ އެއްބޭފުޅަކު އަނެއް ބޭފުޅަކަށް ފާޑު ވިދާޅުވެފައިވާ ދެ ބޭފުޅުންނެވެ. އެގޮތުން ދެބޭފުޅުން ޚިޔާލު ތަފާތުވެފައި ވަނީ ޚާރިޖީ ސިޔާސަތާއި، ސިއްޙަތާއި ބެހޭ ސިޔާސަތުތަކާއި މެދުގައެވެ.

އެމެރިކާގެ ރިޔާސީ އިންތިޚާބު އޮންނާނީ މިއަހަރުގެ ނޮވެންބަރު މަހުގެ ތިންވަނަ ދުވަހުއެވެ.