މަބްރޫކްގެ ކަންބޮޑުވުން: އެންމެން އެއްވެ އުޅޭންޏާ މިޖެހެނީ އެއްތާކު!
14 އެޕްރީލު 2020 | އަންގާރަ 19:49މިވަގުތު ރާއްޖޭގައި ކޮމިއުނިޓީ ސްޕްރެޑެއް އޮތްކަމެއް ނޭނގޭ
ހުޅުމާލޭގައި ބަޔަކު ހަވީރު ސަޔަށް ނުކުމެ
މަގުމަތީގައި މީހުން އެއްވެ އުޅޭނަމަ ކޮވިޑް-19 ރާއްޖޭގައި ފެތުރުނަ ނުދިނުމަށް ސަރުކާރުން އަޅާފައިވާ ފިޔަވަޅުތަކުގެ އެއްވެސް ބޭނުމެއް ނެތް ކަމަށް ނެޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އިން ބުނެފިއެވެ.
އަންގާރަ ދުވަހުގެ ރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ރާއްޖެއެމްވީ އިން ކުރި ސުވާލަކަށް ޖަވާބުދެއްވަމުން އެންއީއޯސީގެ ތަރުޖަމާނު މަބްރޫކް އަޒީޒް ވިދާޅުވީ ރާއްޖޭގައި ކޮމިއުނިޓީ ސްޕްރެޑަކަށް ގޮސްފި ހާލަތެއްގައި 98000 އެއްހާ މީހުންނަށް މި ބަލި ޖެހޭނެ ކަމަށް އެޗްޕީއޭއިން ރާއްޖޭގެ ޙާލަތާ ގުޅޭގޮތުން ތައްޔާރުކޮށްފައިވާ ރިޕޯޓުގައި ލަފާކޮށްފައިވާކަމަށެވެ. އެގޮތަށް ރިޕޯޓުގައި ފާހަގަކޮށްފައިވީނަމަވެސް އުއްމީދުކުރައްވަނީ އެ ނަމްބަރު މަދުކުރުމަށް ކަމަށެވެ.
މަބްރޫކް ވިދާޅުވީ އެންމެ މުހިއްމުކަމަކީ ގުދު ފަތިކުރުން (ކަރވް ފްލެޓު) ކުރުން ކަމަށެވެ.
މަބްރޫކް ވިދާޅުވީ ގުދު ފަތި ކުރުމުގައި އެންމެ ބޮޑު ދައުރެއް އަދާކުރެވޭނީ އެންމެން އެކުގައި މަސައްކަތްކޮށްގެން ކަމަށެވެ. އަދި ގައިދުރުކުރުމަށްވުރެ މޮޅުގޮތެއް ނެތް ކަމަށް މަބްރޫކް ވިދާޅުވިއެވެ.
މަބްރޫކް ވިދާޅުވީ މިވަގުތު ރާއްޖޭގައި ކޮމިއުނިޓީ ސްޕްރެޑެއް އޮތްކަމެއް ނޭނގޭ ކަމަށެވެ. އަދި އެކަން ޔަގީން ކުރުމަށް ރާއްޖޭގެ އާންމުންގެ ތެރޭގައި ކޮވިޑް-19 ފެތުރޭތޯ ބެލުމަށް ސަރވޭއެއް ފަށާފައިވާކަމަށް މަބްރޫކް ވިދާޅުވިއެވެ.
މަބްރޫކް މިހެން ވިދާޅުވެފައިވާއިރު ކޮވިޑް-19 އާއި ގުޅިގެން ރާއްޖެއިން ރައްކާތެރިވުމުގެ ގޮތުން އެއްވެސް ފިޔަވަޅެއް ނާޅައިފިނަމަ ރާއްޖެއިން 10،891 މީހުން މަރުވާނެކަމަށް ބެލެވޭ ކަމަށް އެޗްޕީއޭއިން ރާއްޖޭގެ ޙާލަތާ ގުޅޭގޮތުން ތައްޔާރުކޮށްފައިވާ ރިޕޯޓުގައި ވަނީ ބުނެފައެވެ. އަދި ރާއްޖޭގައި މުޖުތަމައުގެ ތެރޭގައި ބަލި ފެތުރިއްޖެނަމަ ޖުމުލަކޮށް މާލެ ސަރަޙައްދުން 46،627 އަށްވުރެ ގިނަ މީހުންނަށް ބަލި ޖެހޭނެ ކަމަށް ލަފާ ކޮށްފައިވާއިރު އަތޮޅުތަކުން 51،874 މީހުން ބައްޔަށް ޕޮޒިޓިވްވާނެކަމަށް ރިޕޯޓުގައިވެއެވެ.
