އާންމުންގެ ތެރޭގައި ކޮވިޑް-19 ފެތުރޭތޯ ބެލުމަށް ކުރާ ސަރވޭ ފަށައިފި
14 އެޕްރީލު 2020 | އަންގާރަ 14:3365 އަހަރުގެ މީހުންގެ ސާމްޕަލް ނަގާނެ
ކޮވިޑް-19 ރައްކާތެރިކަމުގެ ގޮތުން ގިނަ ބަޔަކު ދަނީ މާސްކު އަޅަމުން
ރާއްޖޭގެ އާންމުންގެ ތެރޭގައި ކޮވިޑް-19 ފެތުރޭތޯ ބަލަން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ހަދާ ސަރވޭގެ މަސައްކަތް އަންގާރަ ދުވަހު ފަށައިފިއެވެ.
އެޗްޕީއޭގެ މެޑިކަލް އޮފިސަރު ޑރ. ފަތިމަތު ނަޒްލާ ރަފީގް ވިދާޅުވީ، ސަވޭގައި ސާމްޕަލް ނަގަން ހަމަޖެހިފައިވަނީ އެކި ކެޓަގަރީ ތަކަށް ބަހާލައިގެން ކަމަށެވެ. އެގޮތުން އާއްމުންގެ ތެރެއިން ސާމްޕަލް ނަގަން ހަމަޖެހިފައިވަނީ މާލޭ ސަރަހައްދުގެ އިތުރުން ރީޖަނަލް ހޮސްޕިޓަލް ތަކުގައި އޯޕީޑާ އަށްދާ މީހުންގެ ތެރެއިން ހޮވާލެވޭ ފަރާތްތަައް ކަމަށް ވިދާޅުވިއެވެ.
ނަޒްލާ ވިދާޅުވީ، ރާއްޖޭގެ އެކި ހިސާބުތަކުން އުމުރުން 65 އަހަރުން މަތީގެ މީހުންގެ ވަކި އަދަދެއްގެ ސާމްޕަލްތައް ސަވޭގައި ނެގޭނެ ކަމަށެވެ. އެޗްޕީއޭ އިން ބުނީ، ސާވޭގައި ހިމެނޭ ތިން ވަނަ ގްރޫޕްއަކީ މާލޭގެ އިތުރުން ރާއްޖޭގެ އެކި ސަރަހައްދުތަކުގައި ގާއިމްކޮށްފައިާ ފްލޫ ކްލިނިކްތަކަށް ޒިޔާރަތްކުރާ މީހުންގެ ތެރެއިން ރެންޑަމްކޮށް ނަގާ ސާމްޕަލްތައް ކަމަށެވެ.
އެ އިދާރާއިން ބުނީ، ޕޯޓްތަކާއި، ގެސްޓް ހައުސް ހުންނަ ރަށްރަށް ބަހާލައިގެން ފަސް ރަށަކުން ސާމްޕަލްތައް ނަގާނެ ކަމަށެވެ. އަދި އޭގެ އިތުރުން ރާއްޖޭގައި މަސައްކަތްކުރާ ބޭރު މީހުންގެ ސާމްޕަލްތައް ވެސް ނެގުމަށް ހަމަޖެހިފައިވާ ކަމަށެވެ.
ޑރ. ނަޒްލާ ވިދާޅުވީ، އެ ސާމްޕަލް ނެގުމުގެ ބޭނުމަކީ އެ ގްރޫޕްތަކުގެ މީހުންގެ ގައިގައި ބަލި ހުރިތޯ އާއި އެ މީހުންގެ ފަރާތުން ބަލި އެހެން ބަޔަކަށް އަރާފާނެތޯ ބެލުން ކަމަށެވެ.
އޭނާ ވިދާޅުވީ، އެންޓި ބޮޑީ ޓެސްޓު ހެދުމަށް ސިއްހީ ދާއިރާގައި މަސައްކަތްކުރައްވާ ފަރާތްތަކުގެ ސާމްޕަލްވެސް ނަގަނަ ހަމަޖެހިފައިވާ ކަމަށެވެ. އޭގެ ބޭނުމަކީ، އެއިން އެއްވެސް ބަޔަކު މީގެ ކުރިން ބައްޔަށް ''އެކްސްޕޯސް'' ވެފައިވޭތޯ ބެލުން ކަމަށެވެ.
