ބައިނަލްއަގުވާމީ މެޗުތައް މިއަހަރު ނުކުޅޭނެ ކަމުގެ އިޝާރާތެއް

ދުނިޔޭގައި މިހާރު ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ބައިނަލްއަގުވާމީ މެޗުތައް އަންނަ އަހަރުގެ ނިޔަލަށް ފަސްކުރަން ޖެހިދާނެ ކަމަށް ފީފާގެ ނައިބު ރައީސް ވިކްޓާ މޮންޓަގްލިއާނީ ވިދާޅުވެއްޖެ އެވެ.

ކޮވިޑް-19 އާ ގުޅިގެން ފީފާއިން މީގެ ކުރިން ވަނީ މާޗު މަހާއި ޖޫން މަހު ކުޅެން ތާވަލުކޮށްފައި ހުރި ފީފާ ވޯލްޑް ކަޕް ކޮލިފައިންގެ މެޗުތައް މުއްދަތެއް ނެތް ގޮތަށް ފަސްކޮށްފައެވެ.

ފީފާގެ ނައިބު ރައީސް އަދި ކޮންކާކަފްގެ ރައީސް ވިކްޓާ މޮންޓަގްލިއާނީ ވިދާޅުވީ މެދު ކަނޑާލާފައިވާ ކްލަބު ފުޓްބޯޅަ މުބާރާތްތައް ކުރިއަށް ގެންދިޔުމަށްޓަކައި، ބައިނަލްއަގުވާމީ މެޗުތައް އަންނަ އަހަރުގެ ނިޔަލަށް ފަސްކުރަން ޖެހިދާނެ ކަމަށެވެ. އެގޮތުން ސެޕްޓެމްބަރު، އޮކްޓޯބަރު އަދި ނޮވްމެބަރު މަހު ކުޅުމަށް ތާވަލުކޮށްފައި ހުރި މެޗުތައް އަންނަ އަހަރުގެ ނިޔަލަށް ފަސްކުރަން ޖެހިދާނެ ކަމަށްވެސް ވިދާޅުވި އެވެ.

ފީފާއިން ބައިނަލްއަގުވާމީ މެޗުތައް އަންނަ އަހަރުގެ ނިޔަލަށް ފަސްކުރަން މަސައްކަތް ކުރަމުން އަންނައިރު، ޔުއެފާއިން މީގެ ކުރިން ޔޫރޯ ފުޓްބޯލަ މުބާރާތް އަންނަ އަހަރުގެ ހޫނު މޫސުމުގެ ނިޔަލަށް ފަސްކޮށްފައެވެ. އަދި ކޮންމެބޯލްއިން މީގެ ކުރިން ކޮޕަ އެމެރިކާ ފުޓްބޯޅަ މުބާރާތްވެސް އަންނަ އަހަރުގެ ހޫނު މޫސުމަށް ފަސްކޮށްފައެވެ.

ބައިނަލްއަގުވާމީ މެޗުތައް މިއަހަރު ނުކުޅޭނެ ކަމުގެ އިޝާރާތެއް ފީފާގެ ނައިބު ރައީސް ދެއްވިއިރު، ހުއްޓިފައިވާ ފުޓުބޯޅައިގެ ހަރަކާތްތައް އަވަސްއަރުވާލައިގެން އަލުން ފެށުން އެއީ ޒިންމާދާރު ކަމެއް ނޫން ކަމަށް ދާދި ފަހުން ފީފާގެ ރައީސް ޖިއާނިއޯ އިންފަންޓީނޯ ވަނީ ވިދާޅުވެފައެވެ.

ކޮވިޑް-19 އާ ގުޅިގެން ކްލަބުތަކުގެ މުބާރާތްތައް ފަސްކޮށްފައިވާއިރު، ފީފާއިން އަންނަނީ ލީގުތަކުގެ ކުޅުން ހޫނު މޫސުމުގައި ކުރިއަށް ގެންދެވޭނެ ގޮތަކާއި މެދު މަޝްވަރާ ކުރަމުންނެވެ. އެގޮތުން ފީފާއިން މީގެ ކުރިން ވަނީ ލީގުތައް ދިގުދެމިގެން ދާނެތީ، ކްލަބުތަކަށް ދިމާވާނެ މައްސަލަތައް ހައްލުކޮށްދީފައެވެ. އެގޮތުން މި ސީޒަނުގެ ނިޔަލަށް އެއްބަސްވުން ހަދާފައި ތިބި ކުޅުންތެރިން، ސީޒަން ނިމެންދެން ކްލަބުގައި ތިބެވޭނެ ކަމުގެ ޔަގީންކަން ފީފާއިން ވަނީ ދީފައެވެ.