މިއަހަރުގެ މާރޗު މަހުގެ ތެރޭގައި ދައުލަތަށް ލިބުނު އާމްދަނީ ފާއިތުވި އަހަރަށްވުރެ 26.9 އިންސައްތަ ދަށަށް ގޮސްފި ކަމަށް މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އިން ބުނެފިއެވެ.

މީރާއިން އާންމުކުރި ތަފާސްހިސާބުތައް ދައްކާގޮތުން ނިމިދިޔަ މާރޗު މަހު މީރާއަށް 1.11 ބިލިއަން ރުފިޔާ ބަލައިގަނެފައިވާއިރު، މި އަދަދަކީ ވޭތުވެދިޔަ އަހަރުގެ މި މުއްދަތުގައި ލިބުނު އާމްދަނީއަށްވުރެ %26.9 ދަށް އަދަދެއްކަމަށް މީރާއިން ބުނެއެވެ. އަދި މިއީ މި އަހަރުގެ މި މުއްދަތުގައި ލިބޭނެކަމަށް އަންދާޒާކުރި އަދަދަށްވުރެ %20.3 ދަށް އަދަދެއްކަމަށްވެސް މީރާއިން ބުނެއެވެ.

އާމްދަނީ ދަށް ވުމުގެ ސަބަބާއި ގުޅޭގޮތުން މީރާއިން ބުނީ، ކޮވިޑް-19 އާ ގުޅިގެން ސަރުކާރު ބަންދުކުރުމުގެ ސަބަބުން އެ މުއްދަތުގެ ތެރޭގައި އައިސްފައިވާ ޓެކުހުގެ ސުންގަޑިތައް ލަސްވެފައިވާ ކަމަށާއި، ފެބުރުވަރީ 2019 އާ އަޅާބަލާއިރު، ފެބުރުވަރީ 2020 ގައި ދިވެހިރާއްޖެއަށް ޒިޔާރަތްކޮށްފައިވާ ފަތުރުވެރިންގެ އަދަދުވެސް %11.1 ދަށްވެފައިވުން ކަމަށެވެ.

އޭގެ އިތުރުން، މާރިޗު 2020 ގައި މީރާއަށް ބަލައިގަތް އާމްދަނީގެ އެންމެ ބޮޑު ބައެއް ހިއްސާކުރަނީ ޖީ.އެސް.ޓީކަން ފާހަގަކޮށް މީރާއިން ބުނީ، %57.3 ނުވަތަ 637.67 މިލިއަން ރުފިޔާ ޖީ.އެސް.ޓީ އާމްދަނީ ގޮތުގައި ލިބިފައިވާ ކަމަށެވެ. އަދި ދެން އެންމެ ބޮޑު އާމްދަނީއެއް ލިބިފައިވަނީ ޓޫރިޒަމް ލޭންޑް ރެންޓުން ކަމަށާއި، އެއީ 11.8% ނުވަތަ 131.64 މިލިއަން ރުފިޔާކަމަށް މީރާގެ ތަފާސްހިސާބުތަކުން ދައްކައެވެ.

މީރާއިން ބުނީ، ބީ.ޕީ.ޓީގެ ގޮތުގައި 81.38 މިލިއަން ރުފިޔާ، ގްރީން ޓެކްސްގެ ގޮތުގައި 74.04 މިލިއަން ރުފިޔާ، އެއަރޕޯޓު ޑިވެލޮޕްމަންޓް ފީގެ ގޮތުގައި 59.17 މިލިއަން ރުފިޔާ، އަދި އެހެނިހެން ޓެކުހާއި ފީގެ ގޮތުގައި ލިބިފައިވާ 128.68 މިލިއަން ރުފިޔާ ހިމެނޭއިރު، މާރޗު މަހުގެ ޖުމުލަ އާމްދަނީގެ ތެރޭގައި 49.2 މިލިއަން އެމެރިކާ ޑޮލަރު ހިމެނޭ ކަމަށެވެ.