އެސްޓީއޯއިން ވިއްކަމުން އައި ފިޔާ އަދި ބިހުގެ އަގު ބޮޑުތަނުން ހެޔޮކޮށްފިއެވެ.
އެގޮތުން ކުރިން 15 ރުފިޔާއަށް ވިއްކަމުން އައި ފިޔާ ކިލޯއެއް ދެން ވިއްކާނީ 11 ރުފިޔާއަށް ކަމަށް އެސްޓީއޯއިން ބުނެއެވެ. އަދި 325 ރުފިޔާއަށް ވިއްކަމުން އައި ފިޔާ ބަސްތާއެއް ދެން ވިއްކާނީ 255 ރުފިޔާއަށް ކަމަށް އެސްޓީއޯއިން ބުނެއެވެ.
މީގެއިތުރުން ބިސް ކުރިންވެސް ވިއްކަމުން އައިގޮތަށް ބިހެއް ވިއްކާނީ 1 ރުފިޔާ 50 ލާރިއަށް ކަމަށް އެސްޓީއޯއިން ބުނެއެވެ. ނަމަވެސް ބިސް ކޭހެއް ކުރިން ވިއްކަމުން އައި 290 ރުފިޔާގެ ބަދަލުގައި ދެން ވިއްކާނީ 260 ރުފިޔާއަށް ކަމަށް އެސްޓީއޯއިން ބުނެއެވެ.
އެސްޓީއޯއިން އަލުވި މިހާރު ވިއްކަމުން އަންނަނީ އަލުވި ކިލޯއެއް 12 ރުފިޔާއަށެވެ. އަދި އަލުވި ބަސްތާއެއް 250 ރުފިޔާއަށެވެ.
އެސްޓީއޯއިން ބުނެފައިވަނީ ރައްޔިތުންނަށް ބޭނުންވާވަރަށް މިތަކެތި ލިބެން ހުންނާނެ ކަމަށެވެ. އަދި އެސްޓީއޯއިން ވަނީ ފިޔާ އަލުވި ބިސް އީސްޓޯރ.އެމްވީ މެދުވެރިކޮށް ގޭގެ ތިބެގެން ފޯރުކޮށްދިނުމުގެ އިންތިޒާމުވެސް ހަމަޖައްސާފައެވެ.
