އިސްތިއުފާ ދެއްވި ނައިބު ރައީސަށް ބާސާއިން ފިޔަވަޅު އަޅަނީ

ޑިރެކްޓަރުންގެ ބޯޑުގެ މެމްބަރަކަށް ކޮރަޕްޝަންގެ ތުހުމަތުކޮށް، މަގާމުން އިސްތިއުފާދެއްވި ނައިބު ރައީސް އެމިލީ ރޫސޯޑަށް ގާނޫނީ ގޮތުން ފިޔަވަޅު އަޅަން ބާސެލޯނާއިން ނިންމައިފި އެވެ.

ދާދި ފަހުން ބާސާ ބޯޑުގެ ހަ މެމްބަރަކު ވަނީ މަގާމުން އިސްތިއުފާ ދެއްވާފައެވެ. އިސްތިއުފާ ދެއްވީ ކްލަބުގެ ހަތަރު ނައިބު ރައީސުންގެ ތެރެއިން އެމިލީ ރޫސޯޑާއި، އެންރިކޭ ޓޮމްބާސް އަދި ހަތަރު ޑިރެކްޓަރުން ކަމަށްވާ ސިލްވިއޯ އެލިއަސް އާއި، ޖޯސެފް ޕޮންޓް އާއި، ޖޯޑީ ކަލްސަމިޖިލިއާ އަދި މާރިއާ ޓެއިޒިޑޯ އެވެ.

މީގެ ތެރެއިން ނައިބު ރައީސް އެމިލީ ރޫސޯޑް ވަނީ މިހާރުގެ ބޯޑަށް ބޮޑެތި ތުހުމަތުތަކެއް ކޮށްފައެވެ. އެގޮތުން މިވަގުތު ބާސާ ބޯޑުގައި އިން ކޮންމެވެސް އެއް މެމްބަރަކު ކްލަބުގެ ފައިސާ އަމިއްލަ ބޭނުމަށް ޚަރަދު ކުރަމުން އަންނަ ކަމަށް ވަނީ ވިދާޅުވެފައެވެ. އެހެންކަމުން ބާސާގެ އިންތިޚާބު ވީ އެންމެ އަވަހަކަށް ބޭއްވުމަށްވެސް ވަނީ ގޮވާލާފައެވެ.

މިއާއެކު ބާސާއިން ނެރުނު ބަޔާނެއްގައި ބުނެފައިވަނީ ކްލަބުގެ ބޯޑަށް ކުރި ކޮރަޕްޝަންގެ ތުހުމަތަކީ ސީރިއަސް މައްސަލައެއް ކަމަށާއި، ހަގީގަތެއް ނެތި ފަތުރާ ވާހަކަތަކަށް ފިޔަވަޅު އަޅާނެ ކަމަށެވެ. އެހެންކަމުން އެ ކްލަބުގެ ކުރީގެ ނައިބު ރައީސް އެމިލީ ރޫސޯޑަށް ގާނޫނޯ ގޮތުން ފިޔަވަޅު އަޅާނެ ކަމަށްވެސް ވިދާޅުވި އެވެ.

ބާސާ ބޯޑުގެ ހަ މެމްބަރަކު މަގާމުން އިސްތިއުފާދީ، މިހާރުގެ ބޯޑަށް ކޮރަޕްޝަންގެ ތުހުމަތުތަކެއް ކުރިއިރު، އެ ކްލަބުގެ ރައީސް ޖޯސެފް މާރިއާ ބާޓޮމެއޫ އާމެދު އެ ކްލަބުގެ ބޯޑު މެމްބަރުން ނުރުހޭ ކަމަށް މީޑިއާތަކުން ވަނީ ރިޕޯޓުކޮށްފައެވެ.

ބާސާއިން 2015 ވަނަ އަހަރުގެ ޔުއެފާ ޗެމްޕިއަންސް ލީގުގެ ތަށި އުފުލާލިއިރު، ބާޓޮމެއު ހުންނެވީ އެ ކްލަބުގެ ވަގުތީ ރައީސްގެ މަގާމުގައެވެ. އެ އަހަރު ޖުލައި މަހު ބާސާގެ ރައީސް ކަމަށް އިންތިޚާބުވެ ބާޓޮމެއު އެންމެ ބޭނުންވި ކަމަކީ އޭނާގެ ދައުރުގައި ޗެމްޕިއަންސް ލީގުގެ ތަށި ހޯދާށެވެ. އެކަމަކު މިހާތަނަށް އަދި އެކަން ހާސިލްވެފައިނުވާއިރު، އަންނަ އަހަރު ބާސާގެ އައު އިންތިޚާބު އޮންނާނެ އެވެ.

މީގެ ކުރިންވެސް ބާސާގެ ރައީސް ބާޓޮމެއޫ އާމެދު އެ ކްލަބުގެ ބޯޑު މެމްބަރުން ނުރުހޭ ކަމަށް މީޑިއާތަކުން ވަނީ ރިޕޯޓުކޮށްފައެވެ. އެގޮތުން އެންމެ ފަހުން މައްސަލަ ގޯސްވީ ޖެހިޖެހިގެން ދެ އަހަރު ޗެމްޕިއަންސް ލީގުން ކަޓައިގެން ދިޔަ ގޮތުން ބާސާގެ އޭރުގެ ކޯޗުގެ މަގާމުން އާނެސްޓޯ ވަލްވޭޑޭ ދުރުކުރަން ބާސާގެ ބައެއް ބޯޑު މެމްބަރުންނާއި ގިނަ ސަޕޯޓަރުން ބޭނުންވި ނަމަވެސް، ގިނަ ބަޔަކާ ދެކޮޅަށް އެ ފަހަރު ވަލްވޭޑޭ މަގާމުގައި ބަހައްޓަން ބާޓޮމެއު ނިންމުމުންނެވެ. އެކަމަކު އޭގެ ފަހުން ކުއްލި ގޮތަކަށް ވަލްވޭޑޭއަށް ޖަވާބުދާރީ ވުމުގެ ފުރުސަތެއްވެސް ނުދީ ބާސާއިން ވަނީ އޭނާ މަގާމުން ވަކިކޮށް، އެޓީމުގެ ކޯޗުގެ މަގާމަށް ކިކޭ ސެޓިއެން ހަމަޖައްސާފައެވެ.

އަދި އޭގެ ފަހުން ބާސާއިން އެ ކްލަބުގެ ރައީސް ބާޓޮމެއޫ ދިފާއުކޮށް، އޭނާއާ ދެކޮޅަށް މަސައްކަތްކުރާ ފަރާތްތަކުގެ އަގުވައްޓާލަން ބޭނުންވި ކަމަށްވެސް މީޑިއާތަކުގައި އަޑު ފެތުރުނެވެ. އަދި އެކަމަށް ކުންފުންޏެއްގެ އެހީ އެ ކްލަބުން ހޯދި ކަމަށާއި، އެގޮތުން ބާސާގެ ކެޕްޓަން ލިއޮނެލް މެސީ އާއި ޖެރާޑް ޕީކޭ އާއި ކުރީގެ ކުޅުންތެރިން ކަމަށްވާ ޒަވީ ހެނާންޑޭޒް އާއި ކާލްސް ޕުޔޯލް އަދި ކުރީގެ ކޯޗު ޕެޕް ގާޑިއޯލާގެ އަގުވައްޓާލަން ޓްވިޓާ އާއި ފޭސްބުކުގައި މަސައްކަތްކޮށްފައިވާ ކަމަށް ތުހުމަތުކުރި އެވެ.

ބާސާ ބޯޑުގެ ހަ މެމްބަރަކު އިސްތިއުފާ ދިންއިރު، އެޓީމުގެ ގިނަ ސަޕޯޓަރުންވެސް އަންނަނީ ރައީސްގެ މަގާމުން ބާޓޮމެއު އިސްތިއުފާ ދެއްވުމަށް ގޮވާލަމުންނެވެ.