ވެންޓިލޭޓަރު ގެންނަން ބަޖެޓުން އެއްވެސް ދިވެހި ކުންފުންޏަކަށް ފައިސާ ދީފައެއް ނުވާނެ: ސަރުކާރު
ދިވެހި ކުންފުންޏަކަށް ފައިސާ ދިން ކަމަށް ދައްކާ ވާހަކަ ދޮގު ކުރޭ
ރާއްޖޭގައި 97 ވެންޓިލޭޓަރ މިހާރު އެބަހުރި
ރާއްޖެއަށް ބޭނުންވާ ވެންޓިލޭޓަރު ގެންނަން ދިވެހި އެއްވެސް ކުންފުންޏަކަށް އަދި މިހާތަނަށް ފައިސާ ދައްކާފައިނުވާނެ ކަމަށް ސަރުކާރުން ބުނެފި އެވެ.
ހޯމަ ދުވަހުގެރޭ ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެޝަނަލް އެމެޖެންސީ އޮޕަރޭޝަން ސެންޓަރ (އެންއީއޯސީ) ގެ ތަރުޖަމާނު މުހައްމަދު މަބްރޫކް އަޒީޒް ވިދާޅުވީ، ހަތަރު ޕޯޓަބަލް ވެންޓިލޭޓަރު ގެނައުމަށް ހުޅުވާލި ފުުރުސަތުގައި 16 ފަރާތަަކުން ގުޅައި މައުލޫމާތު ހޯދާފައިވާ ކަމަށެވެ. އަދި ޕްރޮޕޯސަލް ހުށައެޅި ހަތަރު ފަރާތުގެ ތެރެއިން ވެންޓިލޭޓަރު ގެނައުމަށް އެއް ކުންފުންޏަކަށް ހަވާލުކުރެވިފައިވާ ކަމަށް ވިދާޅުވިއެވެ.
ސަރުކާރުން ވަނީ އިތުރު 135 ވެންޓިލޭޓަރެއް ހޯދުމުގެ މަސައްކަތް ފަށާފައެވެ. އެ ވެންޓިލޭޓަރުގެ ތަފްސީލު ހާމަކުރައްވަމުން މަބްރޫކް ވިދާޅުވީ، އޭގެ ތެރެއިން 50 ވެންޓިލޭޓަރު ގެނައުމަށް އެއް ކުންފުންޏަކާއި 20 ވެންޓިލޭޓަރު ގެނައުމަށް އެހެން ކުންފުންޏަކާއެކު އެގްރީމެންޓް ހެދިފައިވާ ކަމަށެވެ. މަބްރޫކް ވިދާޅުވި ގޮތުގައި، 135 ވެންޓިލޭޓަރު ގަންނަން ނިންމާފައިވަނީ މާލިއްޔަތުގެ ގަވާއިދުގެ 10.26 ގެ ދަށުން ކުއްލި ހާލަތުގައި ތަކެތި ގަތުމަށް ކަނޑައެޅިފައިވާ ގަވާއިދުގެ ތެރެއިންނެވެ.
އެޑްވާންސްކޮށް ފައިސާދީފައިނުވިޔަސް އެ ކުންފުނިތަކުގެ ނަމެއް މަބްރޫކް ހާމައެއް ނުކުރައްވައެވެ. ނަމަވެސް އޭނާ ވިދާޅުވީ، ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) މެދުވެރިކޮށް 65 ސްޓޭޝަނަރީ ވެންޓިލޭޓަރާއި، 10 ޕޯޓަބަލް ވެންޓިލޭޓަރ ''ސޯސް'' ކުރުމަށް ބޭރުގެ ކުންފުންޏަކަށް އެޑްވާންސްކޮށް 75 ޕަސެންޓް ފައިސާ ދައްކާފައިވާ ކަމަށެވެ.
ވެންޓިލޭޓަރު ގެނައުމުގެ މައްސަލާގައި ކޮރަޕްޝަން މަގު ފަހިވާގޮތަށް އަމަލުކުރަމުންދާ ކަމުގެ ތުހުމަތު ބައެއް ފަރާތްތަކުން ކުރާ ކަމަށް ނޫސްވެރިޔަކު ސުވާލުކުރުމުން މަބްރޫކް ވިދާޅުވީ، އެއްވެސް ކަމެއްގައި ކޮރަޕްޝަން ހިމެނޭ ކަމަށްވަންޏާ ކަމާބެހޭ މުއައްސަސާތަކުން އެކަން ބަލަން ފުރުސަތު ސަރުކާރުން ދޭނެ ކަމަށެވެ.
މީގެކުރިން ނޫސްކޮންފަރެންސްގައި ވާހަކަދައްކަވަމުން މަބްރޫކް ވިދާޅުވީ، ރާއްޖޭގެ އެކި އަތޮޅުތަކުގެ ހޮސްޕިޓަލުތަކުގައާއި، މާލޭގެ ހޮސްޕިޓަލްތަކާއި، އަމިއްލަ ހޮސްޕިޓަލުތަކާ އެކު ޖުމުލަ މުޅި ރާއްޖޭގައި މިވަގުތު 97 ވެންޓިލޭޓަރު އެބަހުރި ކަމަށެވެ.
ކޮވިޑް-19 ބަލިޖެހޭ މީހުންގެ ތެރެއިން ވެންޓިލޭޓަރުގައި ބައެއް މީހުންނަށް ފަރުވާދޭން ޖެހެއެވެ. ދުނިޔޭގެ ގައުމުތަކުގައި ހަލުވިކަމާއި އެކު ކޮވިޑް-19 ފެތުރެމުންދާ މި ދަނޑިވަޅުގައި އެތައް ގައުމެއްގައި ބަލި ޖެހިގެން ފަރުވާދޭން ޖެހޭ މީހުންގެ އަދަދު ގިނަވެފައިވާއިރު، ވެންޓިލޭޓަރުތައް މަދުވުމުގެ މައްސަަލަ ގިނަ ގައުމުތަކަކަށް ވަނީ ކުރިމަތިވެފައެވެ.
