ޑްރޮގްބާގެ ހޮސްޕިޓަލް ސަރުކާރުގެ ބޭނުމަށް ދީފި

ކޮރޯނާވައިރަސް (ކޮވިޑް-19) ގެ ކަންކަމުގައި އެހީވުމުގެ ގޮތުން އައިވަރީ ކޯސްޓާއި ޗެލްސީގެ ކުރީގެ މަޝްހޫރު ފުޓްބޯޅަ ކުޅުންތެރިޔާ ޑިޑިއޭ ޑްރޮގްބާ، އޭނާގެ ހޮސްޕިޓަލް ސަރުކާރަށް ދީފި އެވެ.

ޑްރޮގްބާގެ ލޯރެންޓް ޕޯކޯ ހޮސްޕިޓަލް ހުންނަނީ އައިވަރީ ކޯސްޓުގެ އަބިޖާން ސަރަހައްދުގައެވެ. މި އަހަރުގެ ފަހުކޮޅު ހުޅުވަން ތާވަލުކޮށްފައިވާ މި ހޮސްޕިޓަލް ސަރުކާރާ މި ވަގުތަށް ހަވާލުކުރަން ޑްރޮގްބާ ނިންމީ ކޮވިޑް-19 ގެ ކަންތައްތަކުގައި ސަރުކާރަށާއި ގިނަ ބަޔަކަށް ލުޔެއް ހޯދައިދިނުމުގެ ގޮތުންނެވެ.

ޑްރޮގްބާ ފައުންޑޭޝަނުން ބުނީ ކޮވިޑް-19 ގެ ކަންކަމުގައި ބޭނުންކުރަން އެ ހޮސްޕިޓަލް ސަރުކާރަށް ދިންއިރު، މި މުއްދަތުގައި ސަރުކާރުން މި ހޮސްޕިޓަލް ބޭނުންކުރިޔަސް އެއްވެސް ބަދަލެއް ބޭނުންނުވާ ކަމަށެވެ.

އެފްރިކާގެ މޮޅު ކުޅުންތެރިޔާގެ މަގާމު ދެ ފަހަރެއްގެ މަތިން ހޯދި ޑްރޮގްބާގެ އަމިއްލަ ހޮސްޕިޓަލް ސަރުކާރުގެ ބޭނުމަށް ދިންއިރު، އޭނާ ދާދި ފަހުން ވަނީ ކޮވިޑް-19 އަށް ތައްޔާރުކުރާ ފުރަތަމަ ވެކްސިން އެފްރިކާގައި ޓެސްޓްކުރަން ބާރުއަޅައި ފްރާންސްގެ ތަޖުރިބާކާރު ދެ ޑޮކްޓަރުން ދެއްކި ވާހަކަ އަށް ވަރުގަދަ ރައްދެއް ދީފަ އެވެ.

ފްރާންސްގެ މީޑިއާއެއްގައި އެގައުމުގެ ތަޖުރިބާކާރު ދެ ޑޮކްޓަރުން ބުނެފައިވަނީ ކޮވިޑް-19 އަށް ފުރަތަމަ ތައްޔާރުކުރާ ވެކްސިން ޓެސްޓުކުރުމަށް އެފްރިކާގެ ގައުމުތަކުގެ ބޭނުން ހިފިދާނެ ކަމަށެވެ. އެކަމަށް ރައްދު ދެމުން ޑްރޮގްބާ ބުނީ އެފްރިކާ މީހުންނާ ދޭތެރޭ ފްރާންސްގެ ދެ ޑޮކްޓަރުން ދެއްކި ވާހަކައަކީ ބަލައިގަނެވޭނެ ވާހަކަތަކެއް ނޫން ކަމަށާއި، އެފްރިކާ އަކީ ލެބޯޓަރީއެއް ނޫން ކަމަށެވެ. މީގެ އިތުރުން ޑްރޮގްބާ ބުނީ މިއީ ކަންބޮޑުވާ މައްސަލައެއް ކަމަށާއި، މަސައްކަތް ކުރަންވީ ދުނިޔޭގެ އެންމެން ވެސް މި ބަލިމަޑުކަމުން ސަލާމަތް ކުރުމަށް ކަމަށް ބުނެފައެވެ.

މުޅި ދުނިޔޭގައި ހަލުވިކަމާއެކު ކޮވިޑް-19 ފެތުރެމުންދާއިރު، އައިވަރީ ކޯސްޓުން މިހާތަނަށް 574 މީހަކު ވަނީ މި ވައިރަހަށް ޕޮޒިޓިވްވެފައެވެ.