މާޓިނޭޒް ހޯދުމުގެ މަސައްކަތް މެންޗެސްޓާ ސިޓީންވެސް ފަށައިފި

އިންޓަ މިލާނަށް ކުޅެމުން އަންނަ އާޖެންޓީނާ ގައުމީ ޓީމުގެ ފޯވާޑް ލަޓާރޯ މާޓިނޭޒް ހޯދުމުގެ މަސަތްކަތް މެންޗެސްޓާ ސިޓީން ފަށާފައިވާ ކަމަށް ރިޕޯޓުތައް ބުނެފި އެވެ.

ރިޕޯޓުތައް ބުނާގޮތުން މާޓިނޭޒް އިންޓަ މިލާނާއެކު ހަދާފައިވާ އެއްބަސްވުން އުވާލަން ދައްކަން ޖެހޭ 111 މިލިއަން ޔޫރޯ ދައްކަން ސިޓީ އޮތީ ތައްޔާރަށެވެ. އަދި ކުރިއަށް އޮތް ހޫނު މޫސުމުގެ ޓްރާންސްފާގައި މާޓިނޭޒްއަށް ސިޓީން ބިޑްކުރާނެ ކަމަށްވެސް ރިޕޯޓުތައް ބުނެއެވެ.

ސިޓީގެ އިތުރުން ޗެލްސީ އާއި، ރެއާލް މެޑްރިޑް އަދި ބާސެލޯނާއިންވެސް އަންނަނީ މާޓިނޭޒްއަށް ފާރަލަމުންނެވެ. ރިޕޯޓުތައް ބުނާ ގޮތުން ހޫނު މޫސުމުގެ ޓްރާންސްފާގައި މާޓިނޭޒް ބަދަލުވުން އެންމެ ގާތީ ބާސާއަށެވެ.

އެގޮތުން ބާސެލޯނާގެ ވިސްނުން ހުރީ 30 މިލިއަން ޔޫރޯ ދައްކާގޮތަށް ލޯނު އެއްބަސްވުމެއްގެ ދަށުން މާޓިނޭޒް ގެނައުމަށް ފަހު، އެއްބަސްވުން ދާއިމީކުރާނަމަ އިތުރު 50 މިލިއަން ޔޫރޯ ދެއްކުމަށެވެ. އަދި ބާސާއިން މާޓިނޭޒްއަށް އަހަރަކު 10 މިލިއަން ޔޫރޯގެ މުސާރައެއް ހުށަހަޅަންވެސް ތައްޔާރަށް އޮތް ކަމަށް ރިޕޯޓުތައް ބުނެ އެވެ.

އުމުރުން 22 އަހަރުގެ މާޓިނޭޒް އިންޓަ އަށް ބަދަލުވީ މިދިޔަ އަހަރުގެ ސީޒަނުގައި ފަސް އަހަރުގެ އެއްބަސްވުމެއް ދަށުންނެވެ. އާޖެންޓީނާގެ ރޭސިން ކްލަބުން 22 މިލިއަން ޔޫރޯއަށް އިންޓައަށް ބަދަލުވި މާޓިނޭޒް އަންނަނީ އެޓީމުގައި މޮޅު ކުޅުމެއް ދައްކަމުންނެވެ. އެގޮތުން މާޓިނޭޒް ވަނީ މިހާތަނަށް އިންޓައަށް ކުޅެދިން 66 މެޗުގައި 25 ލަނޑު ޖަހާފައެވެ.

އަދި އޭނާ ވަނީ އާޖެންޓީނާ ގައުމީ ޓީމަށް މިހާތަނަށް ކުޅެދިން 17 މެޗުގައި 9 ލަނޑު ކާމިޔާބުކޮށްފައެވެ.