ޓްރިވެންޑްރަމްގައި ތިބި 205 ދިވެހިން މާލެ ގެނެސްފި
11 އެޕްރީލު 2020 | ހޮނިހިރު 13:54ދެ ފްލައިޓެއް ވަނީ ބާއްވާފައި
ޓްރިވަންޑްރަމް ގައި ތިބި ދިވެހިން ރާއްޖެ އައި ފްލައިޓް
ކޮވިޑް-19 ގެ ސަބަބުން އިންޑިއާ ލޮކްޑައުން ކުރުމާއި ގުޅިގެން، ޓްރިވަންޑްރަމް ގައި ''ތާށިވެފައި'' ތިބި ދިވެހިންގެ ތެރެއިން 205 މީހަކު ގައުމީ އެއަރލައިން މޯލްޑިވިއަން ގައި ހޮނިހިރު ދުވަހު މާލެ ގެނެސްފިއެވެ.
މޯލްޑިވިއަނުން ވަނީ ޓްރިވަންޑްރަމް ގައި ތިބި ދިވެހިން ގެނައުމަށް ދެ ފްލައިޓެއް ބާއްވާފައެވެ. ފުރަތަމަ ފްލައިޓް ރާއްޖެ އައިސްފައިވަނީ މެންދުރު ބާރަ ޖެހިއިރު 50 ދިވެހިންނާއި އެކުގައެވެ. ދެވަނަ ފްލައިޓްގައި 155 ދިވެހިން ވަނީ ރާއްޖެ ގެނެސްފައެވެ. އެއާއި އެކު މުޅި ޖުމްލަ 205 ދިވެހިން ރާއްޖެ ގެނެވިފައިވާ ކަމަށް މޯލްޑިވިއަނުން ބުންޏެވެ.
ރާއްޖެއިން ބޭރުގައި ތިބި ދިވެހިންނަށް ކެއަރ ޕެކޭޖް ފޮނުވަން ހުޅުވާލި ފުރުސަތުގައި 150 ކެއަރ ޕެކޭޖް ވަނީ އިންޑިއާ އަށް ގެންގޮސްދީފައެވެ. ކޮވިޑް-19 އާއި ގުޅިގެން އިންޑިއާގައި ކާފިއު އިއުލާންކޮށްފައިވާތީ މި ކެއަރ ޕެކޭޖްތައް އާއިލާތަކާއި ހަވާލުކުރާނީ ކޮންސިއުލޭޓް ޖެނެރަލްއިން ކަމަށް ފޮރިން މިނިސްޓްރީން ވަނީ ބުނެފަ އެވެ.
ބޭރު ގައުމުތަކުގައި ތިބި ދިވެހިން ރާއްޖެ ގެނައުމުގައި އެންމެ ބޮޑު އިސްކަމެއް ދެނީ ދައުލަތުގެ ހަރަދުގައި ބޭސްފަރުވާއަށާއި، ދައުލަތުގެ ހަރަދުގައި ކިޔަވަން ގޮސްފައި ތިބި މީހުންނަށް ކަމަށް ނޭޝަނަލް ޑިޒާސްޓާ މެނޭޖުމަންޓް އޮތޯރިޓީން ވަނީ ބުނެފައެވެ.
