ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރޯގާއާ ގުޅިގެން ސަރުކާރު ބަންދުވީނަމަވެސް، ހައިކޯޓަށް ހުށަހެޅޭ މައްސަލަތައް ކުރިއަށް ގެންދާނެ ހާއްސަ އުސޫލުތަކެއް އެކޯޓުން ކަނޑައަޅައިފި އެވެ.
"ކޮވިޑް-19 ރޯގާއާ ގުޅިގެން ސަރުކާރު ބަންދުކުރެވިފައިވާ ދުވަސްތަކުގައި ދިވެހިރާއްޖޭގެ ހައިކޯޓަށް ހުށަހެޅޭ މައްސަލަތައް ކުރިއަށް ގެންދިއުމުގައި އިދާރީ ގޮތުން ޢަމަލުކުރާނެ ގޮތް ކަނޑައެޅުމާބެހޭ އުޞޫލު" ގައި އާންމު ސިއްހަތުގެ ކުއްލި ނުރައްކަލުގެ މިހާލަތުގައި އިސްތިއުނާފު ކުރުމަށް ކޯޓަށް ހުށަހަޅާ މައްސަލަތައް ހުށަހަޅާނެ ގޮތާއި ފޮނުވަން ބޭނުން އެކިއެކި ލިޔުންތައް ހުށަހަޅާނެގޮތާއި އިތުރު މަޢުލޫމާތެއް ސާފުކުރަން ބޭނުންވާނަމަ ގުޅޭނެ ނަމްބަރުތައް ބަޔާންކޮށްފައިވެއެވެ.
އެގޮތުން މައްސަލަތައް ބަލައިގަތުމާއި، މައްސަލައިގެ ރަޖިސްޓްރޭޝަން ފީ ދެއްކުމަށް ބޭންކް އެކައުންޓް ނަމްބަރެއް ހަމަޖައްސާފައިވާއިރު، ހައިކޯޓުން ފޮނުވަންޖެހޭ ލިޔެކިޔުންތަކާއި އަމުރުތައް އިލެކްޓްރޯނިކް ވަޞީލަތްތައް މެދުވެރިކޮށް ފޮނުވުމަށްވަނީ ހަމަޖެހިފައެވެ. ޝަރީޢަތަށް މީހުން ވެއްދުމާއި ނެރުމުގައި އަދި ޝަރީޢަތުގެ މަޖިލީހުގައި، ޢާންމު ޞިއްޙީ ރައްކާތެރިކަން ކަށަވަރުކުރުމަށްޓަކައި ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން ދީފައިވާ އިރުޝާދުތަކާ އެއްގޮތްވާ ގޮތުގެމަތީން ޢަމަލް ކުރެވޭނެކަމަށާއި މައްސަލައިގެ ޝަރީޢަތް ނިމުނުގޮތުގެ ރިޕޯޓު ހޯދަން އެދޭ ފަރާތްތަކުން، އެކަމަށް ހާއްޞަކުރެވިފައިވާ ފޯމު ފުރިހަމަކޮށް، މެއިލް ކުރުމުން އޮންލައިންކޮށް ލިބޭނެ އިންތިޒާމްވަނީ ހަމަޖައްސާފަ އެވެ.
މީގެއިތުރުން، އީމެއިލްއިން މުޢާމަލާތް ނުކުރެވޭ ފަރާތްތަކުން އެކިކަންކަމުގައި ކޯޓަށް ލިއުން ހުށަހެޅުއްވުމަށް ކޮންމެ ހަފްތާއަކު ހޯމަ ދުވަހު 10.00 އިން 13.00 ށް ހައިކޯޓާއި އަދި ހައިކޯޓުގެ އުތުރު އަދި ހައިކޯޓު ދެކުނުގޮފި ހުޅުވިފައި ހުންނާނެކަމަށާއި އެގަޑިތަކުގައި ކުށުގެ ރިކޯޑްފޯމް ހުށަހަޅުއްވަން ބޭނުންވާ ފަރާތްތަކުގެ ފޯމު ބަލައިގަތުމަށްފަހު ވަގުތުން ދޫކުރެވޭނެކަމަށާއި އެހެނިހެން ދުވަސްތަކުގައި ފޯމު ހުށަހަޅަންބޭނުންވާ ފަރާތްތަކުންން އީމެއިލްކުރުމުން އީމެއިލް ފޮނުވާފައިވާ އީމެއިލްއަށް ޖަވާބު ފޮނުވޭނެކަމަށްވެސް އުޞޫލުގައިވެއެވެ.
މިގެއިތުރުން، ކޯޓުން އާންމުކުރި އުސޫލުގައިވާ ގޮތުން ކޮވިޑް-19 އާ ގުޅިގެން ސަރުކާރު ބަންދު ކޮށްފައިވާ މުއްދަތުގައި އެ ކޯޓުން ކުރިއަށް ގެންދާނީ ބަންދު އަމުރާއި ވަގުތީ އަމުރުތަކާއި ކޯޓު އަމުރުތަކުގެ މައްސަލަތަކުގެ އިތުރުން ހުކުމް ތަންފީޒު ކުރުން ފަސްކުރަން އެދިފައިވާ މައްސަލަތަކާއި ކުޑަކުދިންނާ ގުޅުންހުރި މައްސަލަތައް އަދި ގެވެށި އަނިޔާގެ މައްސަލަތަކާއި އަޑުއެހުން ނިމިފައިވާ މައްސަލަތަކެވެ. އެކަމަކު އެހެން ބާވަތުގެ މައްސަލައެއް ކަމަށް ވިޔަސް، އެ މައްސަލައެއް އަވަހަށް ކުރިއަށް ގެންދަން ޖެހޭ ކަމަށް ފެނިއްޖެ ނަމަ، އެ މުއްދަތުގައި އެ މައްސަލައެއްގެ ޝަރީއަތް ހިންގިދާނެ ކަމަށް ވެސް އެ އުސޫލުގައިވެ އެވެ.
އެ އުސޫލުގައިވާ ގޮތުން ވީޑިއޯ ކޮންފަރެންސްކޮށް ޝަރީއަތް ކުރިއަށް ގެންދެވޭނެ އިންތިޒާމް ހަމަޖެހިފައިވާ ނަމަ އަދި އެކަމަށް ގާނޫނީ ހުރަހެއް ނެތް ނަމަ، އެ މައްސަލައެއްގެ ޝަރީއަތް ވީޑިއޯ ކޮޮންފަރެންސްކޮށް ކުރިއަށް ގެންދެވިދާނެ ކަމަށްވެސް ހައިކޯޓުން ބުނެފައި ވެއެވެ.
