ކޮވިޑް-19 އާ ގުޅިގެން ދިވެހިރާއްޖޭގައި އާންމު ސިއްހަތުގެ ކުއްލި ނުރައްކަލުގެ ހާލަތު އިއުލާންކޮށް، ސަރުކާރު ބަންދު ކޮށްފައިވީނަމަވެސް، ކޮންމެހެން ހިންގަންޖެހޭ ޝަރީއަތްތައް ކުރިއަށް ގެންދަން ކްރިމިނަލް ކޯޓުން ނިންމައިފި އެވެ.

ކްރިމިނަލް ކޯޓުން ނެރެފައިވާ ބަޔާނެއްގައި ބުނެފައިވަނީ، އަދުލު އިންސާފު ގާއިމުކުރުމުގެ ބާރުގެ ހިދުމަތާއި ކޯޓުތަކުގެ ހިދުމަތް މެދުނުކެނޑި ރައްޔިތުންނަށް ލިބުމަކީ މުހިއްމު ކަމެއްކަމުގައިވާތީ، ކްރިމިނަލް ކޯޓުގެ މަސައްކަތުގެ ތެރެއިން ބަންދާމެދު ގޮތެއް ނިންމުމަށް ބާއްވާ މަޖިލިސްތައް ބޭއްވުމާއި، އެކި ކަންކަމަށް ކޯޓު އަމުރު ނެރެދިނުމުގެ މަސައްކަތްތައް މެދުނުކެނޑި 24 ގަޑިއިރު ދެމެންދާ ކަމަށެވެ.

ކްރިމިނަލް ކޯޓުން ބުނީ، ސަރުކާރު ބަންދުކޮށްފައިވާ ދުވަސްތަކުގައި ވެސް ކޮންމެހެން ހިންގަންޖެހޭ ޝަރީއަތްތަކެއް ހިންގުމަށްޓަކައި، ހުކުރު އަދި ހޮނިހިރު ދުވަސްފިޔަވައި ހަފްތާގެ ކޮންމެ ދުވަހެއްގެ ހެނދުނު 10:00 އިން 15:00 އަށް ކޯޓު ހުޅުވުމަށް ނިންމާފައިވާ ކަމަށެވެ.

އެކަމަކު ޝަރީއަތްތައް ކުރިއަށް ގެންދާނީ ވީހާ ވެސް ބޮޑަށް މީހުން ކޯޓަށް ޖަމާ ނުވާނޭ ގޮތަށް ކަމަށާއި އަދި ޝަރީއަތްތަކާއި ބަންދާ މެދު ގޮތެއް ނިންމުމުގެ މަޖިލިސްތައް ވީޑިއޯ ކޮންފަރެންސްކޮށް ކުރިއަށް ގެންދަން އިސްކަން ދޭނެ ކަމަށް ވެސް އެ ބަޔާނުގައިވެ އެވެ. އަދި ޝަރީއަތްތައް ކުރިއަށް ގެންދަން ކޯޓުން ބޭނުންކުރާނީ އެކަމަށް ބޭނުންވާ އެންމެ މަދު މުވައްޒަފުން ކަމަށް ކްރިމިނަލް ކޯޓުން ބުނެއެވެ.

މީގެ އިތުރުން ޝަރީއަތްތަކާ ގުޅޭ ލިޔުންތައް މިދުވަސްވަރު ކޯޓަށް ހުށަހެޅުމުގެ ބަދަލުގައި އީމެއިލް މެދުވެރިިކޮށް ފޮނުވަން އެދޭ ކަމަށް އެ ބަޔާނުގައިވެ އެވެ.

ޖުޑީޝަލް ސާވިސް ކޮމިޝަން (ޖޭއެސްސީ) އިން ދާދިފަހުން ވަނީ މިދުވަސްވަރު ޚާއްސަ އުސޫލުތަކެއްގެ ދަށުން ޝަރީއަތްތައް ކުރިއަށް ގެންދަން ކޯޓުތަކަށް އެންގުމަށް ނިންމައިފަ އެވެ.

މީގެއިތުރުން، ސުޕްރީމް ކޯޓުން ވީޑިއޯ ކޮންފަރެންސް މެދުވެރިކޮށް، ޖިނާއީ އަދުލްގެ ނިޒާމުގެ ޝަރީއަތްތައް ހިންގާނެ ހާއްސަ ގަވާއިދެއް އެކުލަވާލައި، އަމަލު ކުރަން ފަށާފަ އެވެ.

ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 އަށް ޕޮޒިޓިވްވި މީހުންގެ އަދަދު އުޅެނީ 1.7 މިލިއަނަށްވުރެ މަތީގަ އެވެ. އަދި މިބަލީ ލައްކައަކަށްވުރެ ގިނަ މީހުން މަރުވެފައި ވެއެވެ.

ރާއްޖޭގައި ކޮވިޑް-19 އަށް ޕޮޒިޓިވް ވެފައިވަނީ 19 މީހެކެވެ. އެބަލީގައި ރާއްޖޭގައި ފަރުވާ ދެމުންދަނީ ހަތަރު ދިވެއްސަކަށް އެކަންޏެވެ. އިޓަލީ ދެމީހަކު ޕޮޒިޓިވް ވެފައިވާއިރު އެދެ މީހުން ވަނީ ރާއްޖެއިން ފުރާފަ އެވެ. ރާއްޖޭގައި މިބަލި ޖެހުނު މީހުންގެ ތެރެއިން 13 މީހަކު ވަނީ ރަނގަޅު ވެފަ އެވެ.