އަވަސްއަރުވާލައިގެން ފުޓްބޯޅަ އަލުން ފެށުން އެއީ ޒިންމާދާރު ކަމެއް ނޫން: އިންފަންޓީނޯ

ދުނިޔޭގައި މިހާރު ހަލުވިކަމާއިއެކު ފެތުރެމުން އަންނަ ކޮރޯނާވައިރަސް (ކޮވިޑް-19) ގެ ސަބަބުން ހުއްޓިފައިވާ ފުޓުބޯޅައިގެ ހަރަކާތްތައ, އަވަސްއަރުވާލައިގެން އަލުން ފެށުން އެއީ ޒިންމާދާރު ކަމެއް ނޫން ކަމަށް ފީފާގެ ރައީސް ޖިއާނިއޯ އިންފަންޓީނޯ ވިދާޅުވެއްޖެއެވެ.

އިންފަންޓީނޯ މިހެން ވިދާޅުވިއިރު، ދުނިޔޭގެ ފުޓުބޯޅައިގެ އެންމެ ބޮޑު ފަސް ލީގު ކުޅުންވަނީ ހުއްޓައިލާފައެވެ. އެއީ އިނގިރޭސި ޕްރިމިއާ ލީގާއި، ސްޕެނިޝް ލީގާއި، އިޓާލިއަން ލީގުގެ އިތުރުން ޖަރުމަން ލީގު އަދި ފްރެންޗު ލީގެވެ. އަދި ޔުއެފާ ޗެމްޕިއަންސް ލީގާއި ޔުއެފާ ޔޫރޮޕާ ލީގުވެސް ވަނީ މުއްދަތެއް ނެތް ގޮތަށް ފަސްކޮށްފައެވެ. މީގެ އިތުރުން މިއަހަރުގެ ހޫނު މޫސުމުގައި ބާއްވަން ހަމަޖެހިފައިވާ ޔޫރޯ ފުޓްބޯޅަ މުބާރާތުގެ އިތުރުން ކޮޕަ އެމެރިކާ ފުޓުބޯޅަ މުބާރާތް ވަނީ އަންނަ އަހަރަށް ފަސްކޮށްފައެވެ.

އިންފަންޓީނޯ ވިދާޅުވީ ބޭނުމަކީ އެއްވެސް އިންސާނެއްގެ ފުރާނަ ނުރައްކަލުގެ ތެރެއަށް ނުލައި ފުޓްބޯޅައިގެ ހަރަކާތްތައް ކުރިޔަށް ގެންދިޔުން ކަމަށާއި، އެގޮތަށް ކުރިޔަށް ގެންދާން ބޭނުންވާނަމަ ޖެހޭނީ ފުޓްބޯޅައިގެ ހަރަކާތްތައް ލަސްކުރުމަށް ކަމަށެވެ.

މީގެ އިތުރުން އިންފަންޓީނޯ ވިދާޅުވީ އެންމެނަށް ވެސް މިވަގުތު މުހިންމުވާނީ ރަނގަޅު ސިއްހަތެއްގައި ހުރުން ކަމަށާއި ފުޓްބޯޅައިގެ ހަރަކާތް ފެށުމަށް މިވަގުތު ތަން ނުދޭނެކަން އެންމެން ވެސް ދަންނަން ޖެހޭ ކަމަށެވެ. އަދި އަލުން ފުޓްބޯޅައިގެ ހަރަކާތްތައް ހިންގުމަށް ހުއްދަދޭނީ މިހާރު މި އޮތް ހާލަތު އެއްކޮށް ރަނގަޅުވުމުން ކަމަށްވެސް ވިދާޅުވިއެވެ.

މީގެ ކުރިން ފީފާއިން ވަނީ ލީގު ދިގުދެމިގެން ދާތީ ކްލަބުތަކަށް ދިމާވާނެ މައްސަލަތައް ހައްލުކޮށްދީފައެވެ. އެގޮތުން މި ސީޒަނުގެ ނިޔަލަށް އެއްބަސްވުން ހަދާފައި ތިބި ކުޅުންތެރިން، ސީޒަން ނިމެންދެން ކްލަބުގައި ތިބެވޭނެ ކަމުގެ ޔަގީންކަން ފީފާއިން ވަނީ ދީފައެވެ.

ފީފާގެ މި ނިންމުމާއެކު ޖުލައި މަހު އެއްވަނަ ދުވަހު ޓީމުތަކަށް ބަދަލުވާން ކުރިއާލާ ވެފައިވާ އެއްބަސްވުންތަކަށްވެސް ބަދަލު އަންނާނެ އެވެ. އެހެންކަމުން އެ ކުޅުންތެރިންނަށް ވެސް އެއްބަސްވުމުގައި ރަސްމީކޮށް ސޮއިކުރެވޭނީ ސީޒަން ނިމުމުންނެވެ. މީގެ އިތުރުން ފީފާ އިން ވަނީ ޓްރާންސްފާ ބާޒާރުގެ މުއްދަތު ވެސް އަންނަ ސީޒަން ފެށުމާ ހަމައަށް އިތުރުކޮށްފަ އެވެ.

ކޮވިޑް-19 އާ ގުޅިގެން ދުނިޔޭގެ ފުޓްބޯޅަ ހުއްޓުމަކަށް އައިސްފައިވާއިރު، މިކަމުގެ ސަބަބުން ދިމާވެފައިވާ މާލީ ދަތިތަކުން އަރައިގަތުމަށް ކްލަބުތަކުން އަންނަނީ މަސައްކަތް ކުރަމުންނެވެ. އެގޮތުން ބައެއް ކްލަބުތަކުން ވަނީ ކުޅުންތެރިންގެ މުސާރަ ކުޑަކުރުމަށް ނިންމާފައެވެ.