ނުވަކިލޯގެ މަސްތުވާތަކެތި: ޝަރިޔަތް ނިމެންދެން ހަތަރު މީހަކު ބަންދުކޮށްފި
ގޭބަންދަށް ދޫކުރި މީހުންގެ ތެރޭގައި މަސްތުވާތަކެތީގެ ބޮޑެއް ކަމަށްވާ އަރުޝަދު ހިމެނޭ
ނުވަކިލޯގެ މަސްތުވާތަކެތީގެ މައްސަލާގައި ހައްޔަރު ކުރި މީހުން
ޖެނުއަރީ މަހުގެ 30 ވަނަ ދުވަހު މާލޭގެ 10 ގެއެއް ބަލައި ފާސްކޮށް ހޯދި ނުވަ ކިލޯގެ މަސްތުވާތަކެތި މައްސަލާގައި ހައްޔަރުކުރި މީހުންގެ ތެރެއިން ހަަތަރު މީހަކު ޝަރިޔަތް ނިމެންދެން ގޭ ބަންދުގައި ބަހައްޓަން ކްރިމިނަލް ކޯޓުން އަމުުރުކޮށްފި އެވެ.
އެ މައްސަލާގައި ގޭބަންދުގައި ބަހައްޓަން އަމުރު ކޮށްފައިވަނީ، ގދ. ހޯނޑެއްދޫ، އަލޯރާ، އަރުޝަދު ހާލިދު، ގދ. ހޯނޑެއްދޫ އިރުމަތީގެ، އަހްމަދު ސުނައިނު އާއި ގދ. ހޯނޑެއްދޫ، ގުލޭނޫރަންމާގެ، އަލީ ޒުބައިރުގެ އިތުރުން ގދ. ހޯނޑެއްދޫ، މެޑްރިޓްހައުސް، އަހްމަދު ގިޔާސް އެވެ. މި ހަތަރު މީހުންގެ ތެރެއިން މުހައްމަދު ގިޔާސްއަކީ އެއްވެސް ކުށެއްގެ ތުހުމަތުގައި މީގެ ކުރިން ހައްޔަރުކޮށްފައިވާ މީހެއް ނޫނެވެ.
މީގެ ކުރިން ފުލުހުން ހާމަކޮށްފައިވާ ގޮތުން އެ މައްސަލާގައި ހައްޔަރު ކުރެވުނު އަރުޝަދަކީ، ފުޅާދާއިރާއެއްގައި މަސްތުވާތަކެތި ދިވެހިރާއްޖެއަށް އެތެރެކޮށް އެތަކެތި ބޭނުންކުރިކަމުގެ ތުހުމަތު ކުރެވޭ މީހެކެވެ. އޭނާގެ ބަންދު އިތުރު ކޮށްދިނުމަށް ކްރިމިނަލް ކޯޓަށް ގެންދިޔުމުން އޭނާ ދޫކޮށްލުމަށް ފަހުން އެ މައްސަލަ ރިވިއުކޮށްދިނުމަށް ޕްރޮސެކިއުޓާ ޖެނެރަލް (ޕީޖީ) އަށް ފުލުހުން އެދުމުން އޭނާ ވަނީ ގޭ ބަންދަށް ދޫކޮށްލާފައެވެ.
ފުލުހުން ހިންގި އޮޕަރޭޝަންގައި ނުވަ ކިލޯއަށްވުރެ ގިނަ ޑައަމޯފިން (ހެރޮއިން) އާއި 04 ގްރާމަށް ވުރެ ގިނަ ކޮކެއިން ފެނިފައިވެއެވެ. އެ މައްސަލާގައި ކުށުގެ ވެށިން ގިނަ އަދަދެއްގެ ފައިސާ ފުލުހުންގެ ބެލުމުގެ ދަށަށް ވަނީ ގެންގޮސްފައެވެ.
