ސްޕެއިންގެ ގަދަ ތިން ބާރު ކަމަށްވާ ބާސެލޯނާ، ރެއާލް މެޑްރިޑް އަދި އެތުލެޓިކޯ މެޑްރިޑްގެ ކުރީގެ ކޯޗު ރަޑޯމީރު އަންޓީކް މަރުވެއްޖެއެވެ.
ރަޑޯމީރު އަންޓީކް އަކީ ބާސާ، ރެއާލް އަދި އެތުލެޓިކޯ މެޑްރިޑުގެ ކޯޗުކަން އަދާކުރި ހަމައެކަނި ކޯޗެވެ.
އޭނާގެ ކޯޗިންގް ކެރިއަރުގެ އެންމެ ކާމިޔާބު ސީޒަން ހޭދަކޮށްފައިވަނީ އެތުލެޓިކޯ މެޑްރިޑްގައެވެ. އެތުލެޓިކޯ އާއިއެކު 1995/1996 ވަނަ އަހަރުގެ ސީޒަނުގައި ރަޑޯމީރު ވަނީ ސްޕެނިޝް ލީގު އަދި ސްޕެނިޝް ކަޕް ކާމިޔާބުކޮށްފައެވެ.
އެތުލެޓިކޯއިން ކުރި ޓްވީޓެއްގައި ބުނެފައިވަނީ ރަޑޯމީރު މަރުވި ޚަބަރަކީ އެޓީމަށް ލިބުނު ފުން ހިތާމައެއް ކަމަށާއި ރަޑޯމީރަކީ އެތުލެޓިކޯގެ ތާރީޚުގައި އެންމެ ކާމިޔާބު އެއް ކޯޗު ކަމަށެވެ.
ބާސެލޯނާއިން ބުނީ އެޓީމުގެ ކުރީގެ ކޯޗު ރަޑޯމީރައަކީ ހުނަރުވެރި ގާބިލު ކޯޗެއް ކަމަށާއި 2002 ވަނަ އަހަރުގެ ސީޒަނުގެ ފަހުކޮޅު ބާސާ އާއި ގުޅި އޭނާ ކޮށްދިން ކަންކަމަށް ޝުކުރުއަދާކުރާ ކަމަށެވެ.
ރަޑޯމީރު މަރުވިއިރު އޭނާގެ އުމުރަކީ 71 އަހަރެވެ.
