ކ. މާލެ
|
6 އޭޕްރިލް 2020 | ހޯމަ 20:50
2017 ވަނަ އަހަރު ބޭއްވި އޯއައިސީގެ ބައްދަލުވުމެއްގެ ތެރެއިން
2017 ވަނަ އަހަރު ބޭއްވި އޯއައިސީގެ ބައްދަލުވުމެއްގެ ތެރެއިން
ސައުދީ ގެޒެޓް
ކޮވިޑް-19
ކޮވިޑް-19: އޯއައިސީގެ ކުއްލި ބައްދަލުވުމެއް ބާއްވަނީ
 
މި ބައްދަލުވުމުގައި މެންބަރު ޤައުމުތަކުން އަމަލުކުރާނެ ސްޓެރެޓެޖީއެއް އެކުލަވާލާނެ
 
ބައްދަލުވުމުގެ ރިޔާސަތު ބަލަހައްޓާނީ ޔޫއޭއީއިން
 
އޯއައިސީގެ ބައްދަލުވުން ބާއްވާނީ ވީޑިއޯ ކޮންފަރެންސް މެދުވެރިކޮށް

އޯގަނައިޒޭޝަން އޮފް އިސްލާމިކް ކޮންފަރެންސް (އޯއައިސީ)ގެ ކުއްލި ބައްދަލުވުމެއް ބާއްވަން ނިންމައިފިއެވެ.

މިކަން ހާމަކުރައްވާ އޯއައިސީގެ ސެކްރެޓަރީ ޖެނެރަލް ޑރ. ޔޫސުފް އަލް-އުޘައިމީން ވިދާޅުވީ ބައްދަލުވުން ބާއްވާނީ ބުރާސްފަތިދުވަހުކަމަށާއި، ބައްދަލުވުން ބާއްވާނީ ވީޑިއޯ ކޮންފަރެންސް މެދުވެރިކޮށްކަމަށެވެ. މި ބައްދަލުވުމުގެ މައިގަނޑު ބޭނުމަކީ މުޅި ދުނިޔެއަށް ކުރިމަތިވެފައިވާ ކޮވިޑް-19 ގެ ބަލިމަޑުކަމުގައި އިސްލާމީ އުއްމަތުގެ ޤައުމުތަކުން، ގުޅިގެން މިކަމާއި ކުރިމަތިލުމަށް، ވަކިން ޚާއްޞަކޮށް މި ރޯގާއިން އަރައިގަތުމަށް ކުރެވިދާނެކަންތައްތަކާއި ބެހޭގޮތުން މަޝްވަރާކުރެއްވުމަށްކަމަށެވެ.

އަދި މުސްލިމް ޤައުމުތަކަށް ކޮވިޑް-19 އާއި ގުޅިގެން ކުރިމަތިވެފައިވާ ގޮންޖެހުންތަކާއި، އެއިން އަރައިގަތުމަށް ކުރެވިދާނެ ކަންތައްތަކާއި ބެހޭ ގޮތުން މަޝްވަރާކުރައްވާނެކަމަށް ޑރ. ޔޫސުފް އަލް-އުޘައިމީން ވިދާޅުވިއެވެ. އެގޮތުން ކޮވިޑް-19 އިން އަރައިގަތުމަށް ޤައުމުތަކުން ކުރަމުންދާ މަސައްކަތްތައް އެއްޤައުމު އަނެއް ޤައުމާއި ހިއްސާކުރެވި، އަދި ކަމާއި ގުޅުން ހުރި ސްޓެެރެޓެޖީއެއް މި ބައްދަލުވުމުގައި އެކުލަވާލުމަށް ހަމަޖެހިފައިވާކަމަށްވެސް އޭނާ ވިދާޅުވިއެވެ.

މި ބައްދަލުވުމުގެ ކަންކަން ވިލަރެސް ކުރާނީ އޯއައިސީގެ ހަތްވަނަ ހެލްތު މިނިސްޓަރުންގެ ބައްދަލުވުމުގެ ރިޔާސަތު ބަލަހައްޓަން ނިންމާފައިވާ ޔުނައިޓެޑް އެރެބް އެމިރޭޓްސްއިންނެވެ. އެގޮތުން ބައްދަލުވުން ކުރިޔަށްގެންދާނީ މިކަމަށް ކޮވިޑް-19 އާއި ހަނގުރާމަކުރުމަށް އެކުލަވާލާފައިވާ ޞިއްޙަތާއި ބެހ ޚާއްޞަ ސްޓިއަރިންގް ކޮމިޓީއަކުންނެވެ. މި ސްޓިއަރިން ކޮމިޓީގައި ހިމެނެނީ ސައުދީއަރަބިއްޔާ، ޔޫއޭއީ، ދިވެހިރާއްޖެ، ޕާކިސްތާން، މޮރިޓޭނިއާ، މިޞްރު، ޗާޑް، ތުރުކީވިލާތް، މެލޭޝިޔާ، އިންޑޮނޭޝިޔާގެ އިތުރުން އީރާނެވެ.

މީގެ ކުރިންވެސް، ޑރ. ޔޫސުފް އަލް-އުޘައިމީން ވަނީ މެންބަރު ޤައުމުތަކުގެ ފަންނީ މާހިރުންނާއި، ސައިންސްވެރިންނާއި، ކަމާއި ގުޅުންހުރި މުއައްސަސާތަކައް ކޮވިޑް-19 އިން ދިފާޢުވުމަށް ވެކްސިންއެއް ހޯދުމުގެ މަސައްކަތް ކުރިޔަށްގެންދިއުމަށް ގޮވާލައްވާފައެވެ. އޭނާ ވިދާޅުވީ، ދުނިޔެ މިފަދަ ނުރައްކަލަކާއި ކުރިމަތިލާއިރު، އަދި މުޅި ދުނިޔެ ކޮވިޑް-19 އަށް ފަރުވާއެއް ހޯދުމަށް މަސައްކަތްކުރަމުންދާއިރު، މުސްލިމް އުއްމަތް މިކަމުން ދުރުވެގެން ނުވާނެކަމަށެވެ. އޭނާ ވިދާޅުވީ މުސްލިމް ދުނިޔޭގައި ވެސް މިފަދަ ވެކްސިންއެއް އުފެއްދޭނެ ޤާބިލު ފަންނުވެރިންނާއި، ވަޞީލަތްތައް ހުރިކަމުގެ ޔަޤީންކަން އެބައޮތްކަމަށެވެ.

ޖުމުލަ 57 މެންބަރު ޤައުމުގެ ހިމެނޭ އޯގަނައިޒޭޝަން އޮފް އިސްލާމިކް ކޮންފަރެންސް (އޯއައިސީ) ގެ މައި މަރުކަޒު ހުންނަނީ ސައުދީ އަރަބިއްޔާގެ ޖިއްދާގައެވެ. އަދި އޯއައިސީގެ އާބާދީއަކީ 1.8 ބިލިއަން މީހުންނެވެ.

0%
86%
0%
14%
0%
0%
ކޮމެންޓް