ކޮރޯނާވައިރަސް (ކޮވިޑް-19) ޖެހިގެން ބާސެލޯނާ އަށް ކުރިން ކުޅުނު އަދި އެ ޓީމަށް ކުރިން އިރުޝާދުދިން މިހާރު މެންޗެސްޓާ ސިޓީގެ ކޯޗު ޕެޕް ގާޑިއޯލާގެ މަންމަ ޑޮލާސް ސަލަ ކަރިއޯ މަރުވެއްޖެ އެވެ.

ގާޑިއޯލާގެ މަންމަ މަރުވިކަން މެންޗެސްޓާ ސިޓީން ވަނީ ކަށަވަރުކޮށްދީފައެވެ. ރިޕޯޓުތައް ބުނާ ގޮތުން ގާޑިއޯލާގެ މަންމަ މަރުވީ ކޮވިޑް-19 ޖެހިގެން ބާސެލޯނާގެ ހޮސްޕިޓަލަކު ފަރުވާދެމުން ދަނިކޮށެވެ. ގާޑިއޯލާގެ މަންމަ މަރުވިއިރު، އޭނާގެ އުމުރަކީ 82 އަހަރެވެ.

މިހާރު ހަލުވިކަމާއެކު ފެތުރެމުންދާ ކޮވިޑް-19 ޖެހިގެން މީގެ ކުރިން ސްޕެއިންގެ ރެއާލް މެޑްރިޑްގެ ކުރީގެ ރައީސް ލޮރެންޒޯ ސަންޒް ވެސް ވަނީ ނިޔާވެފައެވެ. އަދި ސްޕެއިންގެ ޒުވާން ފުޓްބޯޅަ ކޯޗެއް ކަމަށްވާ އުމުރުން 21 އަހަރުގެ ފްރެންސިސްކޯ ގާސިއާވެސް ވަނީ މަރުވެފައެވެ.

ސްޕެއިންގައި ހަލުވިކަމާއެކު ކޮވިޑް-19 ފެތުރެމުންދާއިރު، އެ ގައުމުން ކުރަމުންދާ މަސައްކަތަށް އެހީވުމުގެ ގޮތުން ގާޑިއޯލާ މީގެ ކުރިން ވަނީ އެއް މިލިއަން ޔޫރޯ ހަދިޔާކޮށްފައެވެ. ރިޕޯޓުތައް ބުނާ ގޮތުން ގާޑިއޯލާ އެއް މިލިއަން ޔޫރޯ ހަދިޔާކޮށްފައިވަނީ މެޑިކަލް ކޮލެޖު އޮފް ބާސެލޯނާ އާއި އެންޖެލް ސޮލާ ޑެނިއެލް ފައުންޑޭޝަނުން ގުޅިގެން ކުރިއަށްގެންދާ ކެމްޕެއިނަކަށެވެ.

ސްޕެއިނުން މިހާތަނަށް ވަނީ 135،00 އަށް ވުރެ ގިނަ މީހުންނަށް މި ވައިރަސް ޖެހިފައެވެ. އަދި އެ ގައުމުން މިހާތަނަށް މި ވައިރަސް ޖެހިގެން 13،000 އަށްވުރެ ގިނަ މީހުން ވަނީ މަރުވެފައެވެ.