ކޮވިޑް-19: ޗައިނާގެ ދިދަ ބައިދަނޑިއަށް ތިރިކޮށް، 3 މިނެޓުގެ ސުކޫތެއް!
4 އެޕްރީލު 2020 | ހޮނިހިރު 08:49މި ހަރަކާތުގައި އެ ޤައުމުގެ ރައީސް ޝީ ޖިންގޕިންވެސް ބައިވެރިވެވަޑައިގެންފައިވޭ
އެ ޤައުމުގެ ދިދަ ބައިދަނޑިއަށް ތިރިކޮށްފައިވާއިރު، 3 މިނެޓުގެ ސުކޫތެއް ކުރިއަށްގެންގޮސްފައިވޭ
މުޅި ދުނިޔެއިން ކޮވިޑް-19 ޖެހުނު މީހުންގެ އަދަދު 1.1 މިލިއަނަށްވުރެ އިތުރުވުމާއި، ޗައިނާއިން ވައިރަސް ޖެހިގެން މަރުވި މީހުންގެ ހަނދާން އައު ކުރުމުގެ ގޮތުން ޗައިނާގައި ޤައުމީ ފެންވަރުގައި ހިތާމަ ފާޅު ކުރުމުގެ ސުކޫތެއް ކުރިއަށްގެންގޮސްފިއެވެ.
ހޮނިހިރު ދުވަހު އެ ޤައުމުގެ ދިދަ ބައިދަނޑިއަށް ތިރިކޮށް، ހުރިހާ ބާވަތެއްގެ މުނިފޫހިފިލުވުމުގެ ހަރަކާތްތަކެއް ހުއްޓާލުމަށް ވަނީ އަންގާފައެވެ. އަދި ހިތާމަފާޅު ކުރުމުގައި އެ ޤައުމުގެ ގިނަ އަދަދެއްގެ ބަޔަކު ބައިވެރިވެފައިވާއިރު، ވައިރަސްގައި މަރުވި މީހުންނަކީ "ޝަހީދުންގެ" ގޮތުގައި އެޤައުމުގެ ސަރުކާރުން ވަނީ ސިފަކޮށްފައެވެ.
ހޮނިހިރު ދުވަހު ބެއިޖިންގ ގަޑިން ހެނދުނު 10:00 ގައި އެ ޤައުމުގެ ދިދަ ބައިދަނޑިއަށް ތިރިކޮށްފައިވާއިރު، 3 މިނެޓުގެ ހަމަހިމޭން ކަމުގެ ސުކޫތެއް ވަނީ ކުރިއަށްގެންގޮސްފައެވެ. މި ހަރަކާތުގައި އެ ޤައުމުގެ ރައީސް ޝީ ޖިންގޕިންވެސް ބައިވެރިވެވަޑައިގެންފައިވެއެވެ.
އެންމެ ފުރަތަމަ ކޮވިޑް-19 ފެނުނު ޗައިނާއިން މިހާތަނަށް 3300 އަށްވުރެ ގިނަ މީހުން މަރުވެފައިވާއިރު، 81،000 އަށްވުރެ ގިނަ މީހުން ވައިރަސްއަށް ޕޮޒިޓިވްވެފައިވެއެވެ. އަދި އެ ޤައުމުން 466 މީހުން ސީރިއަސް ހާލަތުގައި އެބަތިއްބެވެ.
